ބޭންކް އޮފް މޯލްޑިވްސް (ބީއެމްއެލް) އަށް 42 އަހަރު ހިދުމަތް ކުރި ޑެޕިއުޓީ ސީއީއޯ އައިޝަތު ނޫރައްދީނަށް އެ ބޭންކުން ރަތްދޫލައިގެ އަލްވަދާއުއެއް ކިޔައިފި އެވެ.

އައިޝަތު ނޫރައްދީނަށް އަލްވަދާއު ކިޔުމަށް ބީއެމްއެލްގެ ގިނަ އަދަދެއްގެ މުވައްޒަފުންނާއި ސީނިއާ މެނޭޖްމަންޓުން ވެސް ވަނީ ބައިވެރިވެފަ އެވެ.

ބީއެމްއެލްގެ ޑެޕިއުޓީ ސީއީއޯގެ މަގާމުން އިސްތިއުފާ ދެއްވުމަށްފަހު، ވަޒީފާއިން ވެސް ވަކިވާން ނިންމީ މިދިޔަ ހަފުތާގަ އެވެ.

އިސްތިއުފާ ދެއްވި މެސެޖުގައި އައިޝަތު ވިދާޅުވީ، ބީއެމްއެލްއަކީ އޭނާގެ ހިތުގައި އަބަދު ވެސް ވަރަށް ހާއްސަ މަގާމެއް އޮންނާނެ ތަނެއް ކަމަށެވެ. އަދި ވިދާޅުވީ، އެ މުއްދަތުގެ ތެރޭގައި ބޭންކަށް ގިނަ ކުރިއެރުންތަކެއް ލިބި ގޮންޖެހުތަކާ ވެސް ކުރިމަތިލާފައި ވާނެ ކަމަށެވެ.

އައިޝަތުގެ މެސެޖުގައި ބޭންކުގެ މުވައްޒަފުންނަށް ތައުރީފުކޮށް، އެ މުވައްޒަފުންނަށް ދެއްވި ނަސޭހަތުގެ ބަސްކޮޅެއްގައި، މުވައްޒަފުންގެ ހަމަތަކާއި އުސޫލުތަކުގައި ސާބިތުވެ ތިބުމަށާއި އެކަކު އަނެކަކަށް އޯގާތެރިވުމަށް ވިދާޅުވެފައިވެ އެވެ.

ގިނަ އަހަރުތަކެއްގެ ހިދުމަތަށް ފަހު އާއިޝަތު ބޭންކުން ވަކިވިއިރު، ބޭންކުގެ ކާޑުތަކުގެ ޑޮލަރު ލިމިޓު އުވާލީ މައްސަލައިގައި އޭނާ ބޭންކުގެ ބޯޑުން ވަކިކުރި ކަމަށް ޕްރިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ސިޓީއެއް ފޮނުވުމުން، އޭނާ ވަނީ މިދިޔަ އޯގަސްޓު މަހުގެ ފަހުކޮޅު ބީއެމްއެލްގެ ބޯޑުން އިސްތިއުފާ ދެއްވައިފަ އެވެ.