ބާސެލޯނާ (ޑިސެމްބަރު 17) - އަނިޔާގެ ސަބަބުން ބާސެލޯނާ އަށް ކުޅެމުން އަންނަ ޒުވާން ފޯވާޑް ލަމީން ޔަމާލް އަށް މި އަހަރުގެ ބާކީ ބައިގައި ނުކުޅެވޭނެ ކަމަށް އެ ކްލަބުން ބުނެފި އެވެ.

ޔަމާލް، 17، ގެ ފިޓްނަސް އަށް މިދިޔަ ދެ މަހެއްހާ ދުވަހު އަސަރުކޮށްފައިވާއިރު، އެންމެ ފަހުން ކުޅުނު މެޗަށް ފަހު، ލިގަމެންޓަށް ވަނީ އަނިޔާވެފަ އެވެ. މި ސީޒަނުގައި ޔަމާލްގެ ކުޑަހުޅަށް ލިބުނު އަނިޔާއަކާ ހެދި ގިނަ މެޗުތަކެއް ވެސް ވަނީ ގެއްލިފަ އެވެ.

އެެންމެ ފަހުން ލިގަމެންޓަށް ލިބުނު އަނިޔާއާ ހެދި ޔަމާލަށް މުއްދަތެއް ކުޅުމާ ދުރުގައި ހޭދަކުރަން ޖެހޭނެ ކަމަށް ބާސެލޯނާ އިން ވަނީ ބުނެފަ އެވެ.

ސްޕެއިނުގެ މީޑިއާތަކުން ބާސެލޯނާއާ ހަވާލާދީ ރިޕޯޓްކޮށްފައިވާ ގޮތުގައި، ޔަމާލް، އެންމެ އަވަހަށް ވެސް ކުޅުމަށް އެނބުރި އަންނާނީ ތިނެއް ނޫނީ ހަތަރު ހަފްތާ ފަހުންނެވެ.

ބާސެލޯނާގެ ފޯމަށް ވެސް ވަރަށް ބޮޑަށް އަސަރުކޮށްފައިވާ މި ދަނޑިވަޅުގައި ޔަމާލް ނުލައި މުހިންމު މެޗުތަކެއް ކުޅެން ޖެހުމަކީ އެ ޓީމަށް އޭގެ އަސަރުކުރާނެ ކަމެކެވެ.

މި ސީޒަނުގައި މިހާތަނަށް ޔަމާލް ވަނީ ބާސެލޯނާ އަށް 21 މެޗު ކުޅެދީފަ އެވެ. އެ މެޗުތަކުގައި ޔަމާލް ވަނީ އެ ޓީމަށް ހަ ގޯލު ޖަހައިދީފަ އެވެ. އަދި، އެ މެޗުތަކުގައި ބާސެލޯނާގެ 12 ގޯލެއް ޖަހަން ފުރުސަތު ތަަނަސްކޮށްދީފައިވަނީ ވެސް ޔަމާލް އެވެ.