ވެލެންސިއާ (ނޮވެމްބަރު 3) - ސްޕެއިނުގެ ވެލެންސިއާގައި މިހާރު ކުރިމަތިވެފައި އޮތް ފެންބޮޑުވުމުގެ ކާރިސާއާ ގުޅިގެން، މި ހަފްތާގައި ސްޕެނިޝް ލީގުގައި ކުޅެން އޮތް ހުރިހާ މެޗެއް ކެންސަލްނުކުރާތީ ގިނަ ބަޔެއްގެ ހިތްހަަމަނުޖެހުން އަމާޒުވެއްޖެ އެވެ.

ސްޕެއިނުގެ ވެލެންސިއާ އަށް ކުރިމަތިވެފައިވާ ފެންބޮޑުވުމުގެ ހާދިސާގައި މަރުވި މީހުންގެ އަދަދު 200 އަށް ވުރެ އިތުރުވެފައިވާއިރު، މި އަދަދު މި އަށް ވުރެ ގިނަ ވުމުގެ ފުރުސަތު ބޮޑުކަމަށް ސްޕެއިނުގެ ސަރުކާރުން ވަނީ ހާމަކޮށްފަ އެވެ.

މި ހާދިސާއާ ގުޅިގެން، ސްޕެނިޝް ލީގުން ފަސްކުރީ ދެ މެޗެކެވެ. އެއީ، ވެލެންސިއާގައި ރެއާލް މެޑްރިޑުން ކުޅެން އޮތް މެޗާއި ރަޔޯ ވަޔެކާނޯ އާއި ވިޔަރެއާލް ބައްދަލުކުރަން އޮތް މެޗެވެ. އެހެން މެޗުތައް އަދިވެސް ޝެޑިއުލްކޮށްގެން ކުޅޭ ގޮތަށް އޮތްއިރު، އެ ކަމާ ޓީމުތަކުން ވަނީ ހިތްހަމަނުޖެހުން ފާޅުކޮށްފަ އެވެ.

"މި ކަންތައްތައް ރޭވިފައި މި އޮތީ ކިހިނެއް ކަމެއް އަހަރެންގެ ސިކުނޑި އަކަށް ނާދޭ. މަގުތަކަށް ބަލާލީމަ މި ފެންނަނީ މާޔޫސްކަން، ކާރިސާގެ ހާލަތެއް ގައުމުގައި އޮތީ. ދެން، ފުޓްބޯޅަ އަކީ މީހުންގެ ކުޅިވަރެކޭ ބުނެފައި، މި ކަހަލަ ވަގުތުތަކުގައި ވެސް އަހަރެމެން ކުޅެން ޖެހޭނަަމަ މިއީ ބަލައިގަންނަން އުނދަގޫ ކަމެއް،" ސްޕެނިޝް ލީގުގައި މި ވަގުތު މަސައްކަތްކުރަމުން އަންނަ އެންމެ ގިނަ ދުވަސްވީ އެއް ކޯޗު، އެތުލެޓިކޯގެ ޑިއޭގޯ ސިިމިއޯނީ ބުންޏެވެ.

ލީގުގެ އެއް ވަނައިގައި އޮތް ބާސެލޯނާގެ ކޯޗު ހަންސީ ފްލިކް ބުނީ މިއީ، އޭނާ އަތުގައި ކޮންޓްރޯލް އޮތް ނިންމުމެއް ނަމަ، މި ވަގުތު ސްޕެއިނުގައި ކުޅިވަރުގެ އެއްވެސް ހަރަކާތެއް ނުބާއްވައި، ވެލެންސިއާގެ މީހުންނަށް ދޭން ޖެހޭ ސަމާލުކަމާއި އެހީތެރިކަން ފޯރުކޮށްދިނުން އިސްކުރާނެ ކަމަށެވެ.