މެޑްރިޑް (ނޮވެމްބަރު 21) - ސްޕެއިންގެ ޗެމްޕިއަން ރެއާލް މެޑްރިޑަށް ކުޅެމުން އަންނަ ބްރެޒިލްގެ ޒުވާން ފޯވާޑް އެންޑްރިކް ލޯނު އެއްބަސްވުމުގެ ދަށުން އަންނަ މަހު ހުޅުވޭ ޓްރާންސްފާ މާކެޓްގައި ދޫނުކުރާނެ ކަމަށް އެ ކްލަބުން ބުނެފި އެވެ.

މީގެ ކުރިން ވެސް އެންޑްރިކް ލޯނު އެއްބަސްވުމުގެ ދަށުން އެހެން ކްލަބަކަށް ބަދަލުވާނެ ކަމަށް މީޑިއާ ރިޕޯޓްތައް ބުނިއެވެ. އެކަމަކު އެ ފަހަރު ރެއާލްގެ ކޯޗު ކާލޯ އެންޗެލޮޓީ ބުނީ, އެންޑްރިކް އަކީ ރެއާލުން އެހެން ކްލަބްތަކަށް ދޫކުރާނެ ކުޅުންތެރިއެއް ނޫން ކަމަށެވެ.

މި ފަހަރުން މީޑިއާތަކުން ވަނީ އެންޑްރިކް ލޯނު އެއްބަސްވުމެއްގެ ދަށުން ސައުތުހެމްޕްޓަން އަށް ބަދަލުވާން އުޅޭ ކަމަށް ބުނެފަ އެވެ. އަދި އެންޑްރިކް އެކުލަބަށް ބަދަލުވާން ރެއާލުން އެއްބަސްވެފައިވާ ކަމަށް ވެސް ރިޕޯޓުތައް ބުނި އެވެ. އެކަމަކު, ރެއާލުން ވަނީ އެންޑްރިކް އެހެން ކްލަބަކަށް ލޯނަށް ދޫކުރާ ވާހަކަތައް ދޮގު ކޮށްފަ އެވެ.

ރެއާލުން އެންޑްރިކްގެ ސޮއި ހޯދީ އޭނާގެ އުމުރުން އެންމެ 16 އަހަރުގަ އެވެ. ރެއާލަށް ސޮއިކުރި ނަމަވެސް އެންޑްރިކް ފުރަތަމަ ކުޅެމުން އައީ ބްރެޒިލްގެ ޕަލްމޭރަސް އަށެވެ. އެކަމަކު، އެ ސީޒަން ނިންމުމަށް ފަހު އެންޑްރިކް ރެއާލާ ގުޅުނީ މި ސީޒަނުގަ އެވެ.

ރެއާލާ ގުޅުމަށް ފަހު އެންޑްރިކް އަށް ފުރަތަމަ އެގާރައިގައި ހިމެނިގެން ކުޅެން ފުރުސަތު ނުލިބުނު ނަމަވެސް އޭނާ ވަނީ ބަދަލު ކުޅުންތެރިއެއްގެ ގޮތުގައި ކުޅެން އަރައި ރެއާލަށް މިހާތަނަށް ދެ ގޯލު ކާމިޔާބުކޮށްދީފަ އެވެ.