ނިއު ދިއްލީ، އިންޑިއާ (ޑިސެމްބަރު 25) - ޕާކިސްތާންގައި ބާއްވަން ތާވަލުކޮށްފައި އޮތް ޗެމްޕިއަންސް ޓްރޮފީ ކްރިކެޓް މުބާރާތުގައި، އިންޑިއާގެ މެޗުތައް ދުބާއީގައި ކުޅޭ ގޮތަށް ހަމަޖައްސައި، އިންޓަނޭޝަނަލް ކްރިކެޓް ކައުންސިލް (އައިސީސީ) އިން ނިންމައިފި އެވެ.

ފެބްރުއަރީ 19 އިން މާޗް 9 ވަނަ ދުވަހުގެ ނިޔަލަށް ކުރިއަށްދާ ޗެމްޕިއަންސް ޓްރޮފީ މުބާރާތުގައި ގުރުއަތުލުން ކުރިއަށްދިޔައިރު، އިންޑިއާ އާއި ޕާކިސްތާން ލައްވާލީ ނިއު ޒީލެންޑާއި ބަންގްލަދޭޝާ އެކު ގްރޫޕް އޭގަ އެވެ.

މި ގްރޫޕްގައި، ޕާކިސްތާން އާއި އިންޑިއާ ކުޅޭ މެޗު ތާވަލުކޮށްފައިވަނީ، ފެބްރުއަރީ 23 ގައި ދުބާއީގައި ކުޅޭ ގޮތަށެވެ. އެއީ، މި ވަގުތަށް ބަލާއިރު، ދުބާއީގައި ޕާކިސްތާނުން ކުޅޭނެ ހަމައެކަނި މެޗެވެ. އެކަމަކު، ފައިނަލުގައި އިންޑިއާ އާއި ޕާކިސްތާން ކުޅެން ޖެހިއްޖެނަމަ، ފައިނަލު އޮންނާނީ ދުބާއީގަ އެެވެ. އިންޑިއާ ފައިނަލަށް ނުދާނަމަ މެޗު ކުޅޭނީ ލާހޯރުގަ އެވެ.

އިންޑިއާ އިން ސަލާމަތީ ސަބަބުތަކާ ހުރެ ޕާކިސްތާނުގައި މެޗެއް ނުކުޅޭތާ 18 އަހަރު ވަނީ ވެފަ އެވެ. އިންޑިއާ އިން ޕާކިސްތާނަށް ގޮސް އެންމެ ފަހުން މެޗެއް ކުޅުނީ 2008 ވަނަ އަހަރު އެވެ.

މިދިޔަ 16 އަހަރު ތެރޭގައި، ޕާކިސްތާނުން ވަނީ އިންޑިއާގައި ތިން ފަހަރެއްގެ މަތިން ކުޅެފަ އެވެ. އެއީ، 2012، 2013 ގައި ކުޅުނު ބައިލެޓްރަލް ސީރީސްގެ އިތުރުން، 2016 ވަނަ އަހަރު އިންޑިއާ އިން ހޯސްޓްކުރި ޓީ20 ވޯލްޑް ކަޕާއި، މިދިޔަ އަހަރު އިންޑިއާ އިން ބޭއްވި ވަންޑޭއިންޓަނޭޝަނަލް (އޯޑީއައި) ވޯލްޑް ކަޕަށެވެ. މިދިޔަ އަހަރު ޕާކިސްތާނުން އޭޝިއާ ކަޕް ހޯސްޓްކުރިއިރު، އިންޑިއާގެ މެޗުތައް ކުޅެފައިވަނީ ސްރީ ލަންކާގަ އެވެ.

ޗެމްޕިއަންސް ޓްރޮފީ މުބާރާތަކީ، 1996 ވަނަ އަހަރުގެ ފަހުން، ޕާކިސތާންގައި ހޯސްޓްކުރެވޭ ބައިނަލްއަގުވާމީ ބޮޑު ކްރިކެޓް މުބާރާތެވެ. އަންނަ އަހަރުގެ ޗެމްޕިއަންސް ޓްރޮފީގެ ގްރޫޕް ބީގައި ހިމެނެނީ، އިންގްލެންޑް، އޮސްޓްރޭލިއާ، އަފްގާނިސްތާން އަދި ދެކުނު އެފްރިކާ އެވެ.