ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ނިންމެވުމާ އެއްގޮތަށް, ވޭޕާއި ވޭޕު ކުރުމަށް ބޭނުން ކުރާ ތަކެއްޗާއި އޭގެ ވަކިވަކި ބައިތައް ރާއްޖެއަށް އެތެރެ ކުރުމާއި ބޭނުން ކުރުމާއި ވިޔަފާރި ކުރުން މަނާކުރުމަށް ގާނޫނަށް ގެންނަން ޖެހޭ ބަދަލުތައް ގެނައުމަށް ސަރުކާރުން ރައްޔިތުންގެ މަޖިލީހަށް ފޮނުވި ބިލު މަޖިލީހަށް ބަލައިގަނެ އިޖުތިމާއީ ކޮމިޓީއަށް މިއަދު ފޮނުވައިފި އެވެ.

އެ ބިލު ބަލައިގަންނަން ފާސްކުރީ 76 މެންބަރުންގެ ވޯޓާއެކު އެވެ. އެ ބިލު ބަލައި ނުގަންނަން އެއްވެސް މެންބަރަކު ވޯޓެއް ނުދެއްވަ އެވެ. އެއްވެސް ކޮޅަކަށް ވޯޓޭ ދޭން ނުފެންނަ ކަމަށް ވޯޓު ދެއްވީ އެންމެ މެންބަރެކެވެ.

ދުންފަތް ކޮންޓްރޯލް ކުރުމާ ބެހޭ ގާނޫނަށް އިސްލާހު ހުށަހެޅުމަށް މަޖިލީހަށް ހުށަހެޅުއްވީ ވެރިކަންކުރާ ޕީއެންސީއަށް ނިސްބަތްވާ ހެންވޭރު އުތުރު ދާއިރާގެ މެންބަރު އަހުމަދު އައިފާން އެވެ.

ބިލުގައިވާގޮތުން މި އިސްލާހާއެކު ރާއްޖެއަށް އިލެކްޓްރޯނިކް ސިނގިރޭޓާއި ވޭޕު އަދި ވޭޕުކުރަން ބޭނުންކުރާ ތަކެތި އެތެރެކުރުން މި އަންނަ މަހުގެ 15 ވަނަ ދުވަހުން ފެށިގެން މަނާ ވާނެ އެވެ. އަދި އެ ތަކެތި ބޭނުން ކުރުން އަންނަ ޑިސެމްބަރު މަހުގެ 15 ވަނަ ދުވަހުން ފެށިގެން މަނާ ވާނެ އެވެ.

މި އިސްލާހު ފާސް ކޮށްފިނަމަ ވޭޕާއި ވޭޕު ކުރަން ބޭނުން ކުރާ ތަކެތި ރާއްޖެއަށް އެތެރެ ކުރާ މީހަކު 50،000ރ. އިން ޖޫރިމަނާކުރެވޭނެ އެވެ. އަދި، އެތެރެކުރާ ކޮންމެ ވޭޕަކަށް އިތުރު 10،000ރ. ގެ މަގުން ޖޫރިމަނާ އިތުރުކުރެވޭނެ އެވެ.

މީގެއިތުރުން، މި އިސްލާހާއެކު ރާއްޖޭގައި ވޭޕު ވިއްކާ ކޮންމެ ފަރާތެއް ޖޫރިމަނާ ކުރެވޭނީ 20،000ރ. އިންނެވެ. އަދި، ވިއްކި ކޮންމެ ވޭޕަކަށް 10،000ރ. ގެ ޖޫރިމަނާއެއް ކުރެވޭނެ ކަމަށްވެސް ބިލުގައިވެ އެވެ.

ވޭޕު މަނާކުރުމަށްފަހު ހިލޭ ވޭޕެއް މީހަކަށް ދިނަސް 10،000ރ. ގެ ޖޫރިމަނާއެއް އަދި ބޭނުންކުރާ ކޮންމެ މީހަކަށް 5،000ރ. ގެ ޖޫރިމަނާއެއް އަންނާނެ ކަމަށްވެސް ސަރުކާރުން ހުށަހެޅި ބިލުގައި ބުނެފައިވެ އެވެ.

ވޭޕު މަނާކުރުމުގެ އިތުރުން ސިނގިރޭޓު އަދި އެހެން ވަސީލަތްތައް ބޭނުންކޮށްގެން ދުންފަތުގެ އިސްތިއުމާލު ކުރުން ކޮންޓްރޯލް ކުރުމާއި ދުންފަތުގެ ބާވަތްތައް ރާއްޖެ އެތެރެކުރުމާއި ވަގަށް ސްމަގްލް ކުރުން ހުއްޓުވުމަށް ވެސް މި ބިލުގައި ގިނަ ކަންތައްތަކެއް ހިމަނާފައިވެ އެވެ.

އޭގެއިތުރުން ދެން މި ބިލުގައި ހިމެނެނީ ދުންފަތުގެ މުއާމަލާތް ކުރެވޭ އެންމެ ހަގު އުމުރަކީ 21 ކަމަށް ކަނޑައެޅުމަށް އޮތް އިސްލާހެކެވެ.

މި ބިލު ފާސްވެ ތަސްދީގުކުރުމަށް ނަގާ މުއްދަތުގައި ވޭޕާއި އިލެކްޓްރިކް ސިނގިރޭޓުން ނަގާ އިމްޕޯޓު ޑިއުޓީ ބޮޑުކުރަންވެސް ސަރުކާރުން ވަނީ މަޖިލީހަށް ބިލެއް ހުށަހަޅާފަ އެވެ. އެ ބިލު ބަލައިގަނެ މިއަދު ވަނީ ކަމާބެހޭ ކޮމިޓީއަށް ފޮނުވާފަ އެވެ.

ސަރުކާރުގެ މި ނިންމުމާއެކު ވޭޕު އަދި އެފަދަ އާލަތްތަކުގެ ވިޔަފާރިކުރާ ފަރާތްތަކުން ދަނީ ނުރުހުން ފާޅުކުރަމުންނެވެ. އެގޮތުން އެ ފަރާތްތަކުގެ ފިހާރަތައް ބަންދުކޮށް އިއްޔެ ވަނީ މަޖިލިސް ދޮށުގައި މުޒާހަރާއެއް ވެސް ކޮށްފަ އެވެ.