ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި މޯލްޑިވްސް ސޮކަ މޭޓްސް (އެމްއެސްއެމް) ގުޅިގެން، ދިވެހި ޔޫތު ލީގުގެ ނަމުގައި، ތިން އުމުރުފުރާ އަަކަށް ހާއްސަ ލީގެއް އަންނަ ބުރާސްފަތި ދުވަހު ފަށަން ތައްޔާރުވެފައިވާއިރު، މިއީ ޒުވާން ޖީލަކަށް ކެރިއަރެއް ބިނާކުރަން ލިބޭ ބޮޑު ފުރުސަތެކެވެ.

އެމްއެސްއެމް އިން އިސްނަގައި، އެފްއޭއެމްއާ ގުޅިގެން ބާއްވާ މި މުބާރާތުގައި، ކުރިއަށްދާނީ ތިން އުމުރުފުރާއެއްގެ ލީގެވެ. އެއީ، 12 އަހަރުން ދަށާއި 14 އަހަރުން ދަށުގެ އިތުރުން 16 އަހަރުން ދަށުގެ އުމުރުފުރާ އަށެވެ.

ހެންވޭރު ދަނޑާއި ގަލޮޅު ރަސްމީ ދަނޑުގައި ބާއްވާ މި މުބާރާތުގައި ބައިވެރިވެފައިވާ ކްލަބްތަކަކީ، މާޒިޔާ ސްޕޯޓްސް އެންޑް ރެކްރިއޭޝަން، ސުޕަ ޔުނައިޓެޑް ސްޕޯޓްސް (ސަސް)، ޔުނައިޓެޑް ވިކްޓަރީ، ކްލަބް އީގަލްސް، ޓީސީ ސްޕޯޓްސް ކްލަބް، ކްލަބް ވެލެންސިއާ، ވިކްޓަރީ ސްޕޯޓްސް ކްލަބް އަދި ހުއްރިއްޔާ ސްޕޯޓްސް ކްލަބް (ހުރާ) އެވެ.

ރޭ ބޭއްވި ދިވެހި ޔޫތު ލިގުގެ ގުރުއަތުލުމުގެ ތެރެއިން ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ، އަލީ އަޝްފާގު (ދަގަނޑޭ).--- ފޮޓޯ: އަތޫފް އާތިފް / އަދަދު ސްޕޯޓްސް

ލީގު ސިސްޓަމަށް ކުޅޭ މި މުބާރާތް ކުރިއަށްދާނީ، އަންނަ ބުރާސްފަތި ދުވަހުން ފެށިގެން، ޖެނުއަރީ 28 ވަނަ ދުވަހުގެ ނިޔަލަށެވެ. އާންމު ގޮތެއްގައި، ދިވެހި ޔޫތު ލީގުގެ މެޗުތައް ތާވަލުކޮށްފައި ހުރީ، ހަފްތާ ބަންދާ ދިމާކޮށް މެޗުތައް ކުޅޭ ގޮތަށް ވިސްނުމަށް ފަހު އެވެ. އެހެން ނަމަވެސް، މުބާރާތުގައި ކުޅޭ ޓީމުތަކާ މަޝްވަރާ ކުރުމަށް ފަހު، ހަފްތާގެ މެދުތެރެއިން ވެސް ބައެއް މެޗުތައް ވަނީ ޝެޑިއުލްކޮށްފަ އެވެ.

މުބާރާތުގެ ގުރުއަތުލުން، ރޭ ގަލޮޅު ދަނޑުގެ ވީއައިޕީ ރޫމުގައި ބޭއްވިއިރު، މުބާރާތުގައި ބައިވެރިވާ ކްލަބްތަކުގެ މެނޭޖްމަންޓު އަދި ކޯޗުންގެ އިތުރުން މުބާރާތް ހިންގާ އެމްއެސްއެމްގެ ފަރާތްތައް ވަނީ ބައިވެރިވެފަ އެވެ. އަދި ގުރުއަތުލުން ކުރިއަށްގެންގޮސްފައިވަނީ، ގައުމީ ފުޓްބޯޅަ ޓީމާ އެކު، ކާމިޔާބު ހޯދާފައިވާ ލެޖެންޑުންނާ އެކުގަ އެވެ.

ދިވެހި ޔޫތު ލީގުގެ ޓެކްނިކަލް ޑިރެކްޓަރަކީ، އިހުސާން އަބްދުލް ގަނީ (ސާންތީ) އެވެ. މީގެ ކުރިން، އެފްއޭއެމްގެ ޓެކްނިކަލް ޑިރެކްޓަރެއްގެ ގޮތުގަައި މަސައްކަތްކުރިއިރު، ސާންތީ ވަނީ ޔޫތު ލީގެއް ބާއްވައި ޒުވާން ކުޅުންތެރިންނަށް ގިނަ މެޗުތަކެއް ކުޅުމުގެ ފުރުސަތުތަކެއް ފަހިކޮށްދީފަ އެވެ.

ގިނަ ބަޔަކު ދެކޭގޮތުގައި، ރާއްޖޭގެ ފުޓްބޯޅައިގެ ސިސްޓަމް ކުރިއެރުވުމުގައި އެންމެ ހަރުދަނާ ކުރަން ޖެހޭ އެއް ކަމަކީ، ގްރާސްރޫޓު ލެވަލް އިން ފެށިގެން ކުޅުންތެރިން ކުރިއަރައިގެން އަންނައިރު، އެކަށީގެންވާ ވަރަށް މެޗު ކުޅެން ފުރުސަތު ދިނުމެވެ. ދިވެހި ޔޫތު ލީގަކީ، ކްލަބްތަކުގެ އެކެޑަމީތަކުގައި ގަވާއިދުން ތަމްރީން ހަދަމުން އަންނަ ކުޅުންތެރިންނަށް ވާދަވެރި މެޗުތަކެއް ލީގު ސިސްޓަމަށް ކުޅެލަން ލިބޭނެ ފުރުސަތު ތަނަވަސްކޮށްދޭނެ ޕްލެޓްފޯމެކެވެ. އެހެންކަމުން، މި މުބާރާތާ މެދު ޕޮޒިޓިވް ނަޒަރަކުން ދެކި، ފުޓްބޯޅައިގައި އުޅޭ ގިނަ ފަރާތްތަކެއް މި ކަމުގައި ޝާމިލުވެ އެވެ.