ބޭރު ފައިސާގެ އާމްދަނީ އިތުރުކުރަން އަޅާފައިވާ ފިޔަވަޅުތަކާއެކީ، ކުރު ރާސްތާގައި ބޭރު ފައިސާގެ ރިޒާވަށް ހުރި ޕްރެޝަރުތައް ކުޑަކުރެވުނު ނަމަވެސް ރާއްޖެއަށް ދިމާވެފައި އޮތް ދަތި ހާލަތުން އަރައިގަނެވެން އޮތީ ހަރަދުތައް ކުޑަކޮށްގެން ކަމަށް މޫޑީސްއިން ބުނެފި އެވެ.

މޫޑީސްއިން މިހެން ބުނީ ރާއްޖޭގެ ރޭޓިން ރިވިއުއަށް ފަހު އެ އިދާރާއިން ނެރުނު ބަޔާނުގަ އެވެ. ރިވިއުއަށް ފަހު މޫޑީސްއިން ވަނީ ރާއްޖޭގެ ސޮވަރިން ކްރެޑިޓު ރޭޓިން "ސީއޭއޭ2" ގައި ރޭޓިން ދަމަހައްޓަން ނިންމާފަ އެވެ.

މި ގޮތަށް ނިންމި ސަބަބުތަކުގެ ތެރޭގައި މި ފަހުން އިންޑިއާއާއެކީ ސޮއިކުރި ކަރަންސީ ސްވޮޕު ފެސިލިޓީތަކުން ބޭރު ފައިސާގެ ރިޒާވު ރަނގަޅު ވުމާއި، ޓޫރިޒަމް ދާއިރާއިން ލިބޭ އާމްދަނީ އިތުރުކުރަން ޓީޖީއެސްޓީ އާއި އެއާޕޯޓު ޓެކުހާއި ޑިވެލޮޕްމަންޓު ފީ ބޮޑުކުރުމުން އާމްދަނީ އިތުރުވުމާއި، އަދި ޓޫރިޒަމް ވިޔަފާރިތަކުން ޑޮލަރު މާރުކުރަން ލާޒިމުކުރުން ފާހަގަކޮށްފައި ވެ އެވެ.

މި ފިޔަވަޅުތައް އެޅުމާއެކީ ބޭރު ފައިސާގެ ތާށިކަމަށް ލުޔެއް ލިބުނު ނަމަވެސް، މުސްތަގުބަލުގައި ދައްކަން ހުރި ދަރަނީގެ އަދަދަށް ބަލާއިރު، ހަރަދުތައް ކުޑަކުރަން އަޅާ ފިޔަވަޅުތައް ތަންފީޒުނުކޮށްފި ހާލަތެއްގައި އާމްދަނީ އިތުރުކުރުމުގެ ހެޔޮ އަސަރު ނުފެންނާނެ ކަމަށް މޫޑީސްގެ ބަޔާނުން ފާހަގަވެ އެވެ.

އެއް ކަމެއްގެ ގޮތުގައި ފާހަގަކުރީ އަންނަ އަހަރުގެ ބަޖެޓުގައި ޕީއެސްއައިޕީ ނޫނީ ތަރައްގީގެ މަޝްރޫއުތަކަށް ބަޖެޓުކޮށްފައިވާ އަދަދު ބޮޑުވުމެވެ.

ޕީއެސްއައިޕީ ހޭދައިގެ ބޮޑު ބަޔަކީ ކެޕިޓަލް ހަރަދުތަކަށް ވުމުން، މިއާ އެކީ އިމްޕޯޓަށް ކުރާ ހަރަދު ބޮޑު ވާނެ ކަން މޫޑީސްއިން ފާހަގަކޮށްފައި ވެ އެވެ. އޭގެ ސަބަބުން ކުރިއަށް އޮތް ދެ އަހަރުގެ ތެރޭގައި ވެސް ކަރަންޓު އެކައުންޓު ޑެފިސިޓު ބޮޑުވެ، މި ޑެފިސިޓު ހުންނާނީ ޖީޑީޕީގެ 13 ޕަސެންޓާ 15 ޕަސެންޓާ ދޭތެރޭގެ މިންވަރެއްގައި ކަަމަށް އެ އިދާރާއިން ލަފާކުރެ އެވެ.

ދެވަނަ ކަމެއްގެ ގޮތުގައި މޫޑީސްއިން ފާހަގަކޮށްފައި އޮތީ ހަރަދު ކުޑަކުރަން ރާވާފައިވާ އިސްލާހުތަކެވެ. މި އިސްލާހުތައް ތައާރަފުކުރެވިފައިވީ ނަމަވެސް، ހަރަދު ކުޑަކުރުމުގެ ނަތީޖާ ހާސިލު ވާނީ އެކަންކަން ތަންފީޒުކުރެވޭ މިންވަރުގެ މައްޗަށް ކަމަށް މޫޑީސްގެ ބަޔާނުގައި ވެ އެވެ. މިއާ ވިއްދައި އެ އިދާރާއިން ވަނީ މިހާރު ހުރި ޕްރެޝަރުތައް ކުޑަކުރަން އެކަށީގެންވާ ވަގުތުގައި ތަންފީޒުކުރެވޭނެ ކަމުގެ ޔަގީންކަމެއް ނެތް ކަމަށް ބުނެފަ އެވެ.

ހަރަދުތައް ކުޑަކުރެވިދާނެ ކަމާ މެދު މޫޑީސްއިން ސުވާލުއުފައްދާފައިވާ އިރު، ހަރަދު ކުޑަކުރަން ރޭވި ސިޔާސަތުތަކުގެ ތެރޭގައި ހިމެނޭ ޕެންޝަން ރިފޯމްގެ ދަށުން ގެނައި ބަދަލެއް ވެސް ތަންފީޒުނުކުރަން މިފަހުން ނިންމާފައިވާ ކަމެވެ. އެއީ އަލަށް ރިޓަޔާކުރާ މީހުންނަށް ދައުލަތުގެ ބަޖެޓުން މަހުން މަހަށް ދޭ ޕެންޝަން އެލަވަންސެވެ.

މިކަން ކުރަން އަންގައި ފިނޭންސް މިނިސްޓްރީން ސާކިއުލާއެއް ފޮނުވިތާ ގިނަ ދުވަސްތަކެއް ނުވަނީސް، ރައީސް ޑރ. މުހައްމަދު މުއިއްޒު ވަނީ އެ ސާކިއުލާއަށް އަނބުރާ ގެންނަން އަންގަވާފަ އެވެ. މިކަން ކުރީ އެ ކަމާ މެދު ހުރި "ކަންބޮޑުވުންތަކަށް ރިއާޔަތްކޮށް" ކަމަށް ރައީސް އޮފީހުން ބުނެފައި ވެ އެވެ.