އިންޑިއާގެ އެހީގައި ރާއްޖޭގައި އިތުރު ރާޑަރުތަކެއް ބަހައްޓަން ދެގައުމުގެ ސަރުކާރުން އެއްބަސްވެއްޖެ އެވެ،

މިކަމަށް އެއްބަސްވިކަން ރައީސް އޮފީހުން ހާމަކުރީ ރައީސް ޑރ. މުހައްމަދު މުއިއްޒު މިހާރު އިންޑިއާއަށް ކުރައްވަމުން ގެންދަވާ ދަތުރުގެ ތެރެއިން އިއްޔެ ރާއްޖެ އަދި އިންޑިއާއިން ސޮއިކުރި އިކޮނޮމިކް އެންޑް މެރިޓައިމް ސެކުއިރިޓީ ޕާޓްނަޝިމް އެއްބަސްވުމާ ގުޅޭގޮތުން ނެރުނު ބަޔާނެއްގަ އެވެ.

އެ ބަޔާނުގައިވާ ގޮތުން، އާ އެއްބަސްވުމުގެ ދަށުން ރާއްޖޭގެ ކަނޑުގެ ސަރަހައްދު ބެލެހެއްޓުމުގައި އެމްއެންޑީއެފް އަށް ރާޑަރު ސިސްޓަމުތަކާއި އެކަމަށް ބޭނުންވާ އިތުރު އާލާތްތައް އިންޑިއާއިން ފޯރުކޮށްދޭނެ ކަމަށެވެ. ނަމަވެސް ފޯރުކޮށްދޭ ރާޑަރު ސިސްޓަމުތަކުގެ އަދަދެއް ހާމައެއް ނުކުރެ އެވެ.

ނިމިދިޔަ އެމްޑީޕީ ސަރުކާރުން އިންޑިއާއާއެކު ސޮއިކުރި އެއްބަސްވުމެއްގެ ދަށުން އެ ގައުމުން ވަނީ ރާއްޖޭގެ 10 ސަރަހައްދެއްގައި ކޯސްޓަލް ރާޑަރު ސިސްޓަމުތަކެއް ވަނީ ހަރުކޮށްފަ އެވެ. އެ ސިސްޓަމުތައް ބަލަހައްޓަނީ ދިވެހި ސިފައިން ކަމަށް ސަރުކާރުން އޭރު ބުންޏެވެ.

ނަމަވެސް އޭރު އިދިކޮޅުގައި ތިބި މި ސަރުކާރުގެ އިސްވެރިން ވަނީ އެ ސިސްޓަމުތައް އޮޕަރޭޓުކުރަނީ އިންޑިއާގެ ސިފައިން ކަމަށާއި އެ ތަންތަނުން ލިބޭ މައުލޫމާތު އިންޑިއާއާ ހިއްސާކުރާ ކަމަށް ބުނެ އެމްޑީޕީ ސަރުކާރަށް ތަކުރާރުކޮށް ފާޑުކިޔާފަ އެވެ.

އަދި، ޕީއެންސީގެ ސަރުކާރެއްގައި ރާޑަރު އެއްބަސްވުން ހިމެނޭހެން އިންޑިއާއާއެކު ހަދާފައިވާ އެއްބަސްވުންތައް ބާތިލުކޮށް އިއުލާނުކުރާނެ ކަމަށް ރައީސް މުއިއްޒު ރިޔާސީ އިންތިހާބުގެ ކެމްޕޭނުގައި ވައުދުވެވަޑައިގެންފައިވެސް ވެ އެވެ.

"އެހެންވީމާ ފުރަތަމަ ކަމަކަށް އަޅުގަނޑުމެން ކުރާނެ ކަމަކީ އެގްރިމަންޓް ބަލާނީ. ބަލާފައި އެއީ ދިވެހި ގައުމަށް، މިނިވަންކަމަށ،ް ނުރައްކާވާ ކަމަށް ވެއްޖެއްޔާ، ހަމަ އެކަން ބާތިލުކޮށް، އެގްރިމަންޓް އަޅުގަނޑުމެން ބާތިލުކޮށ،ް އުތުރުތިލަފަޅު އިރާދަކުރެއްވިއްޔާ އަޅުގަނޑުމެން ސަލާމަތް ކުރާނަން،" ސެޕްޓެމްބަރު 2، 2023 ގައި ރިޔާސީ ކެންޑިޑޭޓުގެ ގޮތުގައި ހުންނަވާ ރައީސް ވިދާޅުވި އެވެ.

ނަމަވެސް މި ސަރުކާރަށް 10 މަސް ވެގެންދާއިރު އެ ރާޑަރުތަކާ ގުޅޭ އެއްބަސްވުން ވައުދާ އެއްގޮތަށް ހާމަކޮށްފައެއް ނުވެ އެވެ. އަދި އެ ރާޑަރުތައް ކޮންޓްރޯލްކުރާ ފަރާތްތަކުގެ މައުލޫމާތުވެސް ސަރުކާރުން ހާމަކޮށްފައެއް ނުވެ އެވެ.

މީގެއިތުރުން، ދިވެހިންގެ ކަނޑުގެ ސަރަހައްދު އަމިއްލައަށް ބެލެހެއްޓުމަށް ކަމަށް ބުނެ މި ސަރުކާރުން ވަނީ ތުރުކީން އަސްކަރީ ޑްރޯންތަކެއްވެސް ގަނެފަ އެވެ. ދައުލަތުގެ ބަޖެޓުން 37 މިލިއަން ޑޮލަރު ހަރަދުކޮށްގެން ގަތް ޑްރޯންތައް ބޭނުންކޮށްގެން ރާއްޖޭގެ ކަނޑުގެ ސަރަހައްދު އެމްއެންޑީއެފް އަށް ބެލެހެއްޓޭނެ ކަމަށްވެސް ރައީސް މީގެ ކުރިން ވަނީ ވިދާޅުވެފަ އެވެ.