ލަންޑަން (ޑިސެމްބަރު 7) - މެންޗެސްޓާ ސިޓީގެ ކޯޗު ޕެޕް ގާޑިއޯލާ ހަ ފަހަރު އިނގިރޭސި ޕްރިމިއާ ލީގުގެ ޗެމްޕިއަންކަން ހޯދާފައިވާ ކަމަށް ބުނެ، ދެއްކި ވާހަކައާ ގުޅިގެން ހޯސޭ މޮރީނީއޯ ރައްދުދީފި އެވެ.

ލީގުގައި ލިވަޕޫލް އަތުންް ދާދި ފަހުން ސިޓީ ބަލިވި މެޗުގައި، އެ ޓީމުގެ ކޯޗުކަމުން ގާޑިއޯލާ ވަކިކުރާނެ ކަމަށް ބުނެ، ލިވަޕޫލް ސަޕޯޓަރުން އަޑުގަދަކުރުމުން އެ އަށް ރައްދުދޭން ގާޑިއޯލާ ވަނީ އިނގިލީގެ އިޝާރާތުން ހައެއް ދެއްކުމަށް ފަހު، އޭނާ ހަ ޕްރިމިއާ ލީގު ތަށި ހޯދި ކަމަށް ބުނެފަ އެވެ.

މިއީ، މެންޗެސްޓާ ޔުނައިޓެޑްގެ ކޯޗުކަމުން މޮރީނިއޯ، 2018 ވަނަ އަހަރު ޑިސެމްބަރުގައި ވަކިކުރުމުގެ ކުރިން، މޮރީނިއޯ ވެސް އޭނާ އަށް އިހުތިރާމްކުރަން ޖެހޭ ކަމަށް ބުނެ، ދެއްކި ވާހަކައަކާ ގުޅުވައިގެން ނޫސްވެރިން ވަނީ ގާޑިއޯލާއާ ސުވާލުކޮށްފަ އެވެ.

"އެއީ އަހަންނަށް ވެސް ދިމާވި ގޮތެކޭ ނުބުނެވޭނެ. އޭނަ (މޮރީނިއޯ) އަށް ލިބުނީ ތިން ތަށި، އަހަންނަށް ލިބުނު ހަ ތަށި. ތަށީގެ ގޮތުން ބަލާއިރު އެއީ އަހަރެމެން ފެންނާނެ ގޮތަކީ،" ގާޑިއޯލާ ބުންޏެވެ.

މި ވަގުތު ތުުރުކީގެ ފެނަބާޗޭގެ ކޯޗަކަށް މަސައްކަތް ކުރަމުން އަންނަ މޮރީނިއޯއާ ވަނީ ގާޑިއޯލާގެ މި ޖަވާބާ ގުޅޭގޮތުން ސުވާލުކޮށްފަ އެވެ. މޮރީނިއޯ ދިން ޖަވާބުގައި ވަނީ، ސިޓީން 2009 -2018 އަށް މާލީ ގަވާއިދުތަކާ ހިލާފުވި ކަމުގެ 115 މައްސަލައިގެ ތަހުގީގާ ގުޅުވައިފަ އެވެ.

"ގާޑިއޯލާ އަހަންނާ ބެހޭގޮތުން ވާހަކައެއް ދައްކާފައި ހުރި ކަމަށް މައުލޫމާތު ލިބެނީ. އަހަންނަށް ތިން ތަށި އޭނާ އަށް ހަ ތަށި ލިބުނު ކަމަށް. އަހަރެން ކާމިޔާބު ހޯދީ އިންސާފުވެރިކަމާއި ސާފުތާހިރު ގޮތަކަށް،" މޮރީނިއޯ ބުންޏެވެ.

"އަހަރެން ބަލިވިއްޔާ އިދިކޮޅު ޓީމަށް ހުންނާނީ މަރުހަބާ ކިޔައިފައި. އެއީ އަަހަންނަށް ވުރެ މޮޅުވީމަ، އެކަމަކު، އަހަރެން މޮޅުވެފައި ހުންނާނީ 150 ވަރަކަށް ކޯޓު ކޭސްތަކަކާ ފައިޓް ކުރަމުންނެއް ނޫން،"

މޮރީނިއޯ، ޕްރިމިއާ ލީގުގައި ތިން ތަށި ހޯދާފައިވަނީ، ޗެލްސީގައި ހުރެ އެވެ. އޭނާ ވަނީ ޔުނައިޓެޑްގައި ހުރެ، 2017/2018 ވަނަ އަހަރުގެ ސީޒަނުގައި ސިޓީގެ ފަހަތުން ދެ ވަނަ ހޯދައިފަ އެވެ. އޭނާ ވަނީ ސިޓީ އަތުން އެ ތަށި އަތުލަން ނިންމައިފިނަމަ އެއީ އޭނާ އަށް އިތުރުވާނެ ތަށްޓެއް ކަމަށް ބުނެފަ އެވެ.

ގާޑިއޯލާ އާއި މޮރީނިއޯގެ ކުރިމަތިލުންތައް ވަނީ ގިނަ ފަހަރުތަކެއްގެ މަތިން ފެނިގެންގޮސްފަ އެވެ. އެއީ، މޮރީނިއޯ މީގެ ކުރިން، ޗެލްސީ، އިންޓަ މިލާން، ޔުނައިޓެޑް އަދި ޓޮޓެންހަމްއާ ހަވާލުވެހުރިއިރާއި، ގާޑިއޯލާ، މީގެ ކުރިން، ބާސެލޯނާ، ބަޔާން މިއުނިކް އަދި ސިޓީގައި ކޯޗުކޮށްދިންއިރުގައި އެކި މެޗުތަކުގަ އެވެ.