މިއުނިކް (ޖެނުއަރީ 11) - ޖަރުމަނު ލީގުގައި ރޭ 3-2 އިން ބޮރޫޝިއާ ޑޯޓްމަންޑު ބަލިކޮށް އެންމެ ފަހުގެ ޗެމްޕިއަން، ބަޔާ ލެވަކޫސަނުން ލީގުގެ ކުރީގައި އޮތް ބަޔާން މިއުނިކާ ގާތަށް ޖެހިލައިފި އެވެ.

އެއް ވަނައިގައި އޮތް ބަޔާނަށް ވަނީ 15 މެޗުން 36 ޕޮއިންޓް ލިބިފަ އެވެ. ދެ ވަނައިގައި އޮތް ލެވަކޫސަނަށް ވަނީ 16 މެޗުން 35 ޕޮއިންޓް ލިބިފަ އެވެ. ޑޯޓްމަންޑަށް 16 މެޗުން ލިބުނު 25 ޕޮއިންޓާ އެކު އޮތީ ހަ ވަނައިގަ އެވެ.

ޑޯޓްމަންޑް ދަނޑުގައި ރޭ ކުޅުނު މެޗުގެ 24 ވަނަ ސިކުންތުގައި ނޭތަން ޓެލާ ވަނީ ލެވަކޫސަނަށް ލީޑުނަގައިދީފަ އެވެ. އޭގެ ފަހުން، ހަތް ވަނަ މިނިޓްގައި ޕެޓްރިކް ޝިކް ވަނީ ގޯލެއް ޖަހައި، ލެވަކޫސަންގެ ލީޑުފުޅާކޮށްދީފަ އެވެ.

އޭގެ ފަސް މިނިޓް ފަހުން، ޑޯޓްމަންޑަށް ކުޅޭ އިނގިރޭސި ވިންގް ބެކް، ޖޭމީ ގިޓެންސް ވަނީ ގޯލެއް ޖަހައި، ފަރަގުކުޑަކޮށްފަ އެވެ. އެކަމަކު، މެޗުގެ 19 ވަަނަ މިނިޓްގައި ޝިކް ވަނީ އިތުރު ގޯލެއް ޖަހައި، ލެވަކޫސަންގެ ލީޑުފުޅާކޮށްދީފަ އެވެ.

ޑޯޓްމަންޑުން ދެން ޖެހި ގޯލު 79 ވަަނަ މިނިޓްގައި ކާމިޔާބުުކުރީ ސޭހޫ ގިރާސީ އެވެ. ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް ޑޯޓްމަންޑަށް އިތުރު ގޯލެއް ޖަހައި، އެއްވަރުކުރެވޭގޮތްނުވެ އެވެ. މިއީ، މި ފަހަރުގެ ލީގުގައި ޑޯޓްމަންޑް ބަލިވި ފަސް ވަނަ މެޗެވެ.