ޕެރިސް (އޮކްޓޫބަރު 30) - އިޓަލީގެ ތަރި، ޖަނިކް ސިނާ ބަލިވެ އުޅޭތީވެ، މިއަދު ފަށާ ޕެރިސް މާސްޓާސް ޓެނިސް މުބާރާތުގައި އޭނާ އަށް ނުކުޅެވޭނެ ކަމަށް ހާމަކޮށްފި އެވެ.

ރޭންކިންގައި ދުނިޔޭގެ އެއް ވަނައިގައި އޮތް ސިނާ، 23، ވައިރަލް ރޯގާއެއް ޖެހިގެން، ޑޮކްޓަރަށް ދެއްކުމަށް ފަހު، ސޯޝަލް މީޑިއާ އަށް ދޫކޮށްލި މެސެޖެއްގައި ބުނެފައިވަނީ، ސިއްހީ ހާލަތު ތަންނުދޭތީ ޕެރިސް މާސްޓާސްގައި ނުކުޅެން ނިންމާފައިވާ ކަމަށެވެ.

މީގެ 16 ވަރަކަށް ދުވަސް ކުރިން ޝަންހާއީ މާސްޓާސް ކާމިޔާބުކުރި ސިނާ މި މުބާރާތުގައި ނުކުޅެވޭ ގޮތްވުމުން، އެއް ވަނަ ސީޑުގެ ގޮތުގައި މުބާރާތުން ފެނިގެންދާނީ ސްޕެއިނުގެ ކާލޯސް އަލްކަރާޒް އެވެ.

ރިޕޯޓްތައް ބުނާގޮތުން. ސިނާ މަސައްކަތްކުރަނީ އަންނަ މަހުގެ 10 ވަނަ ދުވަހު އިޓަލީގެ ޓިއުރިންގައި ފަށާ އޭޓީޕީ ފައިނަސް އަށް ފިޓްވުމަށެވެ. އެއީ، ދުނިޔޭގެ ރޭންކިންގެ ގަދަ އަށް ކުޅުންތެރިން ވާދަކުރާ މުބާރާތެކެވެ.

މި އަހަރުގެ މާޗް މަހު، ސިނާ ވަނީ މަނާބޭހަކަށް ދެ ފަހަރު ކުރި ޓެސްޓުން ވެސް ޕޮޒިޓިވް ވެފަ އެވެ. އެކަމަކު، އެއީ އޭނާ ގަސްދުގައި ކުރި ކަމެއް ނޫން ކަން ޔަގީންވުމުން، ކުޅުމުގެ ފުުރުސަތު ދިނީ އެވެ. ސިނާގެ މި މައްސަލަ ބެލިބެލުމުގައި އެނގިފައިވަނީ، މިއީ، ސިނާގެ ފިޒިއޯތެރަޕިސްޓް އޭނާ އަށް ދިން ބޭހެއްގައި ހިމެނުނު މާއްދާއެއް ކަމެވެ. ސިނާ ސަސްޕެންޑްކުރަން ނިންމި ނަމަވެސް، އޭނާ އެ މައްސަލައިގައި އެޕީލްކޮށް، ކުޅުުމުގެ ފުރުސަތު ހޯދީ އެވެ.

ސިނާ ވަނީ މި އަހަރު ހަތް މުބާރާތް ކާމިޔާބުކޮށްފަ އެވެ. އޭގެ ތެރޭގައި، އަހަރުގެ ފުރަތަމަ ގްރޭންޑް ސްލޭމް އާއި އޮސްޓްރޭލިއާ އޯޕަން އާއި ފަހު ގްރޭންޑް ސްލޭމް ޔޫއެސް އޯޕަން ހިމެނެ އެވެ. މި އަހަރު ކުޅުނު، 71 މެޗުގެ ތެރެއިން ސިނާ ވަނީ 65 މެޗުން މޮޅުވެފަ އެވެ.

ފްރެންޗް އޯޕަންގެ ސެމީ ފައިނަލުން ސިނާ ކެޓިއިރު، ވިމްބަލްޑަން އިން ކެޓީ ކުއާޓާ ފައިނަލުންނެވެ.

ޕެރިސް މާސްޓާސް ހަތް ފަހަރު ކާމިޔާބުކޮށްފައިވާ ޖޮކޮވިޗް ވެސް މި އަހަރުގެ މުބާރާތުގައި ނުކުޅޭނެ އެވެ.