ދިވެހި ރާއްޖޭގެ ގާނޫނުއަސާސީއަށް ގެންނަ ކޮންމެ އިސްލާހަކާ ގުޅިގެން ރައްޔިތުންގެ ހިޔާލު ހޯދަން ނުޖެހޭ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

މަޖިލީހުގެ މެންބަރުންގެ މަގާމު ގެއްލޭ މާއްދާއަށް ނުކުތާތަކެއް އިތުރުކުރުމާއެކު ޖުމްލަ ފަސް ބަދަލެއް މަޖިލީހުން މިއަދު ވަނީ ގާނޫނުއަސާސީއަށް ގެނެސްފަ އެވެ. ސަރުކާރުގެ ފަރާތުން ހުށަހެޅި މި ބިލު މިއަދުން މިއަދަށް ފާސްކޮށް މިހާރު ވަނީ ތަސްދީގު ކުރުމަށް ފަހު ގެޒެޓުކޮށްފަ އެވެ.

މިއަދު ބޭއްވި މަޖިލީހުގެ ދެ ޖަލްސާއަށް ފަހު ޕީއެސްއެމްއަށް ދެއްވި ހާއްސަ އިންޓަވިއުއެއްގައި އަބްދުއްރަހީމް ވިދާޅުވީ، ރައްޔިތުންގެ ގާތުގައި އަހަައިގެން ގެންނަން ޖެހޭ ބަދަލުތައް ގާނޫނު އަސާސީގައި އެބަހުރި ކަމަށެވެ. އެމަނިކުފާނު އިޝާރާތް ކުރެއްވީ ރައްޔިތުންގެ ފެންނަ ނުފެންނަ ވޯޓަކަށް ގޮސްގެން ބަދަލުކުރަން ޖެހޭ މާއްދާ ތަކަށެވެ.

"ނުޖެހޭނެ ހޯދާކަށް. ރައްޔިތުންގެ [ހިޔާލު] ހޯދަން ޖެހޭ ކަންކަން އެބަހުރި ބަޔާންކޮށްފަ. މިސާލަކަށް ރައްޔިތުންގެ އަސާސީ ހައްގުގެ ބާބުގަ އޮތް އެއްވެސް ކަމަކަށް ބަދަލެއް ގެންނަންޏާ ރައްޔިތުންގެ ގާތުގަ އަހާލަން ޖެހޭ. ދެން މިސާލަކަށް މި ދައުރު. ރައްޔިތުންގެ މަޖިލީހުގެ ދައުރު ނުވަތަ ރައީސުލްޖުމްހުރިއްޔާގެ ދައުރު ނޫނީ ވެރިކަން ކުރުމުގެ ނިޒާމު މިކަހަލަ ކަންތައްތަކުގަ ރައްޔިތުންގެ ގާތުގަ އަހާލަން ޖެހޭ ގޮތަށް މި އޮންނަނީ،" އެމަނިކުފާނު ވިދާޅުވި އެވެ.

ނަމަވެސް، މަޖިލީހުގެ ގަވާއިދުގެ ދަށުން އާންމުކޮށް އެ އިދާރާއަށް ހުށަހަޅާ ކޮންމެ ބިލަކަށްހެން އާންމުންގެ ހިޔާލު ހޯދަން ހުޅުވާލަ އެވެ. އެ ފުރުސަތު އޮތްކަމަށް އަބްދުއްރަހީމްވެސް އެއްބަސްވެވަޑައިގެންނެވި އެވެ.

"ދެން ކޮންމެ ކަމެއްގަވެސް ރައްޔިތުން ގާތު އަހަން ބޭނުން ވެއްޖިއްޔާ އެހުމުގެ ފުރުސަތު އެބައޮތް. އެ ނެތް ފުރުސަތު ނޫން. އެކަމަކު އަޅުގަނޑުމެން މި ގެނައި އިސްލާހަކީ މި ވަގުތަށް ހަމަ ކޮންމެހެން ގެންނަން ޖެހިގެން ގެނައި އިސްލާހެއް،" ރައްޔިތުންގެ ހިޔާލަށް ހުޅުވާ ނުލި ސަބަބެއް ގޮތުގައި މަޖިލީހުގެ ރައީސް ދެއްކެވީ މި ވާހަކަ އެވެ.

އަދި، މިއަދުގެ ޖަލްސާގައި ގާނޫނުއަސާސީ ބަދަލުކުރަން ވޯޓު ދެއްވި 78 މެންބަރުންނަށް ތަކުރާރުކޮށް ޝުކުރު ދަންނަވާ އަބްދުއްރަހީމް ވަނީ އެބޭފުޅުން އެ ތިއްބެވީ އަމިއްލަ މަސްލަހަތު ދޫކުރައްވާ ރައްޔިތުންގެ ފަޅިއަށް ޖެހިގެން ކަމަށް ވިދާޅުވެފަ އެވެ.

އެމަނިކުފާނު ފާހަގަކުރެއްވީ މިއީ މެންބަރުންނަށް ރައްޔިތުން ކުރާ އިތުބާރު އިތުރުކޮށް މެންބަރުންގެ ނަޒާހާތްތެރިކަން ވަރުގަދަކުރުމަށް ގެނައި އިސްލާހެއް ކަމަށެވެ.

މި އިސްލާހުގެ ދަށުން މަޖިލިސް މެންބަރުންގެ ގޮނޑި ގެއްލޭނެ ކަމަށް ހިމަނާފައިވަނީ އާ ދެ ހާލަތެކެވެ. އެއީ އިންތިހާބުވާ މެންބަރަކު މަޖިލީހުގެ އުމުރުގެ ތެރޭގައި އެހެން ސިޔާސީ ޕާޓީއަކަށް ބަދަލުވުން، ޕާޓީން ވަކިކުރުން ނުވަތަ އަމިއްލަ މެންބަރަކު ސިޔާސީ ޕާޓީއަކަށް ސޮއިކުރުުމެވެ.

މެންބަރުން ވަކިކުރުން ބަދަލު ގެނައުމުގެ އިތުރުންވެސް ސަރުކާރުން ވަނީ ގާނޫނު އަސާސީއަށް ޖުމްލަ ފަސް އިސްލާހެއް ގެނެސްފަ އެވެ. އޭގެ ތެރޭގައި ރާއްޖޭގެ ސަރަހައްދަށް އުނިއިތުރު ގެނައުމަށާއި ރާއްޖޭގައި އަސްކަރީ ބޭނުމަށް ބޭރުގެ ސިފައިން ތިބުމަށް މަޖިލީހުގެ ބޮޑު މެޖޯރިޓީއެއް ހޯދުން ވަނީ ލާޒިމުކޮށްފަ އެވެ.