މޯލްޑިވްސް މީޑިއާ ކައުންސިލު (އެމްއެމްސީ) ގެ އިންތިހާބުގެ ދާއިމީ ވޯޓާސް ލިސްޓަށްް ފަހު ވަގުތު އެ އިންތިހާބު ބާއްވާ ޔޫތު މިނިސްޓްރީން ބަދަލު ގެނައުމުން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ކަންބޮޑުވުން ފާޅުކޮށްފި އެވެ.

އެމްޖޭއޭއިން ނެރުނު ނޫސް ބަޔާނެއްގައި ބުނީ އަންނަ ހޮނިހިރު ދުވަހު ބާއްވާ އެ އިންތިހާބަށް ކުޑަތަންވެފައި ވަނިކޮށް އެ އިންތިހާބުގެ ދާއިމީ ވޯޓާސް ލިސްޓަށް ބަދަލުތައް ގެނައުމާއި އެ އިންތިހާބާ ގުޅޭ ބައެއް އިޖުރާއަތްތައް މިނިސްޓްރީން ކުރިއަށް ގެންދާ ގޮތުން އިންތިހާބާ މެދު ސުވާލު އުފެދި ސައްހަކަން ގެއްލޭ އެތައް ބައިވަރު ކަންތައްތަކެއް ހިނގަމުންދާ ކަމަށް ގަބޫލު ކުރެވޭ ކަމަށެވެ.

އެގޮތުން ވޯޓުލާން ރަޖިސްޓްރީ ކުރި ބައެއް މީޑިއާތަކުން ވޯޓުލާން ހަމަޖައްސާފައިވާ ފަރާތްތައް ކުއްލި ގޮތަކަށް ބަދަލު ކުރަން ހުށަހަޅައިގެން ކަމަށް ބުނެ ގެޒެޓް ކޮށްފައިވާ ދާއިމީ ވޯޓާސް ލިސްޓަށް މިނިސްޓްރީން ބަދަލުތަކެއް ގެނެސްފައިވާކަން އެމްޖޭއޭއިން ފާހަގަކުރި އެވެ.

"އެމްއެމްސީގެ އިންތިހާބު ބޭއްވުމުގެ އުސޫލުގައި ދާއިމީ ވޯޓާސް ލިސްޓު އެކުލަވާލުމާ ގުޅޭ ސުންގަޑިތަކާއި އިޖުރާއަތްތަކެއް ކަނޑައެޅިފައި ވަނިކޮށް ގެޒެޓް ކޮށްފައި އޮތް ދާއިމީ ވޯޓާސް ލިސްޓަށް ބަދަލު ގެނައުމަކީ އުސޫލުގެ ރޫހާ ހިލާފު އަދި އިންތިހާބުގައި ވާދަ ކުރާ ކެންޑިޑޭޓުންގެ ހައްގުތަކަށް އުނިކަން ލިބޭނެ ކަމެއް،" އެމްޖޭއޭ އިން ބުންޏެވެ.

މީގެއިތުރުން އެމްޖޭއޭއިން ބުނީ އިންތިހާބަށް ކުރިމަތިލުމަށް ދުރާލާ އިއުލާންކޮށް އެކަމުގެ ސުންގަޑި ހަމަވެ، ކެންޑިޑޭޓުންގެ ލިސްޓާއި އިންތިހާބުގެ ތާރިހުތައް އިއުލާން ކުރި ފަހުން އިންތިހާބަށް ކުރިމަތިލާން މިނިސްޓްރީން އަލުން ހުޅުވާލުމަކީ ސުވާލު އުފެދޭ ކަމަށެވެ.

މިހާރު އިއުލާން ކޮށްފައިވާ އެމްއެމްސީގެ އިންތިހާބު ކުރިއަށް ނުގެންގޮސް ލަސް ކުރުމަށް ގޮވާލައި އެމްޖޭއޭއިން ބުނީ އިންތިހާބު އިންތިޒާމު ކުރުމަށް މީޑިއާތަކާއި މަސްލަތުވެރިން ޝާމިލުވާނެ ގޮތަށް އިންތިހާބުގެ އިންތިޒާމު ކޮމިޓީއެއް ނަގައިގެން ދެފުށް ފެންނަ ގޮތެއްގައި ކުރިއަށް ގެންދިޔުމަށެވެ.

މޯލްޑިވްސް މީޑިއާ ކައުންސިލް (އެމްއެމްސީ) 10 މެންބަރުންގެ ދައުރު ޑިސެމްބަރު 14، ގައި ހަމަވާތީ ބާއްވާ އެ އިންތިހާބުގައި މީޑިއާތަކުން ވޯޓުލާ މީހުންގެ ދާއިމީ ލިސްޓު އާންމު ކުރީ ނޮވެމްބަރު 14، ގަ އެވެ.

ނަމަވެސް އެ ލިސްޓަށް ވެސް ބަދަލުތަކެއް ގެނައުމަށް ފަހު ހޮނިހިރު ދުވަހު ބާއްވާ އިންތިހާބުގެ ވޯޓުލާ މީހުންގެ އާ ލިސްޓު އާންމުކުރިއިރު، ބައެއް މީޑިއާތަކުން ވޯޓުލާ މީހުންތައް ވަނީ ބަދަލުވެފަ އެވެ.

މީޑިއާ ކައުންސިލުގެ ދައުރަކީ މީލާދީ ގޮތުން ދެ އަަހަރެވެ. އަދި, ކައުންސިލުކަމުގައި ދެ ދައުރު ޖެހިޖެހިގެން އެއް މެންބަރަކަށް އަދައެއް ނުކުރެވޭނެ އެވެ. މީޑިއާ ކައުންސިލްގެ މެމްބަރުންގެ އަދަދަކީ 15 އެވެ.