ދަރިންނަށް ގުރުއާން ކިޔަވައި ދިނުމަކީ އަޅުގަނޑުމެން ވަރަށް އިސްކަން ދޭ ކަމެކެވެ. އަދަބު ދީގެން ނަމަވެސް އުމުރުން އަށެއްކަ އަހަރު ވާއިރު ހަތިމު ކުޅައުމަށް މައިންބަފައިން ބާރު އަޅަ އެވެ. ހަތިމުކުރެވުމާއެކު ކުކުޅެއް ކަތިލައި އަވަށްޓެރިންނަށާއި އާއިލާގެ މީހުންނަށް ދޭ ޖާފަތުގައި މައިންބަފައިންގެ މޫނުމަތިން އެ ފެންނަ ފަހުރުވެރިކަމުގެ ކުލަވަރު މިހާރުގެ މަތީ ފާހެއް ހާސިލުކުރާ ދަރިވަރެއްގެ ކާމިޔާބީ ފާހަގަ ކުރަން ބާއްވާ ރަސްމިއްޔާތަކުން ވެސް ނުފެންނާނެ އެވެ. އެއީ އެހައިވެސް ފަހުރުވެރިކަމެކެވެ.

ކޮންމެ އެދުރެއް ވެސް ކިޔަވައިދެނީ އެ އެދުރެއްގެ ވައްޓަފާޅިއަށެވެ. ފޮތުން ނުވަތަ ސޫރަތުން ބަހާލައިގެން ގުރުއާން ހަތިމުކޮށްދިނުމަށް އެކި އެދުރުން ހިޔާރުކުރެ އެވެ. ކޮންމެ އެދުރަކުވެސް ފުރަތަމަ ދަސްކޮށްދޭނީ އަކުރުތަކެވެ. އަލިފަކު ނުކުތާއެއް ނެތްކަމާއި، ބ ތިރީގައި އޮންނަނީ އެއް ނުކުތާކަން ކިޔައިދީ ފަށާ ފިލާވަޅު، 'ލަމް ލަކުމް ލަކުމާ ލަކުންނަ ލީ ލަނާ' އާ ހަމައަށް ދާއިރު އަކުރުތަކާއި، އަރަބި ބަހުގެ އަސާސީ އޮނިގަނޑާއި، އަކުރުތައް މެހިގެން ދާގޮތަށް ކުއްޖާގެ ދޫ ފަރިތަވެ އެވެ. ދެން އެވީ އައްމާ ފޮތުން ފަށާށެވެ. އެއީ ކުރު ސޫރަތްތަކެވެ.

ފޮތުން ބަހާލާއިރު އައްމާފޮތަކީ 30 ވަނަ ނުވަތަ އެންމެ ފަހު ފޮތެވެ. އަލިފްލާމްމީމުން ފަށައިގެން ސަޔަޤޫލު ނިންމައިގެން ދާގޮތަށްގޮސް ނިމޭނީ އައްމާ ފޮތަށެވެ. އެކަމަކު ކުރު ސޫރަތްތައް ހިމެނޭ ފޮތަށް ވާތީ އާންމު ގޮތެއްގައި އެދުރުން ފަށާނީ އައްމާ ފޮތުންނެވެ. އޭގެ ފަހުން ދެ އިހުތިޔާރެއް އޮވެ އެވެ. އެއީ އަލިފްލާމްމީމް ނުވަތަ ފުރަތަމަ ފޮތުން ފެށުމާއި، ތަބާރަކަ ނުވަތަ އޮނަތިރީސް ވަނަ ފޮތުން ފެށުމެވެ. މި ދެގޮތަށްވެސް އެދުރުން ކިޔަވައި ދެ އެވެ. މިކަން އޮންނަ ގޮތް ދަންނަ ބޭކަލުން ވިދާޅުވާތީ އަޅުގަނޑު އަޑުއެހީ މި ދެގޮތް ވެސް ހަމަ އެންމެ ރަނގަޅު ކަމުގަ އެވެ.

ގުރުއާން ކިޔަވަން އެދުރުގެއަށް ދިޔަ ކުއްޖަކު ނިކަން ހާލުން އުޅެގެން އަކުރު ދަސްކޮށް އައްމާ ފޮތް ނިންމައިފި އެވެ. އެދުރުބޭ އޭނާއަށް އުނގަންނައިދޭން ފެށީ ތަބާރަކަ ފޮތުންނެވެ. ދަރިވަރަށް މި ދަތުރުވީ އުނދަގޫ ދަތުރަކަށެވެ. ވަރަށް ހާލުން އުޅެގެން ތަބާރަކަ ނިންމައި ޤަދްސަމިޢަ ފެށިއްޖެ އެވެ. އެ ފޮތް ވީ އަދި މާ އުނދަގޫ ފޮތަކަށެވެ. ބަލައިގެން ކުށެއް ނުޖެހި ކިޔަން ދަސްކުރެވުނީ އެހެން ކުދިން ހަތިމުކުރާހާ ދުވަހުންނެވެ. އޭރު މުޅި ގުރުއާނުގައި ކިތައް ފޮތް އޮންނަކަން މި ކުއްޖާއަށް ފިލާފައި ނެތެވެ. އައްމާ ފޮތާއި ޤަދްސަމިޢަ ގައި ހޭދަކުރި މުއްދަތާއި ބުރައަށް ބަލައި މި ކުއްޖާފުޅަށް ވިސްނިފައި އޮތްގޮތުން މިކަން މި ނިމުނީ އެވެ.

މިކަމާ އުފާކޮށް މީނާ އެދުރުބެއަށް ބުނެ އެވެ. އެދުރުބޭ އެވެ. ޤަދްސަމިޢަވެސް ނިމުނީ އެވެ. އެހެންވީމާ ގުރުއާން ހަތިމުކުރެވުނީތާ އެވެ. އެދުރުބޭ ބުންޏެވެ. ބަލަގަ އަދި ތިޔަ ނިމުނީ ޤަދްސަމިޢަ އެވެ. ޤާލަފަމާ އަދި އޮތްގޮތަށް އޮތީ އެވެ. މި ކުއްޖާ ހިތަށް ވެރިވީ ޤަދްސަމިޢަ ދަސްކުރަން އުޅެންޖެހުނު ބުރަ ހާލެވެ. މީނާއަށް އެވަގުތު ބޭ އިހުތިޔާރުގައި ބުނެވުނެވެ. ޤަދްސަމިޢު މިހާވަރިއްޔާ ޤާލަފަމާ އަދި ކިހާވަރެއް ވާނޭބާ އެވެ.

ފަހުން މިބަސް ވީ މިސާލު ބަހަކަށެވެ. މިހެން ބުނެ އުޅެނީ ކަމެއްގެ ފެށުން މާ އުދަގޫވެފައި ބަރުބޮޑުވުމަށް ނިސްބަތްކޮށެވެ. މިކަމުގެ ފެށުން މިހާވަރިއްޔާ ދެން ހުރި ކަންތައްތައް ކިހާވަރެއް ވާނެބާއޭ ބުނަންޖެހޭ ކަހަލަ ތަންތަނުގައި މި މިސާލުބަސް ބޭނުންކޮށް އުޅެ އެވެ.

ދެހާސް ތޭވީސް ވަނަ އަހަރު އިންތިހާބުވި އައު ރިޔާސީ ދައުރުން މި ނިމުނީ އަދި ފުރަތަމަ އަހަރެވެ. މިހައިތަނަށް ދިޔައިރު ދިވެހި ރާއްޖޭގެ އިގްތިސާދު ބޯދަށަށް ޖެހިއްޖެ އެވެ. ފެންނަން އުޅެނީ އުފާވެރި މަންޒަރެއް ކަމަށް ސަރުކާރުން ބުންޏަސް މިހާރުވެސް ތަކެތީގެ އަގު ބޮޑުވަމުންދާ ނިސްބަތާއި، ވިޔަފާރިތަކަށް އަންނަ ލޮޅުން އާންމުން ތަޖުރިބާ އެބަ ކުރެ އެވެ. ބާނާ މަހަކަށް ހަމަ އަގު ނުލިބޭ ތަނުގައި އަގެއް އަމުދުން ނުލިބެނީ އެވެ. އެކަށީގެންވާ އާމްދަނީއެއް ނުލިބި ހަރަދުކުރަން ޖެހިގެން އެތައް ވިޔަފާރިއެއް ހުއްޓާލައިފި އެވެ.

ހުށަހެޅިފައި އޮތް ބަޖެޓުގައި އޮތްގޮތުން ދައުލަތުން މިވީހައި ޒަމާނަކު ދެމުން ދިޔަ އެތައް އިނާޔަތެއް އަންނަ އަހަރު ހުއްޓާލެވޭނެ އެވެ. ކާޑާއި ކަރަންޓު ފަދަ އަސާސީ ހިދުމަތްތަކުން ދައުލަތުގެ އެހީއެއް ބޭނުންވާނަމަ އެކަމަށް އެދޭ ފޯމު ހުށަހަޅައި 'އެމްޕީ' އަށް އާދޭސް ދަންނަވަން ވީ އެވެ. މިއީ އިގްތިސާދީ ހާލަތެވެ.

ރައްޔިތުންގެ މަޖިލީހަކީ ކުޅޭކުޅޭ ތަނަކަށް ހައްދަވައިފި އެވެ. އެ މަޖިލީހަށް އަޅުގަނޑުމެން އިންތިހާބު ކުރި ނުހަނު އިއްޒަތްތެރި މެންބަރުންނަކީ ރައީސުލްޖުމްހޫރިއްޔާ ހިންގަވާ ޕާޓީއަށް އެކަނި ހިދުމަތްކުރުމުގެ ޒިންމާ އޮތް މަޒުދޫރުން ތަކަކަށް ހައްދަަވައިފި އެވެ. އުސޫލެއްގެ ތެރެއިން ހިނގަމުން ދާތާ ސޯޅަ އަހަރުވީ ގާނޫނުއަސާސީ ބަދަލުކޮށްލުމަކީ ފެންބޮއިފަ ވައެއްލުންހައި ފަސޭހަ ކަމަކަށް ހައްދަވައިފި އެވެ. ރައްޔިތުންގެ މަންދޫބުން މަގާމުން ވަކިކުރުމުގެ ބާރު އަތަށް މަހާލައްވައިފި އެވެ.

ސަރުކާރުން ހިންގާ ހުރިހައި ކަމެއްގެ މައުލޫމާތު ސިއްރެވެ. އަންނަ އަހަރަށް ލަފާކުރާ ބަޖެޓަކީވެސް ބޮޑު ސިއްރެކެވެ. ހިޔާ ފުލެޓުގައި ލިފްޓު ހަރުކުރަން ކުރާ ހަރަދުވެސް ސިއްރެވެ. މައުލޫމާތު ހޯދުމަށް އެދި ހުށަހަޅާ ފޯމުތައް ހުރި ގޮތަކަށް ހުރި ތަނުގައި އެބަހުއްޓެވެ. އިންފޮމޭޝަން ކޮމިޝަނަރުގެ މަގާމުގެ ހައިބަތުވެސް ގެއްލުވައިލައިފި އެވެ. އަންގާ އެއްވެސް އެންގުމަކަށް ތަބާވުމަކީ ނެތްކަމެކެވެ.

އެކުވެރިންނޭ އެވެ. މިއީ މިވެރިކަމުގެ ޤަދްސަމިޢަ އެވެ. ޤާލަފަމާ ކުރިއަށް އޮތީ އެވެ.