މާލެ ސިޓީ ކައުންސިލުން ހަރަދު ކޮށްގެން ތަރައްގީ ކުރި ބުޅާތަކަށް ހާއްސަ "އޮޅު ހިޔާ" ކައުންސިލް އަތުން އަތުލައި, އެގްރިކަލްޗާ މިނިސްޓްރީއާ ހަވާލު ކުރުމަށް ކެބިނެޓުން މިއަދު ނިންމައިފި އެވެ.

މާލެ ސިޓީގެ މޭޔަރު އާދަމް އާޒިމް "އަދަދު" އަށް ވިދާޅުވީ އޮޅު ހިޔާއަށް މާލޭ މަގުމަތީގައި އުޅޭ ބުޅާތައް މިއަދު ގެންދަން އުޅެނިކޮށް އެކަން ހުއްޓުވައި، އޮޅު ހިޔާ ކައުންސިލުން އަތުލަން ކެބިނެޓުން ނިންމި ކަމުގެ ސިޓީއެއް ދީފައިވާ ކަމަށެވެ.

"އެތަން ނިންމާފައި ބުޅާތައް ގެންދަން އުޅެނިކޮށް އެކަން ވަނީ ހުއްޓުވައި އެތަން އެ އަތުލީ. ހުރިހާ ހަރަދެއް ކުރީ ކައުންސިލުން. އެގްރިކަލްޗާ މިނިސްޓްރީގެ ދަށަށް އެތަން ބަދަލު ކުރަން ވަޒީރުންގެ މަޖިލީހުން ނިންމި ކަމުގެ ސިޓީއެއް ވެސް މިއަދު ވަނީ ލިބިފައި،" އާޒިމް ވިދާޅުވި އެވެ.

އެ ސިޓީއާ މެދު ގޮތެއް ނިންމުމަށް މާދަމާ އޮންނަ ކައުންސިލު ބައްދަލުވުމަށް އެކަން ހުށަހަޅާނެކަން ފާހަގަ ކުރައްވާ އާޒިމް ވިދާޅުވީ އެތަން އަތުލުމަކީ ސަރުކާރުން ޖެއްސުން ކުރުމުގެ ނިޔަތުގައި ކުރި ކަމެއް ކަމަށެވެ. ނަމަވެސް އާޒިމް ވިދާޅުވީ އުންމީދަކީ މާލޭގައި އޮތް ބުޅަލުގެ މައްސަލަ ހައްލު ކުރުމަށް ސިޓީ ކައުންސިލުން ކުރަމުންދިޔަ މަސައްކަތް ސަރުކާރުން ރަނގަޅަށް ކޮށްދިނުން ކަމަށެވެ.

"ސަރުކާރުން ޖެއްސުން ކުރަންޏާ ކަންތައްތަކެއް ނުވާނެ. ކައުންސިލުން މަސައްކަތްކޮށް ހުރިހާ ކަމެއް ނިންމުމުން އެތަން އަތުލީމަ ކަންތައްތަކެއް ނުކުރެވޭނެ. ޖެއްސުމެއް ގޮތަށް ދެކެނީ،" އާޒިމް ވިދާޅުވި އެވެ.

އާޒިމް ވިދާޅުވީ އެގްރިކަލްޗާ މިނިސްޓްރީ އާއި ސިޓީ ކައުންސިލްއާ ދެމެދު އޮޅު ހިޔާ ހިންގަން ހަދާފައިވާ އެމްއޯޔޫއާ ގުޅިގެން މަޝްވަރާ ކުރުމަށް މާދަމާ ގަޑިއެއް ދީފައިވާ ކަމަށެވެ.

ހުޅުމާލެ ފޭސް 2 ގައި އޮޅު ހިޔާ ތަރައްގީ ކުރީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މާލެ ސިޓީ ކައުންސިލަށް ދޫކުރި 5،000 އަކަ ފޫޓުގެ ބިމެއްގަ އެވެ. އޮޅު ހިޔާ ތަރައްގީކޮށް ނިމުނު މަހުގެ ކުރީކޮޅެވެ. މިހާރު އެތަނުން އަންނަނީ ބުޅަލަށް ބޭނުންވާ އެކި ކަހަލަ ހިދުމަތްތައް ވެސް ދެމުންނެވެ.

އޮޅު ހިޔާ އަތުލިއިރު، އެނިމަލް ވެލްފެއާ މިނިސްޓްރީން މިއަދު ނެރުނު ބަޔާނެއްގައި ވަނީ އެތަނުގެ ބައެއް ކަންކަން ފުރިހަމަ ނުވާ ކަމަށް ބުނެ، އެ ތަނަށް ބުޅާ ގެންދިޔުން ހުއްޓާލަން އަންގައި ބަޔާނެއް ނެރެފަ އެވެ.