ޒިއުރިކް (ޑިސެމްބަރު 11) - ވިމެންސް ޓެނިސް އެސޯސިއޭޝަން (ޑަބްލިއުޓީއޭ) އިން ހޮވި އަހަރުގެ އެންމެ މޮޅު ޓެނިސް ކުޅުންތެރިޔާގެ މަގާމު ބެލަރޫސްގެ އަރީނާ ސަބަލެންކާ އަށް ލިބިއްޖެ އެވެ.

ސަބަލެންކާ، 26، ވަނީ އަަހަރުގެ އެންމެ ފުރަތަމަ ގްރޭންޑް ސްލޭމް ޓެނިސް މުބާރާތް ކަަމަށްވާ އޮސްޓްރޭލިއަން އޯޕަން ތަށްޓާއި އަހަރުގެ އެންމެ ފަހު ގްރޭންޑް ސްލޭމް މުބާރާތް ކަމަށްވާ ޔޫއެސް އޯޕަން މުބާރާތް ކާމިޔާބުކޮށްފަ އެވެ.

މީގެ އިތުރުން، ޑަބްލިއުޓީއޭ 1000 ގެ އިވެންޓްތަކުގެ ތެރެއިން، ސިންސިނާޓީ އޯޕަން އާއި ވުހާން އޯޕަން ވެސް ކާމިޔާބުކުރި އެވެ. ސަބަލެންކާ އަކީ ވުހާން އޯޕަން ތަށި ތިން ފަހަރު ހޯދި ހަމައެކަނި ކުޅުންތެރިޔާ އެވެ.

ކާމިޔާބު އަހަރެއް ނިންމާލި ސަބަލެންކާ ވަނީ އޮކްޓޫބަރު މަހު ދުނިޔޭގެ ރޭންކިންގެ އެއް ވަަނަ އަށް ޖެހިލައިފަ އެެވެ. އެއީ، 11 މަސް ދުވަސް ވަންދެން، އެއް ވަަނައިގައި އޮތް އީގާ ސްވިއަޓެކް ފަހަތަށް ޖައްސާލުމަށް ފަހު އެވެ.

ސަބަލެންކާގެ މި ކާމިޔާބީ ހާއްސަވާ ސަބަބަކީ، މި އަހަރު އަނިޔާ އާއި ސިއްހީ ހާލަތު ތަންނުދޭތީ އޭނާ އަށް މުހިންމު މުބާރާތްތަކެއް ގެއްލުނު ނަމަވެސް، ވާދަކުރި މުބާރާތްތަކުގައި ތަފާތު ދައްކާފައިވާތީ އެވެ. އެ ގޮތުން، ސަބަލެންކާ އަށް ވަނީ އަނިޔާއާ ހެދި ވިމްބަލްޑަން މުބާރާތް ގެއްލިފަ އެވެ. އަދި ސިއްހީ ހާލަތު ތަންނުދޭތީ، ސަބަލެންކާ އަށް އޮލިމްޕިކްސްގައި ވެސް ވާދަނުކުރެވުނެވެ.

މިދިޔަ ދެ އަހަރު ސްވިއަޓެކަށް ޑަބްލިއުޓީއޭ އިން ހޮވި މޮޅު ކުޅުންތެރިޔާގެ މަގާމު ލިބުނުއިރު، ސަބަލެންކާ މި އަހަރު އެ މަގާމު ހޯދީ ކުޅުނު މެޗުތަކުގެ ތެރެއިން 56 މެޗުން މޮޅުވެގެންނެވެ. ސަބަލެންކާ މި އަހަރު ބަލިވީ 14 މެޗުންނެވެ.