އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރަކަށް ޖީ ބަލަސުބްރަމަނިއަން ހަމަޖައްސައިފި އެވެ.

ރާއްޖެއަށް ކަނޑައަޅުއްވާފައި ހުންނަވާ ސަފީރަކަށް ސުބްރަމަނިއަން ހަމަޖެއްސެވިކަން ހާމަކުރެއްވީ އިންޑިއާގެ މިނިސްޓްރީ އޮފް އެކްސްޓާނަލް އެފެއާޒުން ނެރެނު ކުރު ބަޔާނެއްގަ އެވެ. ރާއްޖޭގެ ސަފީރުކަމާ ވަރަށް އަވަހަށް ސުބްރަމާނިއަން ހަވާލުވެވަޑައިގަންނަވާނެ ކަމަށް ވެސް އެ ބަޔާނުގައި ބުންޏެވެ.

އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރަކަށް މިހާރު ހުންނަވަނީ މުނޫ މަހާވަރު އެވެ. އޭނާ އެ މަގާމަށް އައްޔަނު ކުރީ ނޮވެމްބަރު 10، 2021 ގަ އެވެ.

ބަލަސުބްރަމަނިއަން އަކީ އިންޑިއާއިން ނައިޖީރިއަށް ކަނޑައަޅުއްވާފައި ހުންނެވި ސަފީރެވެ. މީގެ ކުރިން 1998 ވަނަ އަހަރު އިންޑިއާގެ ހާރިޖީ ހިދުމަތަށް ނުކުމެވަޑައިގެންނެވި ސުބްރަމަނިއަން ވަނީ މޮސްކޯ އާއި ވޮޝިންޓަންގެ އިތުރުން ބެންކޮކްގެ އިންޑިއާ މިޝަންތަކުގައި މަސައްކަތް ކުރައްވަައިފަ އެވެ.

އޭގެ އިތުރުން ސުބްރަމަނިން އަކީ އިންޑިއާގެ އެކްސްޓާނަލް އެފެއާސް މިނިސްޓަރީގައި މަސައްކަތް ކުރެއްވި ބޭފުޅެކެވެ.