ދައުލަތުގެ މުއައްސަސާތަކުގެ އަގު ވައްޓައިލެވޭ ގޮތަށް ޝަރީއަތަށް ސާބިތު ނުވާ ކަންކަމުގެ މައްޗަށް ބިނާކޮށް މަޖިލީހުގައި ވާހަކަދައްކައިގެން ނުވާނެ ކަމަށް ބުނެ، ގަލޮޅު ދެކުނު ދާއިރާގެ މަޖިލިސް މެންބަރު މީކާއިލް ނަސީމްގެ ވާހަކައަށް މަޖިލީހުގެ ރިޔާސަތުން މިއަދު ހުރަސް އަޅައިފި އެވެ.

މީކާއިލްގެ ވާހަކައަށް މަޖިލީހުގެ ރައީސް، އަބްދުއްރަހީމް އަބްދުﷲ ހުރަސް އެޅުއްވީ ކޮޕީރައިޓާއި އެއާ ގުޅޭ އެހެނިހެން ހައްގުތަކުގެ ގާނޫނަށް އިސްލާހު ގެނައުމުގެ ބިލު އިގުތިސާދީ ކޮމިޓީން ފާސްކުރި ރިޕޯޓަށް ބަހުސް ކުރައްވަމުން، އެންސްޕާއަށް ކުރެވޭ ތުހުމަތުތަކުގެ ވާހަކަ ދެއްކެވުމުންނެވެ.

މީކާއިލް ވިދާޅުވީ ރައީސުލްޖުމްހޫރިއްޔާގެ ސިޔާސީ އެޖެންޑާ ފެތުރުމަށް ދައުލަތުގެ މުއައްސަސާތަކާއި ސަރުކާރުގެ ކުންފުނިތަކުގެ މުވައްޒަފުން ބޭނުން ކުރުމަކީ ހިޔާނާތް ކަމަށެވެ. އަދި އެކަންކަން ބަލަން ޖެހޭނެ ކަމަށް ބުނެ އޭނާ ވާހަކަދެއްކެވި އެވެ.

މީކާއިލްގެ އެ ވާހަކަތަކަށް ހުރަސް އަޅުއްވައި އަބްދުއްރަހީމް ފުރަތަމަ ވިދާޅުވީ ހީވާ ހީވުމެއްގެ މައްޗަށް ބިނާކޮށް ސޯޝަލްމީޑިއާގައި ފެތުރޭ ހަބަރުތަކުގެ ވާހަކަދައްކަން ފުރުސަތު ނާރުވާނެ ކަމަށެވެ. ނަމަވެސް އެއަށްފަހު ވެސް މީކައީލްގެ ވާހަކަ އެގޮތަށް ކުރިއަށް ގެންދެވުމުން އަބްދުއްރަހީމް ވިދާޅުވީ މަޖިލިސް މެންބަރުން މަޖިލީހުގައި ވާހަކަދައްކަވަން ޖެހޭނީ މެންބަރުންގެ އިއްޒަތްތެރިކަން ނުގެއްލޭ ގޮތަށް ކަމަށެވެ.

"އިއްޒަތްތެރި މެންބަރު، އަޅުގަނޑަށް ޖެހޭނީ ތިގޮތަށް ވާހަކަފުޅު ބައްޓަން ކުރައްވާ ކަމަށް ވަންޏާ ފުރުސަތު ބަންދުކޮށްލަން، އެއީ ހަމަ ހަގީގަތުގައި ވެސް ދައުލަތުގެ މުއައްސަސާތަކުގެ އަގު ވައްޓައިލެވޭ ގޮތަށް ހަގީގަތެއް ނެތް ނުވަތަ ޝަރީއަތަށް ސާބިތުނުވާ ކަންކަމުގެ މައްޗަށް ބިނާކޮށް ވާހަކަ ދެއްކުމަކީ އެއީ ކޮށްގެން ވާނެ ކަމެއް ނޫން، މިތަނުގައި އަޅުގަނޑުމެން މި މުހާތަބު ކުރަނީ ވެސް އިއްޒަތްތެރި މެންބަރު ކިޔާފައި، އެހެންވީމާ އިއްޒަތްތެރި މެންބަރުންގެ އިއްޒަރް ހިފެހެއްޓޭ ގޮތަށް ހުރިހާ މެންބަރުންގެ އަމަލުތައް ބެހެއްޓުމަށް ދަންނަވަމުން ދެން އަޅުގަނޑު ފުރުސަތު މި އަރުވަނީ ދިއްދޫ ދާއިރާގެ އިއްޒަތްތެރި މެންބަރު އަބްދުލްލަތީފު މުހައްމަދަށް އަޅުގަނޑު ފުރުސަތު އަރުވަން، މިއީ އެމްޑީޕީގެ ވަގުތު ހަމަވީމާ މައިކު ކަނޑާލީ،" އަބްދުއްރަހީމް ވިދާޅުވި އެވެ.

ވާހަކަދެއްކުމަށް އެކަށީގެންވާ ވަރުގެ ވަގުތެއް ނުދެއްވުމުން ނިޒާމީ ނުކުތާއެއް ނަގައި، މީކާއިލް އެކަމާ ކަންބޮޑުވުން ވެސް ފާޅު ކުރެއްވި އެވެ. ނަމަވެސް އަބްދުއްރަހީމް ވިދާޅުވީ މެންބަރުން ވާހަކަދައްކަވާ ވަގުތު ބަލަނީ މަޖިލީހުގެ ސެކްރެޓޭރިއެޓުން ކަމަށާއި އެކަމާ ގުޅިގެން ރިޔާސަތަށް ކުރެވޭނެ ކަމެއް ނޯންނާނެ ކަމަށެވެ.

އަބްދުއްރަހީމް އެހެން ވިދާޅުވިއިރު، މީކާއިލްއަށް ލިބުނު ވަގުތުގައި މަޖިލީހުގެ ރިޔާސަތުން ދެފަހަރު ވާހަކަދެއްކެވިއިރު، ހޯރަފުށީ ދާއިރާގެ ޕީއެންސީ މެންބަރު އަލީ މޫސާގެ އިތުރުން އިނގުރައިދޫ ދައިރާގެ މަޖިލިސް މެންބަރު، އިބްރާހިމް ފަލާހު ވެސް ނިޒާމީ ނުކުތާ ނަންގަވައި ވާހަކަދެއްކެވި އެވެ.