ލަންޑަން (ޑިސެމްބަރު 27) - އިނގިރޭސި ޕްރިމިއާ ލީގުގައި މިރޭ ޗެލްސީ 2-1 އިން ފުލަމް އަތުން ބަލިވުމުގެ ފައިދާނަގައި ލިވަޕޫލުން ފަހަތުން އަރައި 3-1 އިން ލެސްޓާ ސިޓީ ބަލިކޮށް ލީގުގެ އެއް ވަނައިގައި ހަތް ޕޮއިންޓަށް ލީޑުފުޅާކޮށްފި އެވެ.

ލިވަޕޫލް އެއް ވަނައިގައި އޮތީ 17 މެޗުން 42 ޕޮއިންޓާ އެކު އެވެ. ދެ ވަނައިގައި އޮތް ޗެލްސީ އަށް ވަނީ 18 މެޗުން 35 ޕޮއިންްޓް ލިބިފަ އެވެ. ތިން ވަނައިގައި އޮތީ މިރޭ އަމިއްލަ ދަނޑުގައި ޓޮޓެންހަމް ހޮޓްސްޕާސް އަތުން 1-0 އިން މޮޅުވި، ނޮޓިންހަމް ފޮރެސްޓް އެވެ. ފޮރެސްޓަށް ވަނީ 18 މެޗުން 34 ޕޮއިންޓް ލިބިފަ އެވެ. ހަތަރެއްގައި އޮތް އާސެނަލަށް 17 މެޗުން 33 ޕޮއިންޓް ލިބިފައިވާއިރު، އެ ޓީމުން މާދަމާރޭ އިޕްސްވިޗް ޓައުން ބަލިކޮށްފިނަމަ ދެ ވަނަ އަށް އެރޭނެ އެވެ.

ނިއުކާސަލް ޔުނައިޓެޑުން ވަނީ އެސްޓަން ވިލާ އަތުން 3-0 އިން މޮޅުވެ، 18 މެޗުން 29 ޕޮއިންޓް ހޯދައި ފަސް ވަނަ އަށް ޖެހިލައިފަ އެވެ.

އަމިއްލަ ދަނޑުގައި ޗެލްސީން ލީޑުނެގީ ފުރަތަމަ ހާފުގައި ކޯލް ޕާމާ ޖެހި ގޯލުންނެވެ. މެޗުގެ 82 ވަނަ މިނިޓާ ހަމައަށް ޗެލްސީ ލީޑުގައި އޮތްއިރު، ފުލަމް އިން މޮޅުވީ ބަދަލަކަށް ކުޅެން އެރި ދެ ކުޅުންތެރިން ޖެހި ގޯލުތަކުންނެވެ. އެ ގޮތުން، 82 ވަނަ މިނިޓްގައި ހެރީ ވިލްސަން ބޮލުން ގޯލެއް ޖަހައި އެއްވަރުކުރިއިރު، އިތުރު ވަގުތުގައި ރޮޑްރީގޯ މުނީޒް ޖެހި ގޯލާ އެކު، ފުލަމް އިން ވަނީ 45 އަހަރު ތެރޭ ފުރަތަމަ ފަހަރަށް ޗެލްސީ ދަނޑުގައި މޮޅުވެފަ އެވެ.

ހަ ވަަަނަ މިނިޓްގައި ޖޯޑަން އަޔޫ ޖެހި ގޯލުން ލެސްޓާ އިން ލީޑުނެގިއިރު، ލިވަޕޫލުން އެއްވަރުކުރީ ފުރަތަމަ ހާފުގެ އިތުރު ވަގުތުގައި ކޯޑީ ގަކްޕޯ ޖެހި ގޯލުންނެވެ. ދެ ވަނަ ހާފުގެ ކުރީކޮޅުގައި، ކާޓިސް ޖޯންސް ލަނޑެއް ޖަހައި ލިވަޕޫލަށް ލީޑުނަގައިދިންއިރު، މި ގޯލު ބަަލައިގަތީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފަ އެވެ. އޭގެ ފަހުން، ގަކްޕޯ ޖެހި ގޯލެއް ވީއޭއާރްއިން ކެންސަލްކުރި އެވެ.

ލިވަޕޫލްގެ ފަހު ގޯލު ޖެހީ މުހައްމަދު ސަލާހު އެވެ. ފުރަތަމަ ހާފުގައި ސަލާހު ޖެހި ޝޮޓެއް ހުރަސްދަނޑިއަށް އަމާޒުވި އެވެ.

ސިޓީ އެއްވަރު، ޔުނައިޓެޑް އަނެއްކާ ވެސް ބަލި

ލީގުގެ އެންމެ ފަހުގެ ޗެމްޕިއަން، މެންޗެސްޓާ ސިޓީ ކުޅުނު މެޗުން ވަނީ 1-1 އިން އެވަޓަންއާ އެއްވަރުވެފަ އެވެ. މެންޗެސްޓާ ޔުނައިޓެޑް ވަނީ 2-0 އިން ވުލްވްސް ދަނޑުގައި ބަލިވެފަ އެވެ.

ސިޓީން ރޭ ކުޅުނު މެޗުގައި ބެނާޑޯ ސިލްވާގެ ގޯލުން ލީޑުނެގިއިރު، މާ ލަސްތަކެއްނުވެ، އިލިމަން އެންޑިއާޔޭ ވަނީ ގޯލެއް ޖަހައި އެވަޓަން އަށް އެއްވަރުކޮށްދީފަ އެވެ.

ދެ ވަނަ ހާފުގައި ސިޓީ އަށް އަލުން ލީޑުނަގައިދޭން އާލިން ބްރައުޓް ހާލަންޑް ފޮނުވާލި ޕެނަލްޓީ އެވަޓަންގެ ކީޕަރު ޖޯޑަން ޕިކްފޯޑް ވަނީ މަތަކޮށްފަ އެވެ. މި މެޗުން ލިބުނު ޕޮއިންޓާ އެކު ސިޓީ ލީގުގެ ހަތް ވަނައިގައި އޮތީ 18 މެޗުން 28 ޕޮއިންޓާ އެކު އެވެ.

ޔުނައިޓެޑަށް މައްސަލަ ދިމާވީ ދެ ވަނަ ހާފު ފެށުނުތަނާ އެ ޓީމުގެ ކެޕްޓަން، ބްރޫނޯ ފެނާންޑޭސް އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކުމުންނެވެ. މިއީ މި ސީޒަނުގައި ފެނާންޑޭސް އަށް ދެއްކި ތިން ވަނަ ރަތް ކާޑެވެ.

ފެނާންޑޭސް އަށް ރަތެއް ދެއްކިތާ އިރުކޮޅެއް ނުވެ، މަތެއުސް ކޫންޏާ ވަނީ ކޯނަރަކުން ގޯލެއް ޖަހައި، ވުލްވްސް އަށް ލީޑުނަގައިދީފަ އެވެ. އަދި އިތުރު ވަގުތުގައި ކޫންޏާ ހުސްކޮށްލާފައި ދިން ބޯޅައަކުން ހްވާން ހީ ޗާން ވަނީ ގޯލެއް ޖަހައި، ވުލްވްސް އަށް އާ ކޯޗު ޕެެރެއިރާއާ އެކު ދެ ވަނަ މެޗުން މޮޅުކޮށްދީފަ އެވެ.

ޔުނައިޓެޑް މި ވަގުތު ލީގުގެ 14 ވަނައިގައި އޮތީ، 18 މެޗުން 22 ޕޮއިންޓާ އެކު އެވެ.