މެޑްރިޑް (ސެޕްޓެމްބަރު 22) - ރެއާލް މެޑްރިޑާ މި ސީޒަނުގައި ގުޅުނު ފްރާންސްގެ ތަރި، ކީލިއަން އެމްބާޕޭ، ސްޕެނިޝް ލީގުގައި އެންމެ ފަހުން ކުޅުނު ތިން މެޗުން ހަތަރު ވަނަ ލަަނޑު ޖެހިއިރު، ރެއާލްގެ ސިސްޓަމަށް އޭނާ މަޑުމަޑުން ހޭނެމުން އަންނަ ކަމަށް ރެއާލްގެ ކޯޗު ކާލޯ އަންޗެލޮޓީ ބުނެފި އެވެ.

ޕީއެސްޖީ ދޫކޮށް ބޮޑު ކޮންޓްރެކްޓެއްގައި ރެއާލަށް ސޮއިކުރި އެމްބާޕޭ އެ ޓީމަށް ކުޅުނު ފުރަތަމަ މެޗުގައި ޔުއެފާ ސުޕަ ކަޕްގައި ވަނީ އެޓަލަންޓާ ކޮޅަށް ލަނޑު ޖަހައިފަ އެވެ. އެކަމަކު، ސްޕެނިޝް ލީގުގައި ލަނޑެއް ޖަހަން މުއްދަތެއް ހޭދަކުރަން ޖެހި ފާޑުކިޔުން އަމާޒުވި އެވެ. އެކަމަކު، އޭނާ ވަނީ ލީގުގައި އެންމެ ފަހުން ކުޅުނު ތިން މެޗުގައި ހަތަރު ލަނޑު ޖަހައިފަ އެވެ. މިއީ، ރެއާލަށް ޖުމްލަ އެކު ކުޅުނު އަށް މެޗުން އޭނާ ޖެހި ހަ ވަނަ ލަނޑެވެ.

"އަހަރެން ވަރަށް ހިތްހަަމަޖެހޭ އެމްބާޕޭގެ މަސައްކަތާ މެދު، ވީހާވެސް ގިނައިިން ލަނޑު ޖެހި ވަރަކަށް އޭނާ ޓީމަށް ހޭނުން އަވަސްވާނެ، މިހާރު އެ ދަނީ މަޑުމަޑުން ވިޔަސް ބޭނުންވާ ރަނގަޅު މިސްރާބަށް،" އަންޗެލޮޓީ ބުންޏެވެ.

އެސްޕަންޔޯލް އަތުން ރޭ ރެއާލް އަމިއްލަ ދަނޑުގައި މޮޅުވީ، 4-1 އިންނެވެ. މި މެޗުގައި އެމްބާޕޭ ލަނޑު ޖެހީ އިތުރު ވަގުުތުގައި ޕެނަލްޓީ އަކުންނެވެ. އޭގެކުރިން، ޑެނީ ކާވަހާލް، ރޮޑްރީގޯ އަދި ވިނީޝިއުސް ޖޫނިއާ ލަނޑު ޖެހި އެވެ. އެސްޕަންޔޯލްގެ ލަނޑަކީ، ރެއާލްގެ ކީޕަރު، ތިބޯ ކޯޓުއާ އަތުން ބައިކޮޅަށް ވަން ގޯލެކެވެ.