ރައީސް ޑރ. މުހައްމަދު މުއިއްޒުގެ ވެރިކަމަށް އަހަރެއްވީއިރު ރައްޔިތުންނަށް އެއްވެސް ކަމެއް ނުކޮށްދެވޭ ކަމަށް ވިދާޅުވެ، ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ވަރަށް ބޮޑަށް ފާޑުވިދާޅުވެއްޖެ އެވެ.

މިއަދު ސޯޝަލް މީޑިއާގައި ކުރެއްވި ޕޯސްޓެއްގައި އޭނާ ވިދާޅުވީ، ވެރިކަމުގެ އެއް އަހަރު ނިމުނުއިރު ރައްޔިތުންނަށާއި ގައުމަށް އެއްކަމެއް ވެސް ނުކޮށްދެވޭ ކަމަށެވެ. އަދި ޓެކްސް ދައްކަން ތިބި މީހުންނާ ދެކޮޅަށް ގަދަކަން ދައްކަނީ ރާއްޖެ ފިޔަވާ ދުނިޔޭގެ ކޮން ގައުމަކުންތޯ ވެސް އޭނާ ސުވާލު އުފެއްދެވި އެވެ.

ސަރުކާރާއެކު މަސައްކަތް ކުރާ އެމްޑީއޭގެ ނައިބު ރައީސްގެ މަގާމުގައި ހުންނެވި އައްބާސް ވަނީ ވޭތުވެދިޔަ 24 ގަޑިއިރުގެ ތެރޭގައި ސަރުކާރަށް ފާޑުވިދާޅުވެ އެފަދަ އެތައް ޕޯސްޓެއް ކުރައްވައިފަ އެވެ.

ރައީސް މުއިއްޒަކީ ބޮޑާ، ކިބުރުވެރިއެއްގެ ގޮތުގައި ސިފަކުރައްވައި އެމަނިކުފާނުގެ ވައުދުތައް ނުފުއްދުމަކީ ރައްޔިތުންނާއި ޓެކްސް ދައްކާ މީހުންނާ ޖެއްސުމަށް ލިބޭ ހުއްޖަތޯ ވެސް އޭނާ ސުވާލު އުފެއްދެވި އެވެ.

"ތިމަން މަނިކުފާނު މިހުރީ ރައްޔިތުންގެ ފަޅީގައި ކަމަށް ބުނެ ރައްޔިތުން ބަނޑަށް ޖެހޭނެހާ ކަމެއް ކޮށް. ވިޔަފާރިވެރިންތައް އިނދ ޖައްސާލުން ނޫން ކަމެއް ނުކުރޭ. ރައްޔިތުންގެ ޓެކްސް ފައިސާއިން ހުއްޓުމެއް ނެތި ބޮޑެތި ވައްކަންތައް ކުރަމިން ދާއިރު ރައްޔިތުން އިންތިހާބުކުރި މެންބަރުން މަންމަނު ވެފަ ތިބުމަކީ ގައުމަށް ގައްދާރުވުން،" އައްބާސް ލިޔުއްވާފައިވެ އެވެ.

މީގެ އިތުރުން, ރައްޔިތުން, މަޖިލީހަށް މެންބަރުން އިންތިހާބުކުރީ އެކަކުގެ މުށުތެރެއަށް ހުރިހާ ބާރެއް ގެންގޮސް ހުދުމުހުތާރު ވެރިކަމެއް ކުރުމުގެ ފުރުސަތު ދޭން ނޫންކަން މަޖިލިސް މެންބަރުން ވިސްނަން ޖެހޭ ކަމަށް ވެސް އައްބާސް ވިދާޅުވި އެވެ.

ސަރުކާރާމެދު ނުރުހުން ފާޅުކޮށް އައްބާސް ޕޯސްޓުތަކެއް ކުރައްވަމުން ގެންދަވާއިރު އޭނާގެ ދަރިފުޅު ހިމެނޭ ގޮތަށް މި ސަރުކާރުގެ ސިޔާސީ މަގާމުތަކުގައި ތިބި މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) ގެ އިސް އޮފިޝަލުންތަކެއް ސަރުކާރުން ވަނީ ސެޕްޓެމްބަރު 26، ގައި މަގާމުން ވަކިކޮށްފަ އެވެ.

އެމްޑީއޭއަކީ މަޖިލީހުގެ މީދޫ ދާއިރާގެ މެންބަރު އަހުމަދު ސިޔާމް މުހައްމަދުގެ ސިޔާސީ ޕާޓީ އެވެ. އެ ޕާޓީން ރައީސް ޑރ. މުހައްމަދު މުއިއްޒުގެ ސަރުކާރާއެކު ދަނީ މަސައްކަތް ކުރަމުންނެވެ. މިދިޔަ އަހަރު އޮތް ރިޔާސީ އިންތިހާބުގެ ދެވަނަ ބުރުގައި އެމްޑީއޭއިން ތާއީދުކުރީ ޕީއެންސީއަށެވެ. އެއާއެކު ރައީސް މުއިއްޒު އެކުލަވާލި ސަރުކާރުގެ ސްޓޭޓް މިނިސްޓަރުންގެ ފެންވަރުން ފެށިގެން އެމްޑީއޭގެ މެންބަރުންނަށް ވަނީ މަގާމުތައް ދީފަ އެވެ.

އެ ޕާޓީގެ "ސްލޮޓު" ތަކުގައި ތިބި ސިޔާސީ މުވައްޒަފުންތަކެއް ވަކިކުރަން ސަރުކާރުން ނިންމާފައި މިވަނީ 2028 ގައި އޮންނަ ރިޔާސީ އިންތިހާބުގައި ވާދަކުރައްވަން ސިޔާމް ނިންމަވާފައިވަނިކޮށެވެ. އެ ވާހަކަ މި ނޫހުން ރިޕޯޓު ކޮށްފައިވާނީ ސެޕްޓެމްބަރު 19، ގަ އެވެ.