މިއުނިކް (ނޮވެމްބަރު 17) - ރެއާލް މެޑްރިޑަށް ހިދުމަތެއް ކޮށްދޭން ފުރުސަތެއް ލިބިއްޖެނަމަ ދޫކޮށްނުލާނެ ކަމަށް ޖަރުމަނުގެ ފުޓްބޯޅަ ތަރި، ޓޯނީ ކްރޫސް ބުނެފި އެވެ.

ޔޫރޯ ފުޓްބޯޅަ މުބާރާތަށް ފަހު ފުޓްބޯޅައިން ރިޓަޔާކުރި ކްރޫސް، 34، ރެއާލާ އެކު، މިދިޔަ ސީޒަން ނިންމާލީ ސްޕެނިޝް ލީގާއި ޗެމްޕިއަންސް ލީގު ކާމިޔާބުކޮށްގެންނެވެ.

މި ސީޒަނުގައި ރެއާލްގެ ނަތީޖާތައް އެންމެ އެކަށޭނެ ގޮތަށް އެއް ފެންވަރެއްގައި ކުރިއަށްނުދާތީ، އެއީ ކްރޫސްގެ ނެތްތަން ފޫނުބެއްދިގެން ކަމަށް ގިނަ ބަޔަކު އަންނަނީ ބުނަމުންނެވެ.

ޕޮޑްކާސްޓް ޝޯއެއްގައި ވާހަކަ ދައްކަމުން ކްރޫސް ވަނީ ކުޅުމުގެ ކެރިއަރު ނިމިފައިވާ ކަމަށާއި އެކަމަކު، ރެއާލަށް ހިދުމަތެއް ކޮށްދޭން ލިބޭ ފުރުސަތެއްގެ ބޭނުންހިފާނެ ކަމަށް ބުނެފަ އެވެ.

"މުސްތަގުބަލުގައި ރެއާލަށް ހިދުމަތެއްކޮށްދޭން، ކޮންމެ ސިފައެއްގައި ލިބުނަސް އަހަރެން ބޭނުންހިފާނަން. އެއީ، ރެއާލަށް އަހަރެންގެ ހިތުގައި އަބަދުވެސް އޮންނާނީ ލޯތްބާއި އިހުތިރާމް. ރެއާލްގެ ނަން އަހަންނަށް އަބަދުވެސް ހާއްސަވާނެ. ރެއާލް ހިމާޔަތްކުރުމާއި ރެއާލަށް ސަޕޯޓް ދިނުން، އެއީ އަބަދުވެސް އަހަރެން ކުރާނެ ކަންކަން،" 10 އަހަރު ރެއާލްގައި ހޭދަކުރި ކްރޫސް ބުންޏެވެ.

ރެއާލަށް 2014 ވަނަ އަހަރު ބަދަލުވި، ކްރޫސް އެ ކްލަބްގައި ހޭދަކުރި 10 އަހަރު ތެރޭ 465 މެޗު ކުޅެ، 23 ތަށި ހޯދި އެވެ. އެ މުއްދަތުގައި ކްރޫސް ޖެހީ 28 ގޯލެވެ. މިދިޔަ ސީޒަނުގައި ބޮރޫޝިއާ ޑޯޓްމަންޑް އަތުން ރެއާލް މޮޅުވި ޗެމްޕިއަންސް ލީގުގެ ފައިނަލަކީ، ރެއާލާ އެކު ކްރޫސް މޮޅުވި 300 ވަނަ މެޗެވެ.