މިލާން (ނޮވެމްބަރު 21) - އިޓަލީގެ ކްލަބް ޖެނޯއާގެ ކޯޗަކަށް ފްރާންސްގެ ކުރީގެ މިޑްފީލްޑަރު، ޕެޓްރިކް ވިއޭރާ ހަމަޖައްސައިފި އެވެ.

މިދިޔަ ޖުލައި މަހު ސްޓްރާސްބޯގެ ކޯޗުކަމުން ވަކިވި ވިއޭރާ ޓީމަކާ ހަވާލުުނުވެ ހުރިއިރު، ޖެނޯއާގެ ކޯޗުކަން އޭނާ އަށް ދިނީ އެ މަގާމު އަދާކުރަމުން އައި އިޓަލީގެ ކުރީގެ ފޯވާޑް، އަލްބާޓޯ ޖިލަޑީނޯ ވަކިިކުރުމަށް ފަހު އެވެ.

ޖިލާޑީނޯ މަގާމުން ވަކިކުރީ މި ފަހަރުގެ ސީޒަން ފަށައިގެން ޖެނޯއާގެ ނަތީޖާތައް ދަށްވުމުންނެވެ. އެ ގޮތުން، ލީގުގެ ފުރަތަމަ 12 މެޗުން ޖެނޯއާ އަށް 10 ޕޮއިންޓް ލިބުނުއިރު، އެ ޓީމު އޮތީ ލީގުގެ 17 ވަނައިގަ އެވެ.

ކުރިން މަޝްހޫރު ގިނަ ކްލަބްތަކަށް ކުޅެފައިވާ ވިއޭރާ، 48، ކޯޗިން ކެރިއަރުގެ ފުރަތަމަ މަސައްކަތަކީ މެންޗެސްޓާ ސިޓީގެ 23 އަހަރުން ދަށު ޓީމެވެ. އެ ޓީމުގެ ކޯޗަކަށް އޭނާ ހުރީ 2013 އިން 2015 އަށެވެ. އޭގެ ފަހުން، 2016 އިން 2018 އަށް ނިއުޔޯކް ސިޓީގެ ކޯޗަކަށް މަސައްކަތްކޮށް، ދެ އަހަރު ދުވަހު، ފްރާންސްގެ ނީސް އަށް ކޯޗުކޮށްދިނީ 2018 އިން 2020 އަށެވެ.

އާސެނަލާ އެކު ޕްރިމިއާ ލީގު ކާމިޔާބުކުރި ކެޕްޓަން، ވިއޭރާ އެ ލީގުގައި ކޯޗަކަށް މަސައްކަތްކުރީ 2021 އިން 2023 އަށް ކްރިސްޓަލް ޕެލަސްގަ އެވެ. ފްރާންސް ލީގުގައި، ވިއޭރާ، މަސައްކަތްކުރި ދެ ވަނަ ކްލަބަކީ، ސްޓްރާސްބޯ އެވެ. އެ ޓީމަށް އިރުޝާދުދިނީ މިދިޔަ ސީޒަން އެކަންޏެެވެ.