އިއްޔެ ކުރިއަށްދިޔަ ވެރިކަން ކުރާ ޕީއެންސީ އެތެރޭގެ އިންތިހާބުގައި ވެލިދޫ ދާއިރާގެ ވޯޓާސް ލިސްޓު އޮޅުވާލި ކަމަށް ބުނެ، އެ ދާއިރާގެ ރައީސް ކަމަށް ވާދަކުރެއްވި ޖަނާހު މުސްތަފާ މައްސަލަ ހުށަހަޅައިފި އެވެ.

އޭނާގެ ފޭސްބުކް ޕޭޖުން ކުރި ޕޯސްޓެއްގައި ބުނީ، ވޯޓާސް ލިސްޓަށް ގެނެސްފައިވާ ބަދަލަކީ ނަތީޖާ ބަދަލުވެދާނެ ފަދަ މައްސަލައެއް ކަމަށާއި އޭނާގެ ޓީމުން މިހާރު އެ މައްސަލަ ޕާޓީގެ އިދާރާއަށް ހުށަހަޅާފައިވާ ކަމަށެވެ.

"ވެލިދޫ ދާއިރާގެ، ނ. ވެލިދޫގައި ބެހެއްޓުނު ވޯޓު ފޮށީގައި ބޭނުން ކުރި ވޯޓާސް ލިސްޓުގައި، ރަސްމީކޮށް ޕާޓީގެ އިދާރާއިން، ޕާޓީގެ ވެބްސައިޓްގައި ޝާއިއުކޮށްފަވާ ލިސްޓާއި އަޅާކިޔާއިރު 31 ފަރާތެއް ވަނީ އިތުރުކޮށްފަ،" ޖަނާހު ލިޔުއްވާފައިވެ އެވެ.

މައުލޫމާތު ލިބިފައިވާ ގޮތުގައި މި މައްސަލަ ޕީއެންސީން ވަނީ ބަލައިގަނެފަ އެވެ.

މި މައްސަލައާ ގުޅިގެން އިއްޔެ ބޭއްވި އިންތިހާބުގެ ނަތީޖާ ގަބޫލުކުރަން އޭނާ އަދި އޭނާގެ ޓީމުން އިއުތިރާޒު ކުރާ ކަމަށްވެސް ޖަނާހު ފޭސްބުކްގައި ލިޔުއްވާފައިވެ އެވެ.

އިއްޔެ އިންތިހާބުގައި ވެލިދޫ ދާއިރާގެ އިތުރުން، ވޯޓުލުން ކުރިއަށް ދަނިކޮށް ތ. ކަނޑޫދޫ ދާއިރާއަށް ވާދަކުރި ދެ ކެންޑިޑޭޓުންގެ މެދުގައި ހަމަނުޖެހުން ހިންގައި ވޯޓު ފޮށި ފަޅާލައިގެން ވޯޓު ކަރުދާސްތައް ގެއަށް ގެންދިޔަ މައްސަލައެއްވެސް ފެންމަތިވި އެވެ.

އެ މައްސަލަ އިއްޔެ ހައްލު ކުރި ކަމަށް ރޭ ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވަނީ އިއުލާނުކުރައްވާފަ އެވެ.