މެންޗެސްޓާ (ނޮވެމްބަރު 1) - ހުސްވެފައިވާ މެންޗެސްޓާ ޔުނައިޓެޑްގެ ހެޑް ކޯޗުގެ މަގާމަށް ޕޯޗުގަލްގެ ޒުވާން ކޯޗު ރުބެން އަމޮރިމް ހަމަޖައްސައިފި އެވެ.

އަމޮރިމް، 39، ކޯޗަކަށް ގެންނަން ޔުނައިޓުން ހުރިހާ ކަމެއް ނިންމައި، އިއުލާނުކުރި ނަމަވެސް އޭނާ އަށް ޔުނައިޓެޑްގެ ކޯޗުގެ ޒިންމާއާ ހަވާލުވެވޭނީ 10 ދުވަސް ފަހުން ކަމަށް ޔުނައިޓެޑުން ވަނީ ބުނެފަ އެވެ.

ސްޕޯޓިންގެ އެއްބަސްވުމުގައިވާ ނޯޓިސް މުއްދަތު ހަމަކޮށް، މި މަހު 11 ވަނަ ދުވަހު، އަމޮރިމް ޔުނައިޓެޑާ އެކު މަސައްކަތް ފަށާނީ 2027 ވަނަ އަހަރުގެ ޖޫން މަހުގެ ނިޔަލަށް އޮތް ކޮންޓްރެކްޓެއްގަ އެވެ.

ޔުނައިޓެޑްގެ ކޯޗަކަށް ހުރި އެރިކް ޓެން ހާގް، ދެ އަހަރާއި ބައިގެ މުއްދަތަކަށް ފަހު ޓީމުގެ ކޯޗުކަމުން ވަކިކުރިއިރު، ޔުނައިޓެޑުން ވަނީ ބަދަލެއްގެ ގޮތުގައި ބަހާލައިގެން ޓެން ހާގަށް 20 މިލިއަން ޑޮލަރު ދައްކަން ނިންމައިފަ އެވެ. އަދި ޔުނައިޓެޑުން އާ ކޯޗަކަށް ގެނައި އަމޮރިމް، އެ ޓީމަށް ގެންނަަން ސްޕޯޓިން އަށް ދެއްކި ފީ 10 މިލިއަން ޑޮލަރަށް ވުރެ އިތުރެވެ.

ޓެން ހާގް ވަކިކުރި ފަހުން ޔުނައިޓެޑްގެ ވަގުތީ ކޯޗަކަށް ހުރީ އޭނާގެ އެސިސްޓަންޓް ރޫޑް ވެން ނިސްޓަލްރޫއި އެވެ. ނިސްޓަލްރޫއިގެ ކޯޗުކަމުގައި ޔުނައިޓެޑުން ވަނީ ލީގު ކަޕްގައި ލެސްޓާ ސިޓީ އަތުން 5-2 އިން މޮޅުވެފަ އެވެ. އެ މެޗަށް ފަހު، ނިސްޓަލްރޫއީ ވަނީ އާ ކޯޗާ އެކު މަސައްކަތްކުރަން ފުރުސަތު ލިިބިއްޖެނަމަ ގަބޫލުކުރާނެ ކަމަށް ބުނެފަ އެވެ.

ޔުނައިޓެޑުން ބުނީ އަމޮރިމް ހަވާލުވަންދެން ޓީމުގެ ކަންކަން ބަލަހައްޓާނީ ނިސްޓަލްރޫއި ކަމަށެވެ.

ލިވަޕޫލާއި ވެސްޓް ހޭމް ޔުނައިޓެޑާ ހަވާލުވުމުގެ ވާހަކަތައް މީގެ ކުރިން ދެކެވުނު އަމޮރިމް، ވަނީ ސްޕޯޓިން އަށް ދެ ފަހަރު ޕޯޗުގީސް ލީގު ކާމިޔާބުކޮށްދީފަ އެވެ. އޭގެ ތެރެއިން ފުރަތަމަ ފަަހަރަކީ، 19 އަހަރު ތެރޭ ސްޕޯޓިން އަށް ލީގު ލިބުނު ފުރަތަަމަ ފަހަރެވެ.

އަމޮރިމް އަކީ 2013 ވަނަ އަަހަރު އަލެކްސް ފާގަސަން ރިޓަޔާކުރި ފަހުން، ޔުނައިޓެޑާ ހަވާލުވާނެ 10 ވަނަ ކޯޗެވެ. އޭގެ ތެރޭގައި ހިމެނެނީ، ފަސް ފުލް ޓައިމް ކޯޗުންނާއި ހަތަރު ކެއާޓޭކާ/އިންޓަރިމް ކޯޗުންނެވެ.