ލިވަޕޫލް (ނޮވެމްބަރު 8) - ލިވަޕޫލްގެ މުހިންމު ތިން ކުޅުންތެރިއެއްގެ ކޮންޓްރެކްޓް ސީޒަނުގެ ނިޔަލަށް ހަމަވާއިރު، އެ ސްކޮޑުގައި މި ވަގުތު ހުރި އެއްވެސް ކުޅުންތެރިއަކު ޖެނުއަރީ މަހުގެ ޓްރާންސްފާގައި ވިއްކައިނުލުމަށް، އެ ކްލަބްގެ މެނޭޖްމަންޓަށް، އެ ޓީމުގެ ކޯޗު އާނާ ސްލޮޓް އަންގާފައިވާ ކަމަށް މީޑިއާ ރިޕޯޓްތައް ބުނެފި އެވެ.

ލިވަޕޫލްގެ މުހިންމު ތިން ކުޅުންތެރިއެއް ކަމަށްވާ، އަލެކްސަންޑަ އާނޯލްޑް، މުހައްމަދު ސަލާހު އަދި ވާޖިލް ވެން ޑައިކްގެ ކޮންޓްރެކްޓް އޮތީ އަންނަ އަހަރުގެ ޖޫން މަހުގެ ނިޔަލަށެވެ. މީގެއިން އެއްވެސް ކުޅުންތެރިއަކު ވިއްކާލައިގެން، ލިވަޕޫލުން މާލީ މަންފާއެއް ހޯދާނަމަ، އެކަން ކުރެވެން އޮތީ ޖެނުއަރީ ޓްރާންސްފާގަ އެެވެ.

އެކަމަކު، ލިވަޕޫލްގެ ކޯޗުކަމާ މި ސީޒަނުގައި ހަވާލުވި، ނެދަލެންޑްސްގެ ސްލޮޓް، އެ ކްލަބްގެ ސީނިއާ މެނޭޖްމަންޓްގެ ކިބައިން އެދިފައިވަނީ އެއްވެސް ކުޅުންތެރިއަކު ޖެނުއަރީ ޓްރާންސްފާގައި ވިއްކައިނުލުމަށެވެ. ސަބަބަކީ، މި ސީޒަނުގައި ކާމިޔާބު ހޯދަން، ސްކޮޑުގައި މި ވަގުތު ހުރި ކޮންމެ ކުޅުންތެރިއެއްގެ ވެސް ބޭނުން ބޮޑު ކަމަށް ސްލޮޓް އަށް ގަބޫލުކުރެވޭތީ އެވެ.

ނުވަ އަހަރަށް ފަހު، ލިވަޕޫލްގެ ކޯޗުކަން ދޫކޮށްލި ޖަރުމަނުގެ ޔާގަން ކްލޮޕް ނެތުމުން ލިވަޕޫލަށް ބޮޑު ހުސްކަމެއް އަންނާނެ ކަމަށް ގިނަ ބަޔަކަށް ބެލެވުނު ނަމަވެސް، ސްލޮޓް އަންނަނީ އެކަން ފޫބެއްދުމުގައި އެކަށީގެންވާ މަސައްކަތްތަކެއް ކުރަމުންނެވެ. އެ ގޮތުން، މި ވަގުތު އިނގިރޭސި ޕްރިމިއާ ލީގާއި ޗެމްޕިއަންސް ލީގުގެ އެއް ވަނައިގައި ލިވަޕޫލް އޮތްއިރު، އެ ޓީމު ވަނީ ލީގު ކަޕްގެ ކުއާޓާ ފައިނަލަށް ދަތުރުކޮށްފަ އެވެ.