ސިޔާސީ މަންފާ ހާސިލުކުރުމުގެ ގޮތުން އިގުތިސޯދުގެ ތަފާސްހިސާބުތައް އޮޅުވައިލުމަކީ ފަހުން ބޮޑެތި ގެއްލުންތަކެއް ވާނެ ކަމެއް ކަމަށް ކުރީގެ އިކޮނޮމިކް މިނިސްޓަރު އަހްމަދު މުހައްމަދު ވިދާޅުވެއްޖެ އެވެ.

ރާއްޖޭގެ އިގުތިސޯދު ރަނގަޅު ނަމަވެސް ދައުލަތުގެ މާލީ ހާލަތު ގޯސްވެ ގޮންޖެހުންތަކާ ކުރިމަތިލާން ވަނީ ޖެހިފަ އެވެ. ގަވާއިދުން ޝާއިއު ކުރަމުންދިޔަ ދައުލަތުގެ މާލީ ހިސާބުތަކާ ބެހޭ ރިޕޯޓުތައް އާންމުކުރުން ވެސް ވަނީ ހުއްޓާލާފަ އެވެ.

އިގުތިސޯދީ ކަންކަމުގައި އިތުބާރުގެ މުހިންމުކަން ބަޔާން ކުރުމުގެ ގޮތުން އެކްސްގައި އަހްމަދު ވިދާޅުވީ އެފަދަ ހިސާބުތައް "އޮޅުވާލައިގެން" ކުރު ރާސްތާގައި އާންމުން ހަމަހިމޭންކޮށް ތިބެދާނެ ކަމަށެވެ.

"ނަމަވެސް އެކަމުގެ ސަބަބުން އިތުބާރު ގެއްލި، އިންވެސްޓަރުންނަށް [ހާލަތު] އޮޅި، ހަގީގަތް ހާމަވުމުން ދިގު މުއްދަތުގައި ހަމަޖެހުން އޮތުމަށް ހުރަސް އެޅޭ," އެކްސްގައި ކުރެއްވި ޕޯސްޓެއްގައި އަހްމަދު ވިދާޅުވި އެވެ.

ފިނޭންސް މިިނިސްޓްރީން އެންމެ ފަހުން ވީކްލީ ފިސްކަލް ޑިވެލޮޕްމަންޓް ރިޕޯޓެއް އާންމުކުރީ މީގެ 81 ދުވަސް ކުރިން، ޖޫން 20 ގަ އެވެ.

މާލީ ހިސާބުތަކުގެ ރިޕޯޓުތައް އާންމު ކުރުން ފިނޭންސުން ހުއްޓާލާފައިވާއިރު، ގައުމުގެ މާލީ މުސްތަގުބަލާ މެދު ގިނަ ކަންބޮޑުވުންތަކެއް އެބަހުއްޓެވެ.