ހައުސިން، އިންފްރާސްޓްރަކްޗާ އަދި އެންވަރަމެންޓް މިނިސްޓްރީ އަނދާ އަޅިއަށްވި އަލިފާނުގެ ތުހުމަތު އިދިކޮޅު އެމްޑީޕީއަށް ކޮށް، ސަރުކާރަށް ތާއީދު ކުރާ މީހުން ނަފުރަތު އުފައްދަން ފަށައިފި އެވެ.

އެމްޑީޕީއަށް ތުހުމަތުގެ އިނގިލި ދިއްކޮށް ނަފުރަތު އުފައްދާ މީހުންގެ ތެރޭގައި ސަރުކާރަށް ތާއީދުކުރާ މީހުންނާއި ސަރުކާރުގެ އިސް މަގާމުތަކުގައި ތިއްބެވި ބޭފުޅުން ވެސް ހިމެނެ އެވެ.

މިނިސްޓްރީ އޮފް ސިޓީސްގެ ސީނިއާ ޕޮލިޓިކަލް ޑިރެކްޓަރު، އަހުމަދު ރާޝިދު ކޮށްފައިވާ ޕޯސްޓެއް

މިއަދުގެ އަލިފާނާ ގުޅިގެން ހޯމްލޭންޑް މިނިސްޓްރީގެ ސްޓޭޓް މިނިސްޓަރު، އަހުމަދު ސިއްދީގު އެކްސްގައި ކުރެއްވި ޕޯސްޓެއްގައި ވަނީ ހައުސިން މިނިސްޓްރީގައި ރޯވީތޯ ނުވަތަ ރޯކޮށްލީތޯ ސުވާލު އުފައްދައިފަ އެވެ.

ސިއްދީގު ކުރެއްވި ޕޯސްޓުގައި ވިދާޅުވީ ކުރީގެ ރައީސް އިބްރާހިމް މުހައްމަދު ސޯލިހުގެ މައްސަލަތަކެއް ބަލަން މަޖިލީހުން ފާސްކުރުމުން ދައުލަތުގެ ބައެއް ލިޔެކިޔުންތައް ހުރި ތަންތަނުގައި އަލިފާން ރޯވުން އެއީ އިއްތިފާގެއްތޯ ސުވާލު އުފެދޭ ކަމަށެވެ.

"ހައުސިން މިނިސްޓްރީގައި ރޯވީތޯ؟ ރޯކޮށްލީތޯ؟" ސިއްދީގުގެ ޕޯސްޓުގައި ލިޔުއްވާފައިވެ އެވެ.

"މާލޭގެ ބިންތަކާއި ފްލެޓުތަކަށް ރައީސް އިބްރާހިމް އާއި އޭނާގެ އެކުވެރިން ގާނޫނާ ހިލާފަށް ހިތުހުރި ގޮތެއް ހަދައި، އެކުވެރިންނަށް ބަހާލާފައިވާ މައްސަލަ ބަލަން ފާސްކުރުމުން އެކަމާ ގުޅުންހުރި ލިޔެކިޔުންތައް ހުރި ތަންތަނުގައި ރޯވަނީތޯ؟،"

މިއަދުގެ އަލިފާނާ ގުޅިގެން މިނިސްޓްރީ އޮފް ސިޓީސްގެ ސީނިއާ ޕޮލިޓިކަލް ޑިރެކްޓަރު، އަހުމަދު ރާޝިދު އެކްސްގައި ކުރި ޕޯސްޓެއްގައި ބުނީ އެމްޑީޕީން އަބަދު ވެސް ގެންގުޅެނީ ގައުމާއި ރައްޔިތުންނަށް އެކި ގޮތްގޮތުން އަނިޔާވެރިވުމުގެ ވިސްނުން ކަމަށެވެ.

"ވެރިކަން ގެއްލުނީމަ ހުޅު، ވެރިކަމުގެ ތިބިއްޔާ ހަޒާނާ ހުސްކުރުން،" ރާޝިދުގެ ޕޯސްޓުގައި ލިޔެފައިވެ އެވެ.

ޔޫތު މިނިސްޓްރީގެ ކުރީގެ ޑެޕިއުޓީ މިނިސްޓަރު، މަރިޔަމް ޝިއުނާ ކުރި ޕޯސްޓެއްގައި ވަނީ އެމްޑީޕީން ގައުމު އަންދަމުންދާ ކަމަށް ބުނެ، އެ މީހުންނަކީ ޓެރަރިސްޓުންގެ ގޮތުގައި ވެސް ސިފަކޮށްފަ އެވެ.

"އިބޫ ސޯލިހު އާއި ފައްޔާޒު އިސްމާއިލްގެ މައްސަލަ ބަލަން ބުނިތާ 24 ގަޑިއިރު ނުވޭ ބޮޑުހުޅު ޕާޓީ ނުކުމެ ގައުމު އަންދަނީ، ހުރިހާ ޓެރަރިސްޓުން ހައްޔަ ކުރޭ،" ޝިއުނާ ކުރި ޕޯސްޓުގައި ބުންޏެވެ.

އޭގެ ފަހުން ޝިއުނާ ކުރި ޕޯސްޓެއްގައި ބުނެފައި ވަނީ އެމްޑީޕީއަކީ ސަރުކާރު އިދާރާތަކުގައި ބޮޑުހުޅު ޖެހުމުގެ މާޒީއެއް އޮތް ޕާޓީއެއް ކަމަށެވެ.

ސަރުކާރަށް ތާއީދުކުރާ މީހުން އަލިފާނުގެ ތުހުމަތު އެމްޑީޕީއަށް އަމާޒުކުރި ނަމަވެސް ތިން މިނިސްޓްރީގައި އަލިފާން ރޯވާން މެދުވެރިވި ސަބަބެއް އަދި ފުލުހުން ވެސް ސިފައިން ވެސް ހާމަކޮށްފައެއް ނުވެ އެވެ.