އޮކްޓޯބަރު 30، ގައި ބޭއްވި 2023 ވަނަ އަހަރުގެ ނޫސްވެރިކަމުގެ އިނާމާ ގުޅިގެން އެކި ފަރާތްތަކުން ކުރަމުންދާ ތުހުމަތުތައް ބަލައި އެކަމާ ގުޅޭ ރިޕޯޓެއް ނެރުމަށް މޯލްޑިވްސް މީޑިއާ ކައުންސިލް (އެމްއެމްސީ) އިން ނިންމައިފި އެވެ.

އެމްއެމްސީގެ ހަތްވަނަ ދައުރުގެ 45 ވަނަ ޖަލްސާ މިއަދު ވަނީ ބާއްވާފަ އެވެ. އެ ޖަލްސާގައި ނިންމާފައިވާ ކަންތައްތައް އެމްއެމްސީން އާންމުކުރިއިރު ބަލަން ނިންމީ ކޮން ތުހުމަތުތަކެއް ކަމެއް ހާމަކޮށްފައި ނުވެ އެވެ.

"އޮކްޓޯބަރު 30 ވީ ބުދަ ދުވަހުގެ ރޭ ބޭއްވުނު 11 ވަނަ ނޫސްވެރިކަމުގެ އިނާމާ ގުޅިގެން މި ކައުންސިލަށް ބޮޑެތި ތުހުމަތުތަކެއް އައިސްފައިވޭ. މި ތުހުމަތުތަކާއި ގުޅިގެން 2 ނޮވެމްބަރުގައި ކުއްލި ޖަލްސާއެއް ބޭއްވުނު. މި ޖަލްސާގައި 11 ވަނަ ނޫސްވެރިކަމުގެ އިނާމާ ގުޅުންހުރި އެންމެހާ ބޭފުޅުންގެ ފަރާތުން މައުލޫމާތު ހޯދައި, މިކަމާއި ގުޅިގެން އުފެދިފައިވާ ކަންބޮޑުވުންތަކާއި މައްސަލަތަކާއި ގުޅޭ ރިޕޯޓެއް ނެރުމަށް ފާސްވި," އެމްއެމްސީން ބުނެފައިވެ އެވެ.

އެމްއެމްސީން ކޮން ތުހުމަތުތަކެއްކަން ހާމަނުކުރި ނަމަވެސް ނޫސްވެރިކަމުގެ އިނާމުގައި ތަހުގީގީ ނޫސްވެރިކަމުގެ ދާއިރާ (ވީޑިއޯ) އިން އަދަދު" ނޫހުން އުފެއްދި "ސްކީލާން" ޑޮކިއުމެންޓަރީއަށް އިނާމު ލިބުމާ ގުޅިގެން އެމްއެމްސީއަށް ސަރުކާރަށް ތާއީދުކުރާ ފަރާތްތަކުން ތުހުމަތުތަކެއް ވަނީ އަމާޒުކޮށްފަ އެވެ.

މި އެވޯޑާ ގުޅިގެން މައްސަލަތަކެއް ދިމާވީ، ތަހުގީގީ ދާއިރާއިން ނޫސްވެރިކަމުގެ އިނާމު "އަދަދު" ނޫހުން އުފެއްދި "ސްކީލާން" ޑޮކިއުމެންޓަރީއަށް ލިބުމާއެކު އެވެ. އެގޮތުން އެ ނިންމުމަށް ސަރުކާރަށް ތާއީދުކުރާ ފަރާތްތަކާއި ޕަބްލިކް ސާވިސް މީޑިއާއިން ވެސް ވަނީ އެކަމާ ދެކޮޅަށް ވާހަކަ ދައްކާފަ އެވެ.

ތަހުގީގީ ނޫސްވެރިކަމުގެ އެވޯޑު ލިބުނު ޑޮކިއުމެންޓަރީ އުފެއްދީ ރައީސް ޑރ. މުހައްމަދު މުއިއްޒުގެ ދޮން މަންމަ، ސްރީ ލަންކާގެ ރައްޔިތެއް ކަމުގައިވާ ޖީ ސްކީލާން، ރާއްޖޭން ބްލެކްލިސްޓުކޮށް ޑީޕޯޓުކުރި ގޮތާއި އޭނާ ރައީސް މުއިއްޒު މައްޗަށް ކުރާ ތުހުމަތުތަކުގެ މައްޗަށެވެ.

ނޫސްވެރިކަމުގެ އިނާމާ ގުޅޭ މައްސަލަތައް ހޫނުވެ އެރޭގެ ޖަލްސާ ލައިވް ކުރަމުން ދަނިކޮށް އެ ޖަލްސާގައި ޕީއެސްއެމްގެ އެޑިޓޯރިއަލް ކޮންޓެންޓާ ހިލާފު ވީޑިއޯއެއް ދެއްކި ކަމަށް ބުނެ މީޑިއާ ކައުންސިލުގެ މައްސަލަ ޕީއެސްއެމުން ވަނީ ރައްޔިތުންގެ މަޖިލީހަށް ވެސް ފޮނުވައިފަ އެވެ. އެ ބަޔާނާއެކު ޕީއެސްއެމްގެ ވަޒީފާގައި ހުރި އެމްއެމްސީގެ ރައީސް މުސްތަފާ ވަނީ މަގާމުން ވެސް ވަކިކޮށްފަ އެވެ.

ނަމަވެސް، ހުކުރު ދުވަހު އޭނާއަށް ވަނީ އަނބުރާ ވަޒީފާ ދީފަ އެވެ. ވަޒީފާ ދިނުމުން މުސްތަފާ ބުނީ އެވޯޑު ހަފުލާގައި އޭނާގެ ބައިވެރިވުމެއް ނެތް ކަމަށާއި "ސްކީލާން" ޑޮކިއުމެންޓަރީގައި މައްސަލަތަކެއް އުޅޭ ކަމަށެވެ.

މި ބަޔާނާ އެކު އެކީހެން މި އަހަރުގެ އެވޯޑަށް އިންސާފުކުރި ޖަޖުންވެސް ވަނީ ތަހުގީގީ ނޫސްވެރިކަމުގެ އެވޯޑު އެ ފަރާތްތަކުން ދިނީ އުސޫލާ ހިލާފަށް ކަމަށް އަމިއްލައަށް ބުނެ އަމިއްލަ ނިންމުމާ ދެކޮޅަށް ބަޔާނެއްވެސް ނެރެފަ އެވެ.