ކުޅިވަރުގެ ބްރޭންޑަކަށް ވެވޭނީ ހަމައެކަނި ކުޅުންތެރިންނާއި، ކޯޗުންނާއި، ރެފްރީންނަށް ހެއްޔެވެ؟ ރާއްޖޭގެ ގާބިލް ސްޕޯޓްސް ޖާނަލިސްޓް، އައްޒާމް އަލިފުޅު އެ ދާއިރާގައި ކުރަމުން އަންނަ މަސައްކަތް ބުނެދެނީ، ނޫސްވެރިޔަކަށް ވެސް ކުޅިވަރުގެ ރަމްޒަކަށް ވެވިދާނެ ކަމަށެވެ. އެކަމަކު، އެއީ ހަމަ ހުރެފައި ދެވޭނެ ހިސާބެއް ނޫނެވެ. އެ މީހެއްގެ ކިބައިގައި ނޫސްވެރިކަމުގެ ހުނަރު ހުރުމުގެ އިތުރުން އެ މީހަކަށް ކުޅިވަރު ހިނގާ ނުހިނގާ ގޮތް އެނގެން ޖެހެ އެވެ. ޓެކްނިކަލް މައުލޫމާތާއި، ޓެކްޓިކަލް މައުލޫމާތު ވެސް އެނގެން ޖެހެ އެވެ. ކުޅިވަރުގެ ތާރީހާއި، ކުޅިވަރު ތަރިންގެ ފަސްމަންޒަރު ވެސް ދަސްކުރަން ޖެހެ އެވެ. ހަމައެއާ އެކު ކުޅިވަރު މީހުންނާ ގާތް ގުޅުމެއް ވެސް އޮންނަން ޖެހެ އެވެ. އައްޒާމުގެ ކިބައިގައި އެ ހުރިހާ ކަމެއް ވެސް ފުރިހަމަވެ އެވެ.

އެހެންކަމުން، އޭނާ އަކީ މިއަދު ރާއްޖޭގެ ކުޅުންތެރިންނާއި، ކޯޗުންނާއި، އިދާރީ ހިންގުންތެރިންނާއި، އަދި ކުޅިވަރު ބަލާ މީހުންގެ އިތުބާރު ލިބިފައިވާ ސްޕޯޓްސް ބްރޭންޑެކެވެ.

އޭނާ ވަނީ ރާއްޖޭގެ ބޮޑެތި މީޑިއާތަކުގައި މަސައްކަތްކޮށްފަ އެވެ. ރާއްޖެ އާއި ރާއްޖޭން ބޭރުގެ އެތައް މުބާރާތްތަކެއް ކަވަރުކޮށްފަ އެވެ. ދޭސީ އަދި ބިދޭސީ ކުޅިވަރު އެތައް ތަރިންނާއި ޝަހުސިއްޔަތުންނާ އިންޓަވިއުކޮށްފަ އެވެ. މީޑިއާ ކައުންސިލުން ދޭ ނޫސްވެރިކަމުގެ އެވޯޑްސްގައި އެންމެ މޮޅު ކުޅިވަރު ނޫސްވެރިޔާގެ އިނާމު ހަތަރު ފަހަރު އަދި، ސަރުކާރުން ދޭ ސްޕޯޓްސް އެވޯޑްސްގެ އެންމެ މޮޅު ކުޅިވަރު ނޫސްވެރިޔާގެ އިނާމު ދެ ފަހަރު ހޯދައިފި އެވެ. އެކަމަކު، އަނެއްކާ ވެސް ތަކުރާރުކޮށްލަން އޮތީ، އެއީ އޭނާ ހަމަ ހުރެފައި ހޯދި ކާމިޔާބީތަކެއް ނޫން ކަމެވެ. އެކަމުގެ ފަހަތުގައި އޮތީ އަމިއްލަ އެތައް ކަމެއް ގުރުބާންކުރުމަށް ފަހު، މިކަމަށް ދިން ވަގުތާއި، ބެހެއްޓި ޝައުގުވެރިކަމާއި، ޖުމްލަކޮށް ކުޅިވަރު އޮތް ލޯތްބެވެ.

އައްޒާމުގެ ހިތުގައި އެ ލޯބި އެންމެ ފުރަތަމަ އަށަގަތީ، އަތޮޅު ފެންވަރުގައި ރެފްރީކަން ކުރި އޭނާގެ ބައްޕަ، އަލީ ހުސެއިން ފުޅު (އަލިފުޅު) ގެ ސަބަބުންނެވެ. ރެފްރީކަން ކުރައްވަން ބައްޕަ އެޅުއްވި ޖޯޒީ/ޔުނިފޯމާއި، ބޭނުންކުރެއްވި ކަށިގަނޑާއި، އެ މަސައްކަތުގައި އުޅުއްވަނިކޮށް ނަގާފައިވާ ފޮޓޯތައް ފެނި ކުޑަކުޑަ އައްޒާމުގެ ޝައުގު ކުޅިވަރުގެ ތެރެއަށް ދަމައިގަތެވެ. ނަމަވެސް، ބޭރު ނުވެވޭ ވަރަށް އެކަމުގެ ތެރެއަށް ވަދެވުނީ 2002 ވަނަ އަހަރުގެ ވޯލްޑް ކަޕުގެ މެޗުތައް ރަށުގެ އެކި ތަންތަނަށް ގޮސް ބެލި ބެލުމުގެ ތެރެއިންނެވެ. ފުރަތަމަ މެޗު ބެލީ ބައްޕައާ އެކު އެވެ. ބައްޕަ އަކީ، ފްރާންސްގެ ލެޖެންޑް، ޒިނެދިން ޒިދާންގެ ސަޕޯޓަރެކެވެ.

2014 ވަނަ އަހަރު އައްޒާމް ހަވީރު ނޫހުގެ ސްޕޯޓްސް ސެކްޝަނުގެ ހަބަރުތައް ނޫހުގައި ހިމެނުމަށް ފަހު ބަލަނީ.

އެ ހިސާބުން ފެށިގެން، ކޮންމެ ތަނެއްގައި ކުޅިވަރުގެ ހަރަކާތެއް އޮތަސް އޭނާ އެތަނަކަށް ދާން ފެށި އެވެ. ތ. ތިމަރަފުށްޓަށް ކޭބަލް ޓީވީ ލުމާ އެކު ވެސް އޭނާ ޝައުގުވެރިވީ ކާޓޫން ނެޓްވޯކަކަށް ނޫނެވެ. ހެނދުނު ހެނދުނާ އީއެސްޕީއެން އިން ފޮނުވާ ސްޕޯޓްސް ސެންޓާ ޕްރޮގްރާމަށެވެ.

"ފަތިހު ހޭލައިގެން ހުންނަން ތައްޔާރުވެގެން އެ ޕްރޮގްރާމް ބަލަން. އޭގެން ދައްކާނެ މަޝްހޫރު ހުރިހާ ކުޅިވަރެއްގެ ހައިލައިޓްސް އާއި ހަބަރުތައް،" ތ. ތިމަރަފުށީގައި ހޭދަކުރި ކުޑައިރުގެ ދުވަސްތަކުގެ ހަނދާންތައް އައްޒާމް އާކުރި އެވެ.

އައްޒާމްގެ ބައްޕަ އަލިފުޅު އަކީ، ތ. ތިމަރަފުށީ އޮފީހާއި އަތޮޅުގެ އެކި ރަށްތަކުގެ އޮފީސްތަކުގައި އެކި މަގާމުތައް ފުރުއްވި ފަރާތެކެވެ. އެ ރަށު އޮފީހުގައި މަސައްކަތްކުރިއިރު، އެ ރަށަށް އަންނަ ޕޯސްޓް އޮފީހުގެ ކަންކަމާ ހަވާލުވެހުރީ އޭނާ އެވެ. ރަށުގެ ޕޯސްޓް އޮފީހުން ފޮނުވާ ތަކެތީގެ ތެރޭގައި، މާލޭގައި ނެރޭ "ހަވީރު" ނޫސް ހިމެނެ އެވެ. ނޫސް އަންނައިރަށް ކުޅިވަރު ހަބަރުތައް ޖަހާފައިވާ ސަފުހާތައް ނަގައި، އޭނާ އަލިފުން ޔާ އަށް ހުރިހާ ހަބަރެއް ކިޔަ އެވެ. ހަމައެކަނި އެއެއް ނޫނެވެ. ފޮޓޯ އާއި ހަބަރު ބައި ކަފައި، އޭނާ އެ ފޮރުވަ އެވެ. އެހެންވެ އޭރު އުމުރުން ކިތަންމެ ހަގަސް އައްޒާމަކީ ތިމަރަފުށީ ވަރަށް ގިނަ މީހުން ކުޅިވަރު ހަބަރު ހޯދަން ހޯދާ މީހާ އެވެ.

"މަގުމަތިން ފެނިގެން މީހުން އަހާނެ ކޮބާ މިވެނި މެޗެއްގެ ސްކޯ ކިހާ ވަރެއްހޭ؟، މިރޭ ކޮން މެޗުތަކެއް ހޭ އޮތީ؟" މީހުންގެ އިތުބާރު ލިބެން ފެށި ގޮތް އައްޒާމް، 31، ހިއްސާކުރި އެވެ.

އެ ހުރިހާ ކަމަކާ އެކު، ބޮޑުވެގެން ސްޕޯޓްސް ޖާނަލިސްޓަކަށް ވާން އައްޒާމް ބޭނުންވިޔަސް އެއީ ކިހިނެއް ހޯދާނެ ފުރުސަތެއް ކަމެއް ވެސް އޭނާ އަށް ނޭނގެ އެވެ. އެހެންވެ މާލެ އަށް ބަދަލުވެ ކިޔަވައި ނިންމައި ބިޒްނަސް ދާއިރާ އިން ކޯހެއް ހެދުމަށް ފަހު ވަޒީފާއެއް ހޯދަން ކުރި މަސައްކަތުގައި ނޫހަކަށް އޭނާގެ ނަޒަރެއް ނުދެ އެވެ. އެކަމަކު، ވަޒީފާ ލިބުނީ އޭނާގެ ހިތާއި، ސިކުނޑި ވެސް ބޭނުންވި ގޮތަށް ކުޅިވަރާ ބެހޭ ތަނަކުންނެވެ. ކުޅިވަރު އެކުވެނީގެ ބެޑްމިންޓަން އެސޯސިއޭޝަންގެ އެޑްމިން ބައިންނެވެ. އެ ވަޒީފާގައި އަށް ވަރަކަށް މަސް ދުވަސްވިއިރު، އެއް ދުވަހެއްގައި، ވިލިމާލެ ފެރީއެއްގެ ދަތުރެއްގެ ތެރެއިން އޭނާ އެކުވެރިއެއް ކަމަށްވާ، ކުރީގެ ނޫސްވެރިޔާ އަދި ފަހުން ސްޕޯޓްސް މިނިސްޓަރުގެ ނާއިބުކަން ކުރެއްވި އަޒްމޫން އަހުމަދު އެދުނީ، 'ސީއެންއެމް' ކިޔާ ނޫހަކަށް ކުޅިވަރު ލިޔެދިނުމަށެވެ.

މޯލްޑިވްސް އޮލިމްޕިކް ކޮމިޓީގެ އަހަރީ އާންމު ޖަލްސާ އަކަށް ފަހު ބޭއްވި ނޫސްވެރިންގެ ބައްދަލުވުމެއްގެ ތެރެއިން އައްޒާމް.

އެއީ އޭނާ އަބަދުވެސް އެދިއެދި ހުރި ފަދަ ފުރުސަތެކެވެ. އެހެންވެ، ބެޑްމިންޓަން އެސޯސިއޭޝަންގެ އޮފީހުން ލިބޭ މުސާރައަށް ވުރެ ކުޑަ މުސާރައެއް ދިން ނަމަވެސް 'ސީއެންއެމް' އާ 2013 ވަނަ އަހަރު ގުޅުނެވެ. އެ ނޫހަކީ އޭރު ރާއްޖޭގެ ބޮޑެތި އެހެން މީޑިއާތަކުން ކުޅިވަރަށް ދިން ސަމާލުކަން ދިން ނޫހެއް ނޫނެވެ. އެހެން ކަމުން އައްޒާމަށް ނިސްބަތުން ފަސޭހަކޮށް އެ މަސައްކަތް ކުރެވެން އޮތެވެ. އެކަމަކު އޭނާ އެ މަސައްކަތް ނެގީ ވަރަށް ސީރިއަސްކޮށެވެ. އެންމެ ފުޅާކޮށް ކުޅިވަރު ކަވަރުކުރާ ނޫސްތަކުގެ ސްޕޯޓްސް ޖާނަލިސްޓުންނަކަށް އޭނާ ދުލެއް ނުކުރި އެވެ. ހުރިހާ މެޗެއް ކަވަރުކުރަންދެ އެވެ. ހުރިހާ ޕްރެސް ކޮންފަރެންސަކަށް ވެސް ވަދެ އެވެ. މެޗު ރިޕޯޓްތައް ވެސް ލިޔުނީ އެހާ ތަފްސީލާ އެކު އެވެ. ނަތީޖާއަކަށްވީ، ރާއްޖޭގައި އޭރު އޮތް އެންމެ ބޮޑު ނޫސް، އަދި ރާއްޖޭގައި އެންމެ ވަރުގަދައަށް ކުޅިވަރު ކަވަރުކުރަމުން އައި "ހަވީރު" ނޫހުން އޭނާ އަށް އޮފާކުރުމެވެ.

"ވަރަށް ގިނަ ނޫސްތަކުން އަޅުގަނޑަށް އެޕްރޯޗްކުރި. ރާއްޖޭގައި ކުޅިވަރު ރިޕޯޓަރުން މަދުކަމުން އެންމެން ވެސް ތިބެނީ އެފަދަ މީހަކަށް ބަލަބަލާ. އެކަމަކު ނުގޮސް ހުއްޓާ "ހަވީރު" އިން ފުރުސަތު ލިބުމުން ހިތަށް އެރީ މިއޮތީ އެއްކަލަ އަޅުގަނޑު ބޭނުންވި ހިސާބަށް ދާން ދޮރެއް ހުޅުވިފައޭ. ގާތް އެކުވެރިންގެ ވެސް ލަފަޔާ އެކު އެ ފުރުސަތު ބޭނުން ހިފީ،" 2014 ވަނަ އަހަރުގެ ހަނދާންތައް އައްޒާމް ނިއުޅާލި އެވެ.

2015 .ވަނަ އަހަރުގެ ސާފް ޗެމްޕިއަންޝިޕްގެ ތެރެއިން، ޗެތުރީގެ އެކްސްލޫސިވް އިންޓަވިއުއެއް ނެގުމަށް ފަހު އައްޒާމް (ވ) ޗެތުރީއާ އެކު ނަގާފައިވާ ފޮޓޯއެއް.

"ދިހަ ވަރަކަށް އަހަރު ކުރިން އެ ނޫހެއްގެ ކުޅިވަރު ހަބަރު ކަފައިގެން ގެންގުޅުނީ، ދިހަ އަހަރު ފަހުން މި ލިބުނީ ފުރުސަތު އެ ނޫހެއްގައި ކުޅިވަރު ހަބަރު ލިޔަން، މިއީ، ކުޅިވަރު ނޫސްވެރިކަމުގެ މި ދަތުރުގެ އެންމެ އުފާވެރި އެއް ހަނދާން."

"ހަވީރު" ގައި އައްޒާމުގެ ނަސީބަކަށްވީ އެ ނޫހުގެ އޭރުގެ އެޑިޓަރު މޫސާ ލަތީފަކީ ކުޅިވަރުގެ މީހަކަށް ވުމެވެ. މޫސަ އަކީ، އެތައް އަހަރެއް ވަންދެން ކުޅިވަރު ލިޔުއްވި ތަޖުރިބާކާރަކަށް ވާތީވެ، އޭނާގެ ލަފާ އާއި އިރުޝާދު ލިބުންވީ އައްޒާމުގެ ކުރިއެރުމަށް ލިބުނު ބޮޑު ފަހިކަމަކަށެވެ. އޭނާއާ އެކު "ހަވީރު" ގެ ސްޕޯޓްސް ޑިޕާޓްމަންޓުގައި ދެން ހުރި މުހައްމަދު ހަމްދޫނުގެ އެހީތެރިކަމާއި، ހިތްވަރަކީ ވެސް އައްޒާމް ދެކޭ ގޮތުގައި އޭނާގެ ކުރިއެރުމުގެ ސިއްރެކެވެ.

"ކެރިއަރެއް ފަށާއިރު މަގުދައްކާނެ ރަނގަޅު ބަޔަކު ތިބުމަކީ އެ މީހެއްގެ އެންމެ ބޮޑު ނަސީބު. އަޅުގަނޑަށް "ހަވީރު" ގައި މަގުދައްކައިދޭން މޫސަ އާއި ހަމްޓޫ (ހަމްދޫން) ތިބުމަކީ އަބަދަށް ވެސް އެކަމަށް ޝުކުރުވެރިވާނެ ކަމެއް،" އައްޒާމް ބުންޏެވެ.

ގަތަރުގައި 2022 ވަނަ އަަހަރު ބޭއްވި ފީފާ ވޯލްޑް ކަޕަށް ކޮކާކޯލާ އިން ގެންދިޔަ ނަސީބުވެރިންގެ ކަވަރޭޖް ކަވަރުކުރުމަށް ކުރި ދަތުރުގެ ތެރެއިން އައްޒާމް، ގަތަރުގެ ލުސައިލް ސްޓޭޑިއަމްގައި ރާއްޖޭގެ ދިދަ ހިފައިގެން.-

"ހަވީރު" ގެ ނޫސްވެރިއެއްގެ ގޮތުން އޭނާގެ އެންމެ ހާއްސަ އެއް ހަނދާނަކީ 2015 ވަނަ އަހަރު އިންޑިއާގެ ޓްރިވެންޑްރަމުގައި ބޭއްވި ސާފް ޗެމްޕިއަންޝިޕް ކަވަރުކުރުމެވެ. އެ މުބާރާތުގެ ތެރެއިން އިންޑިއާގެ ކެޕްޓަން ސުނިލް ޗެތުރީގެ “އެކްސްކޫލިވް އިންޓަވިއު”އެއް ވެސް ޒުވާން އައްޒާމް ނެގި އެވެ. އެ އަހަރު ގަލޮޅު ދަނޑުގެ ވިނަގަނޑު ހަލާކުވުމާ ގުޅިގެން، ޕްރެޒިޑެންޓްސް ކަޕް، ހދ. ކުޅުދުއްފުއްޓާއި އައްޑޫގައި ކުޅުނުއިރު، ކުޅުދުއްފުށީގައި ކުޅުނު މެޗުތައް ކަވަރުކުރަން އައްޒާމް އެ ރަށަށް ދިއުމުން، އެ ރަށުގައި މީހުން ދިން އިހުތިރާމް ވެސް އައްޒާމް ހަނދާން ހުރެ އެވެ. އަދި ހަވީރު ނޫހުގައި ކުރި މަސައްކަތްތަކަށް، 2016 ވަނަ އަހަރު އޭނާ އަށް އެންމެ މޮޅު ސްޕޯޓްސް ޖާނަލިސްޓުގެ މަގާމު ވެސް ލިބުނެވެ.

އެކަމަކު "ހަވީރު" ގައި އޭނާ އަށް މާގިނަ އަހަރުތަކެއް ހޭދަނުކުރެވެނީސް 2016 ވަނަ އަހަރު ސިވިލް ކޯޓުގެ ހުކުމަކާ ގުޅިގެން އެ ނޫސް ބަންދުކުރި އެވެ. އެ ހިސާބުން "ހަވީރު" ގެ މެނޭޖްމަންޓުން "މިހާރު" ނަމުގައި މުޅިން އާ ނޫހެއް ފެށި އެވެ. އެއީ އައްޒާމުގެ ކެރިއަރުގައި ވެސް އާ ފެށުމެކެވެ. އެ ނޫހުގައި އޭނާ ކުރި އެންމެ ރަނގަޅު އެއް މަސައްކަތަކީ ޑިޖިޓަލް ކޮންޓެންޓް އުފެއްދުމެވެ.

"މިހާރު" ގެ ސްޕޯޓްސް އަށް ހާއްސަކޮށް ހެދި ސޯޝަލް މީޑިއާ އެކައުންޓްތަކުން އޭރު ގެނެސްދިން އެ ކޮންޓެންޓްތަކަކީ އޭނާގެ އަމިއްލަ ޝައުގުވެރިކަމުގައި ކުރި މަސައްކަތްތަކެވެ.

އައްޒާމުގެ ކެރިއަރު އިތުރު މިސްރާބަކަށް އެނބުރުނީ 2021 ވަނަ އަހަރު، މުޅިން އާ ނޫހެއް ކަމަށްވާ "އަދަދު" އާ ގުޅުނު ހިސާބުންނެވެ. އާއްމުންނަށް މުޅިން އާ ނޫހެއްގައި، ސްޕޯޓްސް ޑިޕާޓްމަންޓް ސުމަކުން ފަށައިގެން އޭނާ ކުރި މަސައްކަތުން މިހާރު އެއީ ރާއްޖޭގެ އެންމެ މަގުބޫލު އެއް ސްޕޯޓްސް ކޮންޓެންޓް ގެނެސްދޭ މީޑިއާ އަށް ވަނީ ވެފަ އެވެ.

"އަޅުގަނޑު ވަރަށް ފަހުރުވެރިވޭ "މިހާރު" އާއި "އަދަދު" ގައި ކުރެވުނު މަސައްކަތްތަކަށް. އެއީ ދެ ތަނުގައި ވެސް ޒީރޯ އިން ފަށައިގެން އެ ހިސާބަށް ގެނައުމުގައި ހިއްސާ ވެވުނީ. ހާއްސަކޮށް "އަދަދު" ގެ ނަން ފާހަގަކޮށްލަން. އެއީ ސްޕޯޓްސް މުޅިން ވަކި އެންޓިޓީއެއްގެ ގޮތަށް ކުރިއަށް ގެންދަން އަޅުގަނޑަށް ފުރިހަމަ މިނިވަންކަމާއި، ބާރު މެނޭޖްމަންޓުން ދީފައި އޮތުމުން،" އައްޒާމް ބުންޏެވެ.

“އަދަދު”ގެ މެނޭޖްމަންޓާއި، ހުރިހާ ނޫސްވެރިން އައްޒާމަށް ކުރާ އިހުތިރާމް އަދި އޭނާއާ މެދު އޮންނަ ޔަގީންކަމަށްޓަކައި، އަބަދުވެސް ޝުކުރުވެރިވެ އެވެ.

"ވަރަށް ގިނަ މީހުންނާއެކު މަސައްކަތް ކުރެވިއްޖެ. އައްޒާމުގެ މުރާލިކަމާއި، ނޫސްވެރިކަމަށް އެ އޮންނަ ލޯބި އެއީ ހަމަ އަޖައިބެއް. އެއީ އަލަށް އުފެދޭ ނޫސްވެރިންނަށް ނަމޫނާއެއް. ބަދަލުވަމުންދާ ނޫސްވެރިކަމަށް އައްޒާމު ބަރާބަރަށް ފިޓު ވެސް އެބަވޭ. ކަންކަން ރާވައި ހިންގަން ވެސް އެއީ ނަމޫނާއެއް،" އަދަދު ނޫހުގެ ޗީފް އެޑިޓަރު ހުސައިން ފިޔާޒު މޫސާ ބުންޏެވެ.

2019 ވަނަ އަހަރު ނޭޕާލުގައި ބޭއްވި ސައުތު އޭޝިއަން ގޭމްސްގެ ތެރެއިން އައްޒާމް (ކ) އާއި އޭރު ޕީއެސްއެމްގައި މަަސައްކަތްކުރި ޒުވާން ނޫސްވެރިޔާ، ރާއިފް ޔޫސުފް.

އައްޒާމުގެ ކެރިއަރުގެ ކާމިޔާބީގެ އެންމެ ބޮޑު ސިއްރަކީ، އޭނާ ދެކޭ ގޮތުގައި އަބަދުވެސް އަމިއްލަ ނަފްސު ބިނާކުރަން ދޭ ސަމާލުކަމެވެ. ކާމިޔާބު މީހުންނާއި، ހާއްސަކޮށް ނާކާމިޔާބުވާ މީހުންނާ ގުޅޭ ފޮތްތައް ކިޔައި، ޑިޖިޓަލް ކޮންޓެންޓް ބަލައި، އޭނާ ކޮންމެ ދުވަހަކު ވެސް ހިތްވަރު ހޯދަ އެވެ. އޭނާގެ ކިބައިން ފެންނަ ބުރަކޮށް މަސައްކަތްކުރުމާއި، މަސައްކަތުގެ އަހުލާގު ހިފެހެއްޓުން އެއީ އެފަދަ މީސްމީހުންގެ ދިރިއުޅުމުން ހޯދާ އިބުރަތްތަކުން އަށަގަނެފައިވާ ކަންކަމެވެ.

"އަޅުގަނޑު ގަބޫލުކުރާ ގޮތުގައި އެ ދެ ކަންތައް، ބުރަކޮށް މަސައްކަތްކުރުމާއި، ޑިސިޕްލިން މެއިންޓެއިންކުރުން، މިއީ ކޮންމެ މީހެއްގެ ކިބައިގައި ވެސް ހުންނަން ޖެހޭ ކަންކަން ކާމިޔާބުވާން ބޭނުމިއްޔާ. އެ ދެކަންތައް ފުރިހަމަވެފައިވާ ނަމަ، ﷲ އިރާދަކުރެވިއްޔާ އެ މީހާ ދާނީ ވަރަށް ބާރު މިނުގައި ކުރިއަރައިގެން،" އައްޒާމް ބުންޏެވެ.

އާމްދަނީ ހޯދަން އެންމެ ކަމަކަށް ބަރޯސާވުމުގެ ހިތިކަން ކޮވިޑުގެ ތެރޭގައި ތަޖުރިބާކާރެވުމާ އެކު އަދި، ފާއިތުވާ ކޮންމެ ދުވަހަކާ އެކު މީހާގެ ގާބިލުކަން އިތުރުކުރުމުގެ މުހިއްމުކަން އިހުސާސްކުރެވޭތީ އައްޒާމް މިހާރު އަންނަނީ ދާއިރާގެ އެކިއެކި ހުނަރުތައް ދަސްކުރަމުންނެވެ. ކުރިން ހަމައެކަނި ކުޅިވަރު ލިޔުންތެރިއެއްގެ ގޮތުގައި ހުއްޓަސް މިހާރު އޭނާ އަކީ ސްޕޯޓްސް ޝޯ ހޯސްޓެކެވެ. އަދި ކޮމެންޓްރީ ދޭ މީހެއް ވެސް މެ އެވެ.

އެ ކަމުގައި އޭނާ ފެށުމަކީ 2021 ގެ ޔޫރޯ އަށް "އަދަދު" އިން ގެނެސްދިން ވެބްޝޯ އެވެ. އޭގެ ފަހުން، އައްޒާމް ވަނީ 2022 ވަނަ އަހަރުގެ ފީފާ ވޯލްޑް ކަޕުގައި އައިސްޓީވީން ގެނެސްދިން މެގަ ކަވަރޭޖް ހޯސްޓްކޮށްފަ އެވެ. މިހާރު އޭނާ އަކީ ރާއްޖޭގެ މަޝްހޫރު ދެ ފުޓްސަލް މުބާރާތް ކްލަބް މޯލްޑިވްސް ކަޕާއި ގޯލްޑަން ފުޓްސަލް ޗެލެންޖްގެ އެނަލިސްޓެއް އަދި ކޮމެންޓޭޓަރެކެވެ. މީގެ އިތުރުން، މޯލްޑިވްސް އޮލިމްޕިކް ކޮމިޓީގެ "އެމްއޯސީ ޓޯކްސް" ޝޯ ވެސް އޭނާ ހުށަހަޅައިދީފައިވެ އެވެ. މި ކަންކަމުގައި، ކުޅިވަރު ނޫސްވެރިންގެ ގޮތުގައި ޓީވީގައި ކާމިޔާބު މަސައްކަތްތަކެއް ކުރި، ރިމާހު އަހުމަދު އާއި ހަމްޒާ ރަޝީދު (ހަމްޓީ)ގެ އެހީތެރިކަމާއި އިރުޝާދު ލިބުމަކީ އައްޒާމް އުފަަލާ އެކު، ފާހަަގަކުރާ ކަމެކެވެ.

އޭޝިއާ އެތުލެޓިކްސް ރައީސް ގަތަރުގެ ދަހްލާން އަލް ހަމަދު (ވ)އާ އެކު އައްޒާމް ކުރިއަށްގެންދިޔަ އިންޓަވިއުއެއްގެ ތެރެއިން.

"އެ މީހުންގެ އެހީ ވަރަށް ރަނގަޅަށް ލިބުނު ޓީވީ ފޭސް އަކަށް ވާން، ދެން މިހާރު، ވަރަށް ހިތްހަމަޖެހޭ އާއްމުންގެ ފަރާތުން ލިބޭ ކޮމެންޓްސްތަކުން،" އައްޒާމް ބުންޏެވެ.

ރާއްޖޭން 2018 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރުން ހިމެނޭހެން، ކެރިއަރުގައި 17 ގައުމަކަށް ގޮސް 30 އަށް ވުރެ ގިނަ އިވެންޓް ކަވަރުކޮށްފައިވާ އައްޒާމުގެ ނޫސްވެރިކަމުގެ ހަޔާތުގައި މިދިޔަ އަހަރަކީ ވަރަށް ހާއްސަ އަހަރެކެވެ. އޭނާ އަށް ވަނީ ޓައިޓަން ސްޕޯޓްސް އާއި ފޮކްސް ސްޕޯޓްސް އޭޝިއާ އިން ހޮވާ އޭޝިއާގެ އެންމެ މޮޅު ފުޓްބޯޅަ ކުޅުންތެރިޔާ ހޮވާ މައި ޖަޖިން ޕެނަލުން ފުރުސަތު ލިބިފަ އެވެ.

އެކަމަކު، މިދިޔަ އަހަރު ހާއްސަވާ އެންމެ ބޮޑު ސަބަބަކީ މަޑަގަސްކަރައިގައި ބޭއްވި އިންޑިއަން އޯޝަން އައިލެންޑް ގޭމްސް ކަވަރުކުރަން ދިޔަ ދިވެހި ކޮންޓިންޖެންޓުގެ މީޑިއާ ޓީމުގެ ހެޑުކަން ކުރަން ފުރުސަތު ލިބުމެވެ.

"އަޅުގަނޑު ގާތު އޮލިމްޕިކް ކޮމިޓީން އެހީ އެ ޒިންމާ ނެގިދާނެހޭ؟ އަޅުގަނޑަކީ ކުރިއެރުމަށް ލިބޭ އެއްވެސް ފުރުސަތެއް ދޫކޮށްލާ މީހެއް ނޫން. އެހެންވެ އެ ޗެލެންޖް ނެގީ، އަލްހަމްދުލިއްލާހި ވަރަށް ހިތްހަމަޖެހޭ މަސައްކަތެއް ކުރެވުނު،"

އޭނާ ވަނީ ރާއްޖޭގެ ތަފާތު އެތައް މީޑިއާކުން 18 ނޫސްވެރިން ހިމެނުނު އެ ކޮންޓިންޖެންޓް ލީޑުކުރުމުގައި ނަމޫނާ ދައްކައިފަ އެވެ. އޭގެ ތެރެއިން ބައެއް މީހުންނަކީ އޭނާ ސްކޫލުގައި އުޅުނުއިރު ވެސް މި މަސައްކަތުގައި އުޅުނު މީހުންނެވެ. އެކަމަކު، އައްޒާމް ވަނީ އިހުތިރާމާ އެކު ލީޑާޝިޕް ދައްކައިފަ އެވެ. ހަމައެކަނި އެއެއް ވެސް ނޫނެވެ. ދުނިޔޭގެ އެންމެ ފަގީރު ގައުމުތަކުގެ ތެރޭ ހިމެނޭ މަޑަގަސްކަރައިގައި، އެ މީހުން ވާހަކަ ދައްކާ ފްރެންޗް ބަސް ނޭގުމުގެ އުނދަގުލާ އެކު، އަދި މަދު ވަސީލަތްތަކާ އެކު އައްޒާމާއި ޓީމު ވަނީ ރާއްޖޭން 28 މެޑަލް ހޯދިއިރު އެ މަންޒަރުތައް ލައިވް ސްޓްރީމްކޮށް ދިވެހިންނާ ހަމަޔަށް ފޯރުކޮށްދީފަ އެވެ.

"އެންމެ ހަނދާންވަނީ އެތުލެޓިކްސް ޓްރެކް ކައިރީ ހުރި ގެޔަކުން ކަރަންޓު ނަގައިގެން އެ އިވެންޓް ލައިވްކުރަން ކުރަން ޖެހުނު މަސައްކަތް،" މީޑިއާ ޓީމުގައި ހިމެނޭ މެމްބަރުންނާ އެކު ކުރެވުނު މުހިންމު މަސައްކަތެއް އައްޒާމް، ހަނދާން އާ ކުރި އެވެ.

މަޑަގަސްކަރާގައި 2023 ވަނަ އަހަރު ބޭއްވި އިންޑިއަން އޯޝަން އައިލެންޑް ގޭމްސްގައި މަސައްކަތްކުރި ރާއްޖޭގެ މީޑިއާ ޓީމު.

އައިއޯއައިޖީގެ މީޑިއާ ޓީމުގައި ހިމެނޭ ހުރިހާ ފަރާތަކުން އައްޒާމަށް ދިން އެއްބާރުލުން އޭނާ ހެޔޮހިތުން ގަބޫލުކުރެ އެވެ. އޭނާ އަށް ލީޑަޝިޕް ދައްކަން ފުރުސަތު ދިނީ، އެ މީޑިއާ ޓީމުންނެވެ.

މިދިޔަ އަހަރަކީ، އަމިއްލަ ދިރިއުޅުމުގައި ވަރަށް ހިތްދަތި ކަންކަމާ ކުރިމަތިލާން ވެސް ޖެހުނު އަހަރެކެވެ. މި މަސައްކަތް ހުއްޓާލައި، އާއިލާ ގާތަށް އެނބުރި ރަށަށް ދާން ވިސްނަން ޖެހޭހާ އޭނާގެ ނަފުސާނީ ހާލަތު ދަށްވާނެ ފަދަ ކަންކަން ދިމާވި އެވެ. އެކަމަކު، އާއިލާ މެމްބަރުންނާއި، އަންހެނުން، މަރިޔަމް ނަޝްވާ (ނަޝް) އަދި ގާތް އެކުވެރިންގެ އެހީތެރިކަމާ އެކު، އެ ކަމުން އަރައިގަތީ އެވެ. ކުރިން ކުރަމުން އައި ނޫސްވެރިކަމުގެ މަސައްކަތް އިތުރަށް ރަނގަޅުކުރަން ވެސް ހިތްވަރަަކަށްވީ އެވެ.

"އެ ހުރިހާ ކަމަކަށް ބަލާއިރު މިދިޔަ އަހަރަކީ ކެރިއަރުގެ އެންމެ ހާއްސަ އަހަރު. އަމިއްލަ ދިރިއުޅުމުގައި ދިމާވި ކަންކަމުން އަރައިގަނެ، ނޫސްވެރިކަން އެހެން ހަރުފަތަކަށް ގެންދަން އެ ލިބުނު ހިތްވަރު، އެ ގޮތަށް ބަލާއިރު، އިންޑިއަން އޯޝަން އައިލެންޑް ގޭމްސްގައި އެ ކުރެވުނު މަސައްކަތް އަބަދަށް ހަނދާނުގައި ހުންނާނެ،" އައްޒާމް ބުންޏެވެ.

މީގެ އިތުރުން، ރާއްޖޭގައި އެންމެ ހަލުވި ދުވެލީގައި ކުރިއަރާފައި އޮތް ފުޓްސަލްގެ ބޮޑު ދެ މުބާރާތް ކަމަށްވާ ކްލަބް މޯލްޑިވްސް ކަޕާއި ގޯލްޑަން ފުޓްސަލް ޗެލެންޖްގެ އިންތިޒާމީ ކަންކަމުގައި އެކި ލެވަލްގައި މަސައްކަތްކުރަން ދީފައިވާ ފުރުސަތަށްޓަކައި ވެސް އޭނާ އުފާކުރެ އެވެ.

ކުޅިވަރު އާއިލާ އަށް، ކުޅިވަރު ބެލުންތެރިންނަށް، އަދި ކުޅިވަރު ކިއުންތެރިންނަށް އައްޒާމުގެ ކެރިއަރުގެ ކޮންމެ ދުވަހެއް ވެސް އެހާމެ ހާއްސަ އެވެ. އޭގެން ކޮންމެ ދުވަހަކީ އޭނާ ކުޅިވަރަށް އަގުހުރި ހިދުމަތެއް ކޮށްދިން ދުވަހެކެވެ. ކުޅިވަރުގައި ހިނގާ ނުހިނގާ ކަންކަން މުޅި ރާއްޖެ އަށް ގެނެސްދޭން އޭނާ ކުރަމުން އަންނަނީ އެހާ ވެސް އަގުހުރި މަސައްކަތްތަކެކެވެ.