ހެންވޭރު ގެއަކުން ވަގަށްނެގި ކަމަށް ބެލެވޭ ތަކެއްޗާއެކު ވައްކަމުގެ ތުހުމަތު ކުރެވޭ ދެ މީހުން ހައްޔަރުކޮށްފި އެވެ.

ފުލުހުން ބުނީ އެ މައްސަލައިގައި ހައްޔަރު ކޮށްފައި ވަނީ އިބްރާހިމް ޒަކަރިއްޔާ 33، ހ. ސަމާ ގްރީން އާއި މުހައްމަދު ޒަރީރު 36، ސ. ހިތަދޫ، ކުރިބޯށިގެ ކަމަށް ފުލުހުން ބުންޏެވެ.

މީޑިއާތަކަށް ފުލުހުން ފޮނުވި މެސެޖެއްގައި ބުނީ އެގެއިން ވަގަށް ނަގާފައިވާ ކަމަށް ބެލެވޭ ލެޕްޓޮޕްތަކަކާއި ޓެބުލެޓުތަކެއްގެ އިތުރުން މޯބައިލް ފޯނުތަކަކާއި އެހެން ބައެއް ތަކެތި ގެއެއްގެ ތެރޭގައި ފޮރުވާފައި ހުއްޓައި ހޯދާފައިވާ ކަމަށެވެ.

އެ މައްސަލައިގައި ހައްޔަރުކުރި ދެ މިހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން އެ ދެމީހުންގެ ބަންދަށް ވެސް 15 ދުވަސް ޖަހާފައިވާ ކަމަށް ފުލުހުން ބުންޏެވެ.

އެ މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ބުންޏެވެ.