އިޒްރޭލަށް ނިސްބަތްވާ ޔަހޫދީއަކު ހިންގާ ސަމް އެންޑް ސަބްސްޓެންސް (ސަމްސަބް) ޕްރައިވެޓު ލިމިޓެޑުގެ ކޮންޓްރެކްޓު ބާތިލުކޮށް، އީ-ފާސް ވެރިފިކޭޝަންގެ މަސައްކަތް ކުރަން ލެޓްވިއާ ކުންފުންޏަކަށް ދީފި އެވެ.

ހޯމްް މިނިސްޓްރީން މިއަދު ނެރުނު ބަޔާނެއްގައި ބުނެފައި ވަނީ، އައިޑީކާޑު ހެއްދުން ފަދަ ދައުލަތުގެ ހިދުމަތްތައް ބޭނުން ކުރަން އިންޓަނެޓު މެދުވެރިކޮށް ފޭސް ރިކޮގްނިޝަން ކުރުމުގެ މަސައްކަތް އަލަށް ހަވާލު ކުރީ ލެޓްވިއާގެ ރެގިއުލާ ފޮރެންސިކްސްއާ ކަމަށެވެ.

ހޯމް މިނިސްޓްރީގެ ދަށުން ހިންގާ ނެޝަނަލް ސެންޓާ ފޯ އިންފޮމޭޝަން ޓެކްނޮލޮޖީއިން ބުނީ ރެގިއުލާ ފޮރެންސިކްސްއަކީ ކަމުގެ ތަޖުރިބާ ހުރި މޮޅު ކުންފުންޏެއް ކަމަށެވެ. އަދި ވެރިފިކޭޝަންގެ މަސައްކަތް ކުރާއިރު، އެއްވެސް ދިވެހި ރައްޔިތެއްގެ ފޮޓޯ އަދި މައުލޫމާތު ބޭރުގެ އެއްވެސް ފަރާތަކަށް ނުލިބޭނެ ކަމަށް އެންސީއައިޓީއިން ބުނެ އެވެ.

"މިކަން ހިގާނީ ބޭރުގެ އެއްވެސް ފަރާތަކަށް އެއްވެސް ރައްޔިތެއްގެ ފޮޓޯއެއް ނުވަތަ އެނޫން ވެސް އެހެން ޒާތީ މައުލޫމާތެއް ހިއްސާކުރުމަކާއި ނުލައި އެންސީއައިޓީގެ އެތެރޭގަ. ރެގިއުލާ ފޮރެންސިކްސް އަކީ 30 އަހަރުގެ ތަޖުރިބާ އާއި އެކު ސެކިއުރިޓީގެ ދާއިރާއިން ގިނަ ޑިޖިޓަލް ހިދުމަތްތަކެއް ފޯރުކޮށްދޭ ގާބިލް އަދި ބައިނަލްއަގުވާމީ ބޮޑެތި ކުންފުނިތަކާއި ތަފާތު އެކި ގައުމުތަކަށް ވެސް ހިދުމަތް ދެމުންދާ އިތުބާރު ހުރި ކުންފުންޏެއް،" އެ ބަޔާނުގައިވެ އެވެ.

ސަމްސަބުގެ ބަދަލުގައި އެހެން ކުންފުންޏަކަށް އީ-ފާސް ވެރިފިކޭޝަންގެ މަސައްކަތް ހަވާލު ކުރާނެ ކަމަށް އެންސީއައިޓީއިން ވަނީ ޖޫން، 2024، ގައި ބުނެފަ އެވެ. އެ ކުންފުނީގެ އަތުން މަސައްކަތް އަތުލާނެ ކަމަށް ބުނީ އެއީ އިޒްރޭލަށް ނިސްބަތްވާ ކުންފުންޏަކަށްވާތީ އަމާޒުވި ފާޑުކިޔުންތަކާއެކު އެވެ.

ސަމްސަބްއަކީ އިނގިރޭސިވިލާތުގެ ލަންޑަނުގައި ރަޖިސްޓްރީކޮށްފައި އޮންނަ ކުންފުންޏެވެ. ނަމަވެސް އެ ކުންފުނި ހިންގަނީ ޔަހޫދީންނެވެ. އެ ކުންފުނީގެ ވެރިން، އެންޑްރިއު ސެވާ، ޕީޓާ ސެވާ ޖެކޮބް ސެވާ އަދި ވިޔާޗެސްލާވް ޒޮލުޑެވް އަކީ ރަޝިޔާއަށް ނިސްބަތްވާ ޔަހޫދީންނެވެ. ނަމަވެސް ފަހުން އިޒްރޭލު އަދި ޔޫރަޕުގެ ބައެއް ގައުމުތަކަށް އެމީހުން ހިޖުރަ ކުރި އެވެ.