ނ. ހޮޅުދޫގައި ޒަހަމްތަކަކާއެކު މަރުވެފައި އޮއްވާ ފެނުނު މީހާގެ ހަށިގަނޑު ޕޯސްޓްމޯޓަމް ހެދުމަށް މާލެ ގެންނަން ނިންމައިފި އެވެ.

އެ ރަށު ނިއުލައިފް، ޒަކިއްޔާ މޫސާ، 50، މަރުވެފައި އޮއްވާ ފެނުނީ އޭނާ ދިރިއުޅޭ ގޭގެ ގޯތި ތެރެއިން މިއަދު ހެނދުނު އެވެ.

ހޮޅުދޫއިން "އަދަދު" އަށް މައުލޫމާތު ދިން މީހަކު ބުނި ގޮތުގައި ޒަކިއްޔާގެ ހަށިގަނޑު މާލެ ގެންދަނީ ލޯންޗެއްގައި ކަމަށާއި، އެ ލޯންޗު މިހާރު ފުރާފައިވާ ކަމަށެވެ.

ޕޯސްޓްމޯޓަމް ހެދޭނެ ގޮތެއް ރާއްޖޭގައި ނެތުމުން، މަރުގެ މައްސަލަތަކުގައި މީހުންގެ ހަށިގަނޑު ޕޯސްޓުމޯޓަމް ހެދުމަށް ގެންދަނީ އިންޑިއާ އަށެވެ.

ޒަކިއްޔާގެ މަރުގެ މައްސަލައާ ގުޅިގެން މާލެއިން ފުލުހުންގެ ހާއްސަ ޓީމެއްވެސް ވަނީ ހޮޅުދޫއަށް ގޮސްފަ އެވެ. އެ ޓީމުން މިހާރު ދަނީ މި މައްސަލަ ތަހުގީގުކުރަމުންނެވެ. ޒަކިއްޔާގެ ހަށިގަނޑު ފެނުނު ގޯތި ހިމެނޭ ސަރަހައްދު ތަހުގީގުގެ ބޭނުމަށް އަދިވެސް ވަނީ ބަންދުކޮށްފަ އެވެ.

ޒަހަމްތައް ހުރީ ޒަކިއްޔާގެ ކަރުގައި ކަމަށް މަންޒަރު ފެނުނު މީހުން ބުންޏެވެ. އޭނާ ފެނުނުއިރު ކައިރީގައި ވަޅިއެއް އޮތް ކަމަށް މައުލޫމާތު ދިން މީހުން ބުންޏެވެ.

މި މައްސަލައާ ގުޅިގެން އެއްވެސް މީހަކު މިހާތަނަށް ހައްޔަރުކޮށްފައި ނުވާ ކަމަށް ފުލުހުން މިރޭ ބުނެފައިވެ އެވެ.