ކުރިއަށް އޮތް 20 އަހަރު ދުވަހަށް ތައްޔާރުކުރާ ގައުމީ މާސްޓަޕްލޭންގެ މަސައްކަތް ރަސްމީކޮށް ފެށުމަށް އަގު ބޮޑު ރަސްމިއްޔާތެއް އަންނަ ހަފުތާގައި ބާއްވަން ނިންމައިފި އެވެ.

މާލީ ދަތިކަން އިންތިހާއަށް ކުރިމަތިވެ، މުވައްޒަފުން މަދުކޮށް، މުސާރަތައް އުނިކުރަން ނިންމާފައިވާ ދަނޑިވަޅުގައި މާސްޓަޕްލޭން އެކުލަވާލުމުގެ ރަސްމިއްޔާތު ބާއްވަން ގާތްގަނޑަކަށް ދެ މިލިއަން ރުފިޔާ ހަރަދުވާ ކަމަށް "އަދަދު" ނޫހަށް އެނގިފައިވެ އެވެ.

ހައުސިން މިނިސްޓްރީން ބުނީ މާސްޓަޕްލޭންގެ މަސައްކަތް ރަސްމީކޮށް ފެށުން ކުލަގަދަ ގޮތެއްގައި ބާއްވަނީ ނޮވެމްބަރު 6 ވަނަ ދުވަހުގެ ރޭ ޒުވާނުންގެ މަރުކަޒުގައި ކަމަށެވެ. އިތުރު މައުލޫމާތެއް އެ މިނިސްޓްރީން އަދި ނުދެ އެވެ. ނަމަވެސް އެ ރަސްމިއްޔާތުގައި ރައީސުލްޖުމްހޫރިއްޔާ އާއި ސަރުކާރުގެ ވެރިން ބައިވެރިވާ ކަމުގެ މައުލޫމާތު ލިބިފައި ވެ އެވެ.

ވިހި އަހަރު ދުވަހުގެ ޕްލޭން އެކުލަވައިލުމުގެ މަސައްކަތް ކުރިއަށް ގެންދާނެ ގޮތާ މެދު ސެޕްޓެމްބަރު 16 ގައި ކެބިނެޓުގައި މަޝްވަރާކޮށް، އެ މަސައްކަތް ކުރިއަށް ގެންދާނެ ގޮތްތަކެއް އެކުލަވައިލި އެވެ. އެ ދުވަހު ކެބިނެޓުން ނިންމީ، މާސްޓަޕްލޭނާ ގުޅޭ އަމަލީ މަސައްކަތް ނޮވެންބަރު މަހު ފަށައި 12 މަސްދުވަހުގެ ތެރޭގައި ނިންމުމަށެވެ.

މި މަޝްރޫއުގެ މައި އިދާރާއަކަށް ހައުސިން މިނިސްޓްރީ ހަމަޖައްސާފައިވާއިރު، މަސައްކަތްތައް ކުރިއަށް ދާ ގޮތުގެ އެންމެ ފަހުގެ އަދާހަމަ، ކޮންމެ ދެ ހަފުތާއަކުން އެއް ހަފުތާގައި، ރައީސް ޑރ. މުހައްމަދު މުއިއްޒުއާ ހިއްސާކުރާނެ އެވެ. އަދި ކޮންމެ ދެ މަހަކުން ކެބިނެޓަށް މައުލޫމާތު ދޭނެ އެވެ.

މާސްޓަޕްލޭން ހެދުމުގެ މަސައްކަތް ފެށުމުގެ ކުރިން، ސަރުކާރުގެ ތަސައްވުރު ރައްޔިތުންނަށް އަންގައިދިނުމަށްޓަކައި ގިނަ ބަޔަކު ބައިވެރިވާ ގޮތަށް، ބޮޑު މަހާސިންތާއެއް ބާއްވަން ކެބިނެޓުން ނިންމާފައިވެ އެވެ. ނަމަވެސް އެކަމަށް ކަނޑަައަޅާފައިވާ ތާރީހެއް ސަރުކާރުން އަދި ހާމައެއް ނުކުރެ އެވެ.

ކެބިނެޓުން ނިންމާފައިވާ ގޮތުން ގައުމީ ތަރައްގީގެ މައިގަނޑު އަސާސަކީ ލޮލަށް ފެންނަ ތަރައްގީ އާއި، ގައުމިއްޔަތުގެ އެންމެހައި ބަހާތައް ހިމެނޭހެން ގައުމިއްޔަތު ދިރުވައި، އާލާކޮށްދޭ އިންސާނީ ތަރައްގީކަމަށްވުމާއެކު، މި ދެ ބާވަތުގެ ތަރައްގީ ހާސިލުވާނެ ގޮތަށް މި ޕްލޭން އެކުލަވައިލުމެވެ.

ޕްލޭންގައި ހިމެނޭ މައިގަނޑު އަސާސްތައް، ގާނޫނުއަސާސީގައި ހިމަނައި އެކަމަށް ހާއްސަ ގާނޫނެއް ހެދުމަށް ވެސް ވަނީ ނިންމައިފަ އެވެ.

ކެބިނެޓުގެ ނިންމުމުގައި ބުނެފައި ވަނީ މާސްޓަޕްލޭން އެކުލަވާލަން މިހާރު ހަމަޖެހިފައިވާ ފައިސާގެ އިތުރުން، ސަރުކާރު ހިއްސާވާ ކުންފުނިތައް ބައިވެރިކޮށްގެން، އެ ކުންފުނިތަކުން ކުރާ މަސައްކަތެއްގެ ބާވަތުން ދެވެން ހުރި އެހީތެރި ކަމެއް، އެ ކުންފުނިތަކުގެ ކޯޕަރޭޓް ސޯޝަލް ރެސްޕޮންސިބިލިޓީގެ ދަށުން ހަމަޖެއްސޭތޯ ބެލުމަށެވެ.