ހުނަރުވެރި ކުޅުންތެރިން ދެނެގަންނަން ގޯލްޑަން ފުޓްސަލް ޗެލެންޖަކީ ވަރަށް ރަނގަޅު ޕްލެޓްފޯމެއް ކަމަށް ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) ވިދާޅުވެއްޖެ އެވެ.

ރާއްޖޭގެ ރަށްތަކުގެ މެދުގައި ކުރިއަށްދާ ގޯލްޑަން ފުޓްސަލް ޗެލެންޖުގެ ނުވަ ވަނަ މުބާރާތް މިހާރު ކުރިއަށްދާއިރު، މި މުބާރާތުގައި އއ އަތޮޅުގެ ޓީމުތައް މިދިޔަ ހޮނިހިރު ދުވަހު ކުޅުނު މެޗުތައް ޝަރަފްވެރިކޮށްދެއްވީ މިނިސްޓަރު ރާފިއު އެވެ.

އެ މެޗުތަައް ބައްލަވާލެވުމަށް ފަހު، "އަދަދު ސްޕޯޓްސް" އަށް ދެއްވި އިންޓަވިއުއެއްގައި މިނިސްޓަރު ރާފިއު ވިދަޅުވީ، މިދިޔަ އަހަރަށް ވުރެ ގޯލްޑަން ފުޓްސަލް ޗެލެންޖު އިތުރަށް ފުޅާވެގެންދިޔައީ، މުބާރާތް އިންތިޒާމްކުރާ ގޯލްޑަން ފުޓްސަލް އެސޯސިއޭޝަނުގެ ބުރަ މަސައްކަތުން ކަމަށެވެ.

"މިދިޔަ އަހަރަށް ވުރެ މި އަށް އިތުރު ޓީމުތަކާ އެއްކޮށް އެ އަށް ވުރެ ރަނގަޅަށް އޮގަނައިޒްވެގެން މި ފަހަރު މި އޮތީ އައިސްފައި، އަޅުގަނޑު ވަރަށް ފާހަގަކޮށްލަން މި ކަހަލަ އިވެންޓްތަކެއް މި ގޮތަށް ބޭއްވުމުގެ އެންމެ މުހިންމު ކަމަކީ، ކުޅުންތެރިންގެ ހާއްސަކޮށް ޔޫތު އެންގޭޖްކުރާނެ ޕްލެޓްފޯމެއް ކްރިއޭޓްވެގެންދިއުން. މި ކަމުގެ ސަބަބުން އަޅުގަނޑުމެންގެ ތެރޭގައި ޑިވެލޮޕްވަމުން އަންނަ ޓެލަންޓް،" ރާފިއު ވިދާޅުވި އެވެ.

"މިއަދުގެ މެޗުން (އއ. މަތިވެރި އާއި އުކުޅަސް ބައްދަލުކުރި މެޗުން) ވެސް ފެނިގެން މިދިޔައީ ވަރަށް ޔަންގް ކުޅުންތެރިން ވަރަށް ޅަ ކުޅުންތެރިން އެ ކުޅުންތެރިންގެ ހުނަރު ދައްކައި އެ ފެނިގެންދިޔަ މަންޒަރު، މިއީ، އަޅުގަނޑުމެންގެ ޕޮޓެންޝިއަލް އޮތްވަރު، ބޮޑު ޕޫލަކުން ފެނިގެންދާ ޕްރޮގްރާމެއް ދާ މުބާރާތެއް ވީމަ މި ކަހަލަ މުބާރާތުގެ އެންމެ މުހިންމު އެއް ކަމަކީ، ހުރި ޕޮޓެންޝިއަލް ދެނެގަނެ މި އަށް ވުރެ އިތުރަށް ފުޅާވެގެން ދިއުން،"

މުބާރާތް އިންތިޒާމްކުރި ގޯލްޑަން ފުޓްސަލް އެސޯސިއޭޝަނުން، މެޗުތައް ކުޅޭ ރެހެންދި ފުޓްސަލް ދަނޑުތައް ކައިރީގައި އެކިއެކި ކަންކަމަށް ސްޕޮންސަރުންނާ ގުޅިގެން ރާވާފައިވާ ކަންތައްތަކަކީ ވެސް މުބާރާތުގެ ރޭވުންތެރިކަން ރަނގަޅު ކަމެއްގެ ގޮތުގައި މިނިސްޓަރު ފާހަގަކުރެއްވި އެވެ.

"މި ފެންނަނީ ބޮޑުތަނުން ރަނގަޅުވެފައި އޮތްތަން އޭގެ ތެރޭގައި، ޕަބްލިކް ފެސިލިޓީސް ގާއިމްވެފައި އެބަހުރި، ޕަބްލިކް ރެސްޓް ރޫމްތަކާއި ކެންޓީންތަކާއި މި ހުރިހާ ކަމަކީ ވެސް ކުޅިބަލަން އަންނަ ކުޅުންތެރިންނާއި ބޭފުޅުންނަށް ފަސޭހަވެގެންދާނެ ކަންކަން މި ހުރިހާ ކަމަކީ ވެސް އެކެއް އަނެކަކަށް އެންގޭޖްވެ، އެއް ބަޔަކު ފެނިދެނިވެ، އުޅުމާއި މޮޅެތި ކުޅުންތެރިން ހޯދުމުގައި މި ކަހަލަ ޕްލެޓްފޯމަކީ ޓެލަންޓް އައިޑެންޓިފައި ކުރަން ފަސޭހަ ޕްލެޓްފޯމަކަށް ދާކަން ފާހަގަކޮށްލަން،" ރާފިއު ވިދާޅުވި އެވެ.

ގޯލްޑަން ފުޓްސަލް އެސޯސިއޭޝަނުން ވަނީ މި މުބާރާތުގެ ކަންކަމަށް މިނިސްޓަރު ރާފިއު ދެއްވާ އަހައްމިިއްޔަތުކަން ފާހަަގަަކޮށް އެކަމަށް ޝުކުރު އަދާކޮށްފަ އެވެ. އަދި މުބާރާތް ރަނގަޅަށް ކުރިއަށްގެންދިއުމަށްޓަކައި، ސްޕޮންސަރުން ވެސް މުހިންމު ދައުރެއް އަދާކުރާކަން ގޯލްޑަން ފުޓްސަލް އެސޯސިއޭޝަނުން ފާގަގަކުރެ އެވެ.