ލަންޑަން (ނޮވެމްބަރު 3) - އިނގިރޭސި ޕްރިމިއާ ލީގުގައި މިރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް ބަލިވުމުގެ ފައިދާނަގައި، ލިވަޕޫލުން ލީގުގެ އެއް ވަނައިގައި ލީޑުހޯދައިފި އެވެ.

ނިއުކާސަލް ޔުނައިޓެޑުން އާސެނަލް ބަލިކުރީ 1-0 އިންނެވެ. ބޯންމައުތުން 2-1 އިން ސިޓީގެ މައްޗަށް ކުރިހޯދައި ތާރީހީ މޮޅެއް ހާސިލްކުރިއިރު، ލިވަޕޫލުން ބްރައިޓަން ބަލިކުރީ ފަހަތުން އަރައި 2-1 އިންނެވެ.

ލީގުގެ އެއް ވަަނައިގައި ލިވަޕޫލް އޮތީ 10 މެޗުން 25 ޕޮއިންޓް ހޯދައިގެންނެވެ. ދެ ވަނައިގައި އޮތް އެންމެ ފަހުގެ ޗެމްޕިއަން، ސިޓީ އަށް ވަނީ 10 މެޗުން 23 ޕޮއިންޓް ލިބިފަ އެވެ. ތިން ވަނައިގައި އޮތީ މިރޭ ވެސްޓް ހޭމް ޔުނައިޓެޑް އަތުން 3-0 އިން މޮޅުވި ނޮޓިންހަމް ފޮރެސްޓް އެވެ. އެ ޓީމަށް ވަނީ 10 މެޗުން 19 ޕޮއިންޓް ލިބިފަ އެވެ. އާސެނަލް ހަތަރެއްގައި އޮތީ 10 މެޗުން 18 ޕޮއިންޓް ހޯދައިގެންނެވެ.

ނިއުކާސަލް ދަނޑުގައި މިރޭ ކުޅުނު މެޗުގައި ފެނިގެންދިޔަ ހަމައެކަނި ލަނޑު މެޗުގެ 12 ވަނަ މިނިޓްގައި ޖެހީ ސްވިޑަންގެ ފޯވާޑް އަލެކްސަންޑަ އިސާކް އެވެ. އެންތަނީ ގޯޑަން އަރިމަތިން ނަގައިދިން ހުރަހަކުން އިސާކް މި ލަނޑު ޖެހީ ބޮލުންނެވެ.

އާސެނަލް މި ވަނީ ލީގު ރޭހުގައި ފަހަތަށް ވެއްޓިފަ އެވެ. އެންމެ ފަހުން ކުޅުނު ތިން މެޗުން ވެސް އެ ޓީމަށް މޮޅެއް ލިބިފައިނުވެ އެވެ.

އަނިޔާގެ މައްސަލަ ބޮޑުވެފައި އޮތް ސިޓީ ކޮޅަށް ބޯންމައުތުން ލަނޑުތައް ޖެހީ، އެންޓޮއިން ސެމެންޔޯ އާއި އެވަނިލްސަން އެވެ. މެޗު ނިމެން އަށް މިނިޓަށް ވެފައި ވަނިކޮށް، ސިޓީގެ ޑިފެންޑަރު، ޖޮސްކޯ ގްވާޑިއޯލް ލަނޑެއް ޖަހައި އެ ޓީމަށް އުންމީދެއް ހޯދައިދިނެވެ. އެކަމަކު، ބޯންމައުތުން ވަނީ ރަނގަޅަށް ޑިފެންސްކޮށް ލީޑު ހިފަހައްޓައި މެޗުން މޮޅުވެފަ އެވެ.

މި ހަފްތާގައި ލީގު ކަޕުން ޓޮޓެންހަމް އަތުން ބަލިވެ، ކެޓި ސިޓީ މި ވަނީ ޖެހިޖެހިގެން ދެ މެޗުން ބަލިވެފަ އެވެ.

ލިވަޕޫލް ދަނޑުގައި ޖެހިޖެހިގެން ދެ ވަނަ އަހަރަކު ބްރައިޓަން އިން ލީޑުނެގި އެވެ. މިރޭގެ މެޗުގައި ބްރައިޓަންގެ ލަނޑު ޖެހީ، ފާޑީ ކަޑިއޯގްލޫ އެވެ. އޭރިއާ ރޮނގުމަތިން ކަހަލަ ގޮތަކަށް، ކަޑިއޯގްލޫ ފޮނުވާލި ބޯޅަ ވަނީ ގޯލުގެ ދުރު ކަނަށެވެ. ފުރަތަމަ ހާފުގައި ބްރައިޓަން އިން ލީޑުގައި އޮވެ، ނިންމާލިއިރު، ލިވަޕޫލުން ނަތީޖާ އަނބުރާލީ ދެ ވަނަ ހާފުގަ އެވެ.

މި މެޗުގައި ލިވަޕޫލުން ޖެހި ގިނަ ޝޮޓްތަކެއް ބްރައިޓަންގެ ކީޕަރު ބާޓް ވަބްރޫގަން މަތަކުރި އެވެ. އެކަމަކު، މެޗުގެ 69 ވަނަ މިނިޓްގައި ކޯޑީ ގަކްޕޯ ނަގައިދިން ބޯޅައެއް ގޯލުގެ ކަނަށް ވަދެ ނަތީޖާ ހަމަހަމަވީ އެވެ. މިއީ، މި ހަފްތާ ތެރޭ ބްރައިޓަން ކޮޅަށް ގަކްޕޯގެ ތިން ވަނަ ލަނޑެވެ. ލީގު ކަޕްގައި ލިވަޕޫލުން ބްރައިޓަން ދަނޑުގައި މޮޅުވި މެޗުގައި، ގަކްޕޯ ދެ ގޯލު ޖެހި އެވެ.

ނަތީޖާ ހަމަހަމަކުރިތާ ދެ މިނިޓް ފަހުން، ލިވަޕޫލް މޮޅުވި ލަނޑު ޖެހީ މުހައްމަދު ސަލާހު އެވެ.

ލީގުގައި މިރޭ އިޕްސްވިޗް ޓައުން އާއި ލެސްޓާ ސިޓީގެ މެޗު 1-1 އިން އެއްވަރުވިއިރު، ސައުތެމްޓަން އިން ވަނީ 1-0 އިން އެވަޓަން ބަލިކޮށްފަ އެވެ.