ގޯލްޑަން ފުޓްސަލް ޗެލެންޖް އިން ރާއްޖޭގައި ފުޓްސަލް ކުރިއަރަމުންދާ މިންވަރު ފެނިގެންދާ ކަމަށް ހދ. ނައިވާދޫގެ ކޯޗުކަމާ ހަވާލުވެހުރި، ރާއްޖޭގެ ފުޓްސަލްގެ އެންމެ ކާމިޔާބު އެއް ކުޅުންތެރިޔާ، މުހައްމަދު އައްޒާމް ބުނެފި އެވެ.

އައްޒާމް ވަނީ މީގެ ކުރިން، އުފަން ރަށް، ނ. ކެނދިކުޅުދޫ އަށް ގޯލްޑަން ފުޓްސަލް ޗެލެންޖުގައި މޮޅު ކުޅުމެއް ދައްކައިފަ އެވެ. އަދި މި މުބާރާތުގެ ނ. އަތޮޅުގެ ޗެމްޕިއަންކަން އެ ޓީމަށް ދެ ފަހަރު ހޯދައިދޭން އައްޒާމް ވަނީ އެހީތެރިވެދީފަ އެވެ. އަދި ކޯޗިން އަށް ބަލާއިރު ވެސް އައްޒާމް ވަނީ ގޯލްޑަންގައި ފާހަގަކޮށްލެވޭ މަސައްކަތެއް ކޮށްފަ އެވެ. އެ ގޮތުން، 2022 ވަނަ އަހަރު ކ. ގާފަރުން ގޯލްޑަން ފުޓްސަލް ޗެލެންޖުގެ ފައިނަލަށް ދަތުރުކުރީ އައްޒާމްގެ ކޯޗުކަމުގަ އެވެ.

"(ގޯލްޑަން ފުޓްސަލް ޗެލެންޖުން ރާއްޖޭގެ ފުޓްސަލްގެ) އަސްލު އިމްޕްރޫވްމަންޓް ފެންނަމުން މިދަނީ، މި ޕްލެޓްފޯމަކީ ވަރަށް މުހިންމު ޕްލެޓްފޯމެއް އަސްލު، ރަށްރަށަށް ދެން، ރާއްޖެ ތެރޭ ރަށްރަށުގެ ކުޅުންތެރިންނަށް، ދެން، އޭތީގައި، ގޯލްޑަން އިން މި ކުރިއަށްގެންދާ މުބާރާތަށް އަސްލު ވަރަށް ބޮޑަށް ޝުކުރު އަދާކުރަން ވެސް ބޭނުން، އެއީ މީގަ ވަރަށް ބައިވަރު ކުދިންނަށް ލިބޭ އޮޕޮޗިއުނިޓީތަކެއް މީ، ވަރަށް ބޮޑަށް ކުރިއަރަމުންދާ ކަމަށް ލަފާކުރެވެނީ،" ގޯލްޑަން ފުޓްސަލް ޗެލެންޖާ ބެހޭގޮތުން، "އަދަދު ސްޕޯޓްސް" އަށް އައްޒާމް ބުންޏެވެ.

މި ފަަހަރުގެ ގޯލްޑަން ފުޓްސަލް ޗެލެންޖުގައި ނައިވާދޫއާ ހަވާލުވެ، އައްޒާމް އަންނަނީ ނިސްބަތުން ބަލާއިރު ރަނގަޅު މަސައްކަތްތަކެއް ކުރަމުންނެވެ. އެ ޓީމުގެ ކުޅުމަށް ބަލާއިރު، މެޗުން މެޗަށް ކުރިއެރުން ވެސް ފެނެ އެވެ.

"(ފުރަތަަަމަ މެޗުގައި) ކުރިން މެޗުގައި އިނީ ތަންކޮޅެއް ދަށްކޮށް ޓީމު ފެށިފައި، މި މެޗު ތަންކޮޅެއް ރަނގަޅަށް ފަށާފައި އިނީމަ އެ ރަނގަޅުވީ. ޕްރެކްޓިސްތައް ކުރަމުން އައީ ފުދޭ ވަރަކަށް ރަނގަޅަށް، އަނެއްހެން ޓީމު ވަރަށް ރަނގަޅަށް މަސައްކަތްކޮށްގެން އައީމަ މި މެޗު އަސްލު ވަރަށް މުހިންމުވެފައި އިނީ ނަގަން، އެހެންވީމަ، ޓީމުގެ ކުޅުންތެރިންގެ މަސައްކަތަށް ވަރަށް ޝުކުރު އަދާކުރަން ބޭނުން،" 5-1 އިން ނޮޅިވަރަން އަތުން މޮޅުވި މެޗާ ބެހޭގޮތުން އައްޒާމް ބުންޏެވެ.

ހދ. އަތޮޅުގެ އެންމެ ކާމިޔާބު ޓީމު ނައިވާދޫއާ އެކު އައްޒާމްގެ ޓާގެޓަކީ ތަށްޓެވެ. އެކަމަކު، އޭނާ ވިސްނުން ބައްޓަންކުރަނީ މެޗުން މެޗަށް ކުރިއަށް ގޮސް މަންޒިލަށް ވާސިލްވުމަށެވެ.

"ޓާގެޓް އަސްލު އަނެއްހެން ބުނާނަމަ ތަށްޓަށް ކުރަނީ، އެކަމަކު، ވިސްނަނީ ކުރިއަށް އިން މެޗަށް، އެ މެޗު ނަގައިގެން ނޫނީ އަހަރެމެން ކުރިއަށްދާކަށް ނުވިސްނަން، އަބަދުވެސް ޕްރެޕެއާ ވަނީ އެ ގޮތަށް ބަލާފައި. މި ވިސްނަނީ ކުރިއަށް ހުރި މެޗުތައް ނަގައިގެން ހަމަ، އަތޮޅުތަށްޓާ އެކީ މި ބުރު ނިންމާލަން،" އައްޒާމް ބުންޏެވެ.

ނައިވާދޫން ދެން ކުޅޭ މެޗުގައި، ހުކުރު ދުވަހުގެރޭ ކުޅޭނީ ނެއްލައިދޫއާ އެވެ.