ކިންސުގީ (kintsugi) އަކީ ޖަޕާނުގައި ބޭނުންކުރާ ޒަމާންވީ ފަންނެކެވެ. މަށިން ހަދާފައިވާ ކަންވާރު ފަދަ ތަކެތި ހަލާކުވުމުން އެތަކެތި އެއްލާލުމުގެ ބަދަލުގައި ޖަޕާނުގެ ސަގާފަތުގައި ކަންކުރާ ގޮތަކީ ކިންސުގީ ފަންނުގެ ތެރެއިން އެތަކެތި މަރާމާތުކުރުމެވެ. އެއީ މުޅިން ހަލާކުވެފައިވާ އެތީގެ ވަކިވަކި ބައިތައް އަލުން ގުޅުވާއިރު ރަން ބޭނުންކުރުމުގެ ފަންނެވެ.

ކިންސުގީގެ އަސްލަކީ ކޮންމެ އެއްޗެއްގެ ވެސް ތާރީހު ބަލައިގަތުމާއި، ދުނިޔޭގައި އެ އެއްޗެއް ކޮށްފައިވާ ދިގު ދަތުރުގެ ލިސާންތައް ގަބޫލުކުރުމެވެ. ހަލާކުވެފައިވާ ކަންވާރު މަރާމާތުކުރުމަށް ރަނުން ފުރާލާފައިވާ ކޮންމެ ރެނދެއް ވެސް ބުނެދެނީ ވާހަކައެކެވެ. އޭގައި ހުރި ރަނުގެ ބެއްދުންތަކުން ހަނދާންކޮށްދެނީ ލިބުނު ގެއްލުންތައް އޭގެ ފުރިހަމަ ގޮތުގައި މަރާމާތުކޮށްލުމުން ރީތިކަމާއި ބާރުވެރިކަން އުފެދިދާނެކަމެވެ. ދުނިޔޭގެ އާދައަކީ ފުރިހަމަކަމަށް ލޯބި ކުރުމެވެ. އެހެން ނަމަވެސް ކިންސުގީން ހިތްވަރުދެނީ ދިރިއުޅުމުގައި ލިބުނު އަނިޔާތަކާއި، ހުރި އުނިކަމުގެ ވެސް އަގު ދެނެގަތުމަށެވެ. މަށީގެ ކަންވާރެއް ކަމުގައިވިޔަސް، އަދި އިންސާނީ ގުޅުންތަކުގައި ވިޔަސް ވެހެވެ.

ބުނެވޭ ގޮތުގައި ޖަޕާނުގައި މި ފަންނު ފެށުނީ މީލާދީން 1449 އިން 1473 އަށް ރަސްކަން ކުރި އަޝިކަގަ ޔޮޝިމަސާގެ ވެރިކަމުގެ ދުވަސްވަރު އެވެ. އޭރު ޗައިނާއިން އެ ރަދުންނަށް ވެދުމަށް ފޮނުވި މަށީގެ ކަންވާރެއް ތަޅައިގެން ދިޔައީ އެވެ. އާދައިގެ ކަންވާރަކަށް ވީނަމަވެސް އެ އެއްޗެއް ވެފައިވީ ރަސްގެފާނުގެ އަރިހުގައި ޖަޒުބާތީ އަގެއް އޮތް އެއްޗެއް ކަމުގަ އެވެ. އެހެންވެ، އެ ކަންވާރު މަރާމާތުކުރެވޭތޯ ޗައިނާއަށް ފޮނުވީ އެވެ. ދުވަސްގަނޑަކަށްފަހު އެ ކަންވާރު މަރާމާތުކުރުމަށްފަހު އަނބުރާ ފޮނުވިއިރު، މަރާމާތުކުރުމަށް ކޮށްފައި ހުރި މަސައްކަތްތައް ވީ އެ ކަންވާރުގެ އައިބުކަން ލޮލަށް ދައްކައި، އެ ކަންވާރުގެ އަގު ދަށްކޮށްލި ކަމަކަށެވެ. އެހެންވެ، އެ މަސައްކަތާމެދު ރަސްގެފާނު ހިތްޕުޅާ ނުވުމުން އަލުން އެ މަސައްކަތް ކުރުމަށް އަމުރުކުރެއްވި އެވެ. ޖަޕާނުގެ ފަންނުވެރިން އެ މަސައްކަތާ ހަވާލުވެ، އެ ތަށީގައި ގުޅުވާފައި ހުރި ބައިތައް ބެއްދުމަށް ރަން ބޭނުންކުރި އެވެ. މިއީ ކިންސޫގީ ފަންނުގެ ފެށުމެވެ.

'ކިންސޫގީ' މި ބަސް އުފެދިފައި އެވަނީ ޖަޕާނުގެ ދެ ބަހަކުންނެވެ. އެއީ 'ކިން' (KINT) އާއި ސުގީ (SUGI) އެވެ. ކިންގެ މާނައަކީ ރަނެވެ. ސޫގީއަކީ ބެއްދުންތައް ނުވަތަ ގުޅުވުންތަކެވެ. އެހެންވީމާ މި ބަހުގެ ޖުމުލަ މާނައަކަށް ވަނީ ރަނުގެ ބެއްދުންތަކެވެ. ފަލްސަފާގައި ކިންސޫގީ އެއްގޮތްވަނީ ޖަޕާނުގެ ވާބީ-ސާބީ ފަލްސަފާއާ އެވެ. ވާބީ-ސާބީ ފަލްސަފާ ހިތްވަރު ދެނީ ދިރިއުޅުމުގައި ހުރި އުނިކަންކަމާއި، ފުރިހަމަނޫންކަން އޭގެ ގޮތުގައި ބަލައިގަތުމަށެވެ. އެއްޗެއްގައި ހުންނަ އުނިކަމަކީ އެ އެއްޗެއްގެ އަގު ދަށްވެ، ބޭކާރު އެއްޗަކަށް ވެގެންދާންޖެހޭނޭ ސަބަބެއް ނޫންކަމާއި، އެ އުނިކަން އޭގެ ގޮތުގައި ބަލައިގަތުމަކީ ދިރިއުޅުން ފަސޭހަވެގެންދާނޭ މަގެއްކަމަށް ވާބީ-ސާބީ ފަލްސަފާ ބުނެދެ އެވެ.

ކިންސުގީގައި، ރަނުން ފާޅުކޮށް ދައްކުވައިދެނީ ހަމައެކަނި މަރާމާތާއި ބެއްދުންތަކެއް ނޫނެވެ. ރެނދުތައް ގުޅުވުމަށް ބޭނުންކޮށްފައިހުރި ރަނުން ހަގީގަތުގައި ބުނެދެނީ ފުރިހަމަ ނޫން ކަންކަމާއި، އައިބުތަކުން ފާޅުވާ ރީތިކަމެވެ. ހަލާކުވެފައި އޮތް މަށީގެ ކަންވާރުގެ އަގުއަރުވައި، ކުރިއަށްވުރެވެސް ބޮޑު ފުރިހަމަކަމަކާއި ރީތިކަމެއް ގެނެސްދިނީ އޭގެ ބެއްދުންތަކުގެ ފުރިހަމަ ކަމުންނެވެ.

ހަލާކުފައިވާ މުށި ތަށްޓެއް ބައްދަނީ. -- ފޮޓޯ: ފޯބް

މި ފަލްސަފާ އިންސާނީ ދިރިއުޅުމާ އަޅުވައިބަލާއިރު ބުނެދެނީ ހީނަރުވުމަށްފަހު އަލުން އާރޯވާ ގުޅުމުގެ ބާރުގަދަ ކަމާއި އަގުބޮޑުކަމެވެ. އެހެންނަމަވެސް އެ އަގުބޮޑުކަމާއި، ރީތިކަމާއި ބާރުވެރިކަން އަންނާނީ އެ ގުޅުން އިއާދަކުރުމަށް ބޭނުންކުރާ އުސްލޫބަކުންނެވެ. ހަގީގަތް އޮޅުން ފިލުވައި ދިނުމާއި، ކުށް ގަބޫލުކުރުމާއި، އިހުތިރާމުގެ މައްޗަށް ބިނާކޮށް ގުޅުން އިއާދަކުރެވިއްޖެނަމަ އެ ކުރެވުނީ ކިންސޫގީ މަރާމާތެކެވެ. އެ ގުޅުންތަކުގައިވާ "ރަން" އެއީ ދަސްވާ ފިލާވަޅުތަކާއި، އިތުރަށް ބަދަހިވާ އިތުބާރާއި، އެކުގައި ހޯދާ ތަޖުރިބާތަކެވެ.

އޮޅުންތަކާއި، ދެބަސްވުމާއި ހިތްދަތިކަމަކީ އިންސާނީ ތަޖުރިބާގެ ބައެކެވެ. މި ގޮންޖެހުންތަކަކީ ނާކާމިޔާބީތަކެއްގެ ގޮތުގައި ދެކުމުގެ ބަދަލުގައި، ކިންސުގީން އުނގަންނައިދެނީ އެއީ ކުރިއެރުމާއި ފުންކޮށް ދެނެގަތުމުގެ ފުރުސަތުތަކެއްގެ ގޮތުގައި ދެކުމަށެވެ. ހަލާކުވީ ގުޅުންތައް ރަނުން މަރާމާތުކޮށްގެން އައު ފެށުމަކުން ފަށާއިރު ގުޅުންތަކުގައި ހުރި ހިލާފުތަކާއި، ހުރަސްކޮށްގެން ނުވާނެ ރޮނގުތައް އެ ގުޅުމުގެ ބައިވެރިންނަށް ސާފުވާނެ އެވެ. އަދި ކުރިން ވެދިޔަގޮތުގެ ތާރީހާއި، މަރާމާތުކުރުމަށް އުފުލި ތަކުލީފުގެ މަންޒަރުވެސް ލޮލަށް ފާޅުވާނެ އެވެ. ނަތީޖާއަކީ ކުރިން ދެވުނު މިންވަރަށްވުރެ އިތުރަށް ސަމާލުކަން ދެވި އެ އަގުބޮޑު މުދަލާމެދު ރައްކާތެރިވުމަށް އަބަދުމެ ހަނދާންވުމެވެ.