ތައިލޭންޑާއި ޔޫއޭއީން އާސަންދައިގެ ހިދުމަތް ދިނުމަށްޓަކައި އެ ދެ ގައުމުގެ ހޮސްޕިޓަލްތަކާއެކު ކުރެވުނު މަސައްކަތުން ހިދުމަތް ފެށުމާ ހަމައަށް ވާސިލުވެފައިވާ ކަމަށް އެންސްޕާގެ ސީއީއޯ، އަދި ސަރުކާރުގެ ތަރުޖަމާނު ހީނާ ވަލީދު މިއަދު ވިދާޅުވެއްޖެ އެވެ.

މަޖިލީހުގެ އިޖުތިމާއީ ކޮމިޓީގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން ހީނާ ވިދާޅުވީ ޔޫއޭއީ އާއި ތައިލޭންޑުން އާސަންދައިގެ ހިދުމަތް ދޭން ފެށޭނެ ދުވަހެއް ވަރަށް އަވަހަށް އިއުލާނު ކުރައްވާނެ ކަމަށެވެ.

"އާސަންދައިން މިހާރު ޔޫއޭއީ އަދި ތައިލޭންޑުގެ ހޮސްޕިޓަލްތަކާ އެކީގައި މަސައްކަތްތަކެއް ކުރެވި އަޅުގަނޑުމެންނަށް ބަޔަކާ އެކީގައި ކުރިއަށް ދެވޭ ހިސާބަށް ވާސިލުވެފައި އެބަވޭ، އެހެންވީމާ އެ ހިދުމަތް ދެވޭނެ ދުވަހަކާއި އަދި އެކަމާ ބެހޭ އިތުރު ތަފުސީލުތައް އަޅުގަނޑުމެން ވަރަށް އަވަހަށް ހާމަކުރަމުން ދާނަން،" ހީނާ ވިދާޅުވި އެވެ.

ތައިލެންޑާއި ޔޫއޭއީއިން ސިއްހީ ހިދުމަތްތައް ދިވެހިންނަށް ފޯރުކޮށްދިނުމުގެ ވާހަކަ ރައީސް ފުރަތަމަ ދެއްކެވީ، ޖެނުއަރީ 13، ގައި ޗައިނާއިން ވަޑައިގެން އިންޑިއާއަށް ދެއްވި ނުސީދާ ބަހުގެ ހަމަލާތަކުގެ ތެރެއިންނެވެ.

"ހަމައެކަނި ވަކި ދިމާއެއްގައި ހުންނަ، ވަކި ގައުމެއްގައި ހުންނަ މެޑިކަލް ފެސިލިޓީތަކަށް އެކަނި ގޮސްގެން ބޭނުންކުރެވޭ އެއްޗަކަށް ނަހަދައި، އެއަށްވުރެ ފެންވަރު ރަނގަޅު ގައުމުތަކަށް، ޔޫއޭއީ އަށާއި ތައިލެންޑަށް އިރާދަކުރެއްވިއްޔާ އަޅުގަނޑުމެންގެ އާސަންދަ ފުޅާކުރުމަށް،" ރައީސް އެ ދުވަހު ވިދާޅުވި އެވެ.

މިއީ ޔޫއޭއީ އާއި ތައިލޭންޑަށް އާސަންދަ ފުޅާ ކުރައްވާނެ ކަމަށް ރައީސް އިއުލާނު ކުރެއްވިފަހުން އެކަމާ ގުޅޭގޮތުން އިތުރު މައުލޫމާތެއް ސަރުކާރުން ހާމަ ކުރި ފުރަތަމަ ފަހަރެވެ. ސަރުކާރުގެ ފަރާތުން މީގެ ކުރިން ބުނަމުން ދިޔައީ އެ ގައުމުތަކުން އާސަންދައިގެ ހިދުމަތް ދޭން ފެށޭނެ ތާރީހެއް ނޭނގޭ ކަމަށެވެ.