ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އާއި މޯލްޑިވްސް ސޮކާ މޭޓްސް (އެމްއެސްއެމް) ގުޅިގެން ބާއްވާ ދިވެހި ޔޫތު ލީގުގައި އިއްޔެ ޔުނައިޓެޑް ވިކްޓަރީން ކްލަބް ވެލެންސިއާގެ މައްޗަށް ކުރިހޯދަައިރު، ޓީސީ ސްޕޯޓްސް ކްލަބާއި ވިކްޓަރީ ސްޕޯޓްސް ކްލަބް އެއްވަރުވެއްޖެ އެވެ.

ޔޫވީގެ 12 އަހަރުން ދަށުގެ ޓީމާއި ވެލެންސިއާގެ 12 އަހަރުން ދަށުގެ ޓީމު ވަނީ 2-2 އިން އެއްވަރުވެފަ އެވެ. މި ދެ ޓީމުން 14 އަހަރުން ދަށުގެ އުމުރުފުރާގައި ކުޅުނު މެޗު ނިމިފައިވަނީ، 2-0 އިން ޔޫވީ އިން ކުރިހޯދައިގެންނެވެ. ބާރަ އަހަރުން ދަށުގެ އުމުރުފުރާގައި ޓީސީ އާއި ވިކްޓަރީ ކުޅުނު މެޗު 0-0 އިން އެއްވަރުވިއިރު، 14 އަހަރުން ދަށުގެ އުމުރުފުރާގައި މި ދެ ޓީމު ކުޅުުނު މެޗު ނިމުނީ، 2-2 އިން އެއްވަރުވެގެންނެވެ.

ވެލެންސިއާ އާއި ޔުނައިޓެޑް ވިކްޓަރީ ބައްދަލުކުރި މެޗުގެ ތެރެއިން.--- ފޮޓޯ: އިމޭޖަސް،އެމްވީ

ބާރަ އަހަރުން ދަށުގެ ބައިގައި، ވެލެންސިއާގެ ލަނޑުތައް އިއްޔެ ޖެހީ، އަދްޔާން ބިން މުހައްމަދު އާމިލް އާއި ރަވާފް އަބްދުލް ރައޫފް އިބްރާހިމް އެވެ. އެ މެޗުގައި ޔުނައިޓެޑް ވިކްޓަރީގެ ލަނޑުތައް ޖެހީ، ޔަޒްދާން ހުސެއިން އާދަމް އާއި ލުހާން އަހުމަދު ޖަލީލް އެވެ.

ސާދަ އަހަރުން ދަށުގެ ބައިގައި ޔޫވީން ވެލެންސިއާ ބަލިކުރިއިރު، ލަނޑުތައް ޖެހީ، އަހުމަދު ސާއިން މުހައްމަދު އާއި ޔޫސުފް ފިޒާން ފަރުހާދު އެވެ.

ޓީސީ އާއި ވިކްޓަރީން ވަނީ ފުރަތަމަ މެޗުތަކުން މޮޅުވެފަ އެވެ. އެކަމަކު، ދެ ވަނަ މެޗުގައި މި ދެ ޓީމު ބައްދަލުކުރަން ޖެހުނުއިރު ދެ މެޗު ވެސް ވަނީ އެއްވަރުވެފަ އެވެ. ބާރަ އަހަރުން ދަށުގެ ބައިގައި ލަނޑެއް ނުޖެހި އެއްވަރުވިއިރު، ސާދަ އަހަރުން ދަށުގެ ބައިގައި، ވިކްޓަރީގެ ލަނޑުތައް ޖެހީ، މޫސާ މިކިއަލް ޝަކީބް އާއި އަހުމަދު ޒަޔާން ނަޒީފް އެވެ. އަދި ޓީސީގެ ލަނޑުތައް ޖެހީ، ރާކިން މުހައްމަދު އާއި އަރުޝް އަރީޝް އެވެ.

ޔޫތު ލީގުގެ މެޗުތައް ދެން އޮންނާނީ އަންނަ ބުރާސްފަތި ދުވަހު އެވެ. އެ ދުވަހު ހަވީރު، ސުޕަ ޔުނައިޓެޑް ސްޕޯޓްސް (ސަސް) އިން ކުޅޭނީ ކްލަބް އީގަލްސް (އެސްޕަޔާ ފުޓްބޯލް އެކެޑަމީ)އާ އެވެ.