ރާއްޖެއަށް ދިމާވެފައި އޮތް އެންމެ ބޮޑު މައްސަލައަކީ ލިބޭ އާމްދަނީއަށް ވުރެ ގިނައިން ސަރުކާރު ހިންގަން ހަރަދު ކުރަން ޖެހުން ކަމަށާއި ލިބޭ އާމްދަނީއާ ނުބައްދަލު ހަރަދުތައް މިހާރު ވެސް އެބަހުރި ކަމަށް ފިނޭންސް މިނިސްޓަރު، މޫސާ ޒަމީރު ވިދާޅުވެއްޖެ އެވެ.

މަޖިލިސް މެންބަރުން ކުރެއްވި ސުވާލުތަކަށް ޖަވާބު ދެއްވަމުން ޒަމީރު މިއަދު ވިދާޅުވީ ދައުލަތަށް ލިބޭ އާމްދަނީއާ ނުބައްދަލުވާ ވަރަށް ކުރަންޖެހޭ ހަރަދުތައް އެބަހުރި ކަމަށެވެ.

"ތި ވިދާޅުވިހެން ރާއްޖެއަށް ދިމާވެފައި އޮތް އެންމެ ބޮޑު މައްސަލައަކީ ރިކަރެންޓު ހަރަދު ބޮޑުވުމުގެ މައްސަލަ، އަޅުގަނޑުމެންނަށް ލިބޭ ރިވެނިއުއާ މިސްމެޗުވާ ވަރަށް އެބަ ހަރަދުތައް އެބަހުރި،" ޒަމީރު ވިދާޅުވި އެވެ.

ނަމަވެސް އެކަންކަން ހައްލު ކުރުމަށްޓަކައި ކެބިނެޓުގެ ލަފަޔާއި އިރުޝާދުގެ ދަށުން އެކުލަވައިލި ރިފޯމް އެޖެންޑާއާ އެއްގޮތަށް އަމަލު ކުރަމުންދާ ކަމަށް ޒަމީރު ވިދާޅުވި އެވެ.

"އަޅުގަނޑުމެން މިހާރު އެބަހުރި ވަރަށް ގިނަ ހަރުދަނާ ފިޔަވަޅުތަކެއް އަޅަމުން އެބަ ގެންދަން، މިފަހަރު ބަޖެޓު ހުށަހެޅިއިރު، އަޅުގަނޑުމެން އޮންނާނެ ހުށަހަޅާފައި ވަޒީރުންގެ މަޖިލީހުގެ ލަފަޔާ އެއްކޮށް ރިފޯމް އެޖެންޑާއެއް،" ޒަމީރު ވިދާޅުވި އެވެ.

އެ ރިފޯމު އެޖެންޑާގެ ދަށުން ސަރުކާރު ހިންގުމަށް ކުރާ ހަރަދުތައް ކުޑަ ކުރުމުގެ އިތުރުން، ސަރުކާރު ހިއްސާވާ ކުންފުނިތަކުން ކުރާ ހަރަދުތައް ވެސް ކުޑަ ކުރަން ނިންމާފައިވާ ކަމަށް ޒަމީރު ވިދާޅުވި އެވެ.