ކައުންސިލްތަކުގެ ބާރު ކުޑަކުރަން ފަރުމާކޮށްފައިވާ ކަމަށް ބުނެ އިދިކޮޅާއި ކައުންސިލްތަކުން ކަންބޮޑުވުން ފާޅުކުރި ލާމަރުކަޒީ ބިލާއި ބިނާވެށި ޕްލޭންކުރުމުގެ ބިލު ރައީސް ޑރ. މުހައްމަދު މުއިއްޒު ތަސްދީގު ކުރައްވައިފި އެވެ.

ސަރުކާރުން ފަރުމާކޮށް މަޖިލީހަށް ހުށަހެޅި މި ދެ ބިލު މިހާރު ވަނީ ގެޒެޓު ވެސް ކޮށްފަ އެވެ.

މީގެ ތެރެއިން، ބިނާވެށި ޕްލޭންކުރުމާއި ހިންގުމުގެ ބިލު ތަސްދީގު ނުކުރަން ކައުންސިލުތަކުގެ ޖަމިއްޔާ، މޯލްޑިވްސް ލޯކަލް ކައުންސިލް އެސޯސިއޭޝަން (އެމްއެލްސީއޭ) އިން ރައީސް އަށް ގޮވާލީ އޮގަސްޓު 26، ގަ އެވެ.

އެމްއެލްސީއޭ އިން އެ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނ. އަތޮޅު ކައުންސިލުގެ ރައީސް މުހައްމަދު ބަޝީރު ވިދާޅުވީ ވަޒީރަށާއި މަޖިލިސް މެންބަރުންނަށް ވެސް ބިލުގައިވާ އެއްޗެއް ރަނގަޅަށް ނޭނގޭ ކަމަށެވެ. އަދި މި ބިލު ތަސްދީގު ނުކޮށް އަލުން މަޝްވަރާކުރުމަށް އެ އެސޯސިއޭޝަންގެ ފަރާތުން އޭނާ ގޮވާލެއްވި އެވެ. އެކަމާ ގުޅިގެން އެމްއެލްސީއޭ އާ ރައީސް ބައްދަލުކުރެއްވި ކަމެއް ނޭނގެ އެވެ.

މިއަދު ދެވަނައަށް ތަސްދީގުކުރި ބިލަކީ، ބިނާވެށީގެ ބިލަށް ބާރު ދިނުމަށް ލާމަރުކަޒީ ގާނޫނަށް އިސްލާހު ގެނައުމުގެ ގޮތުން ސަރުކާރުން މަޖިލީހަށް ހުށަހަޅާ ފާސްކުރި ބިލެކެވެ. އެ ބިލު ގާނޫނަކަށް ވުމާއެކު، މިހާރު ކައުންސިލްތަކުން އެކުލަވާލާ ލޭންޑް ޔޫސް ޕްލޭނުތައް ވެގެންދާނީ ބިނާވެށީގެ ބިލުގެ ދަށުން ހަދާ ފިޒިކަލް ޑިވެލޮޕްމަންޓު ޕްލޭނުގެ ބަޔަކަށެވެ.

މި ބިލުތައް ލުތައް ދިރާސާ ކުރުމަށް ކޮމިޓީތަކުން ކުރި މަސައްކަތުގެ ތެރޭގައި ފާހަގަކޮށްލެވޭ އެއްވެސް އިސްލާހެއް ގެނެސްފައެއް ނުވެ އެވެ.

މަޖިލީހުގެ ޖުމްލަ 79 މެންބަރުންނާއެކު ސަރުކާރަށް ފުރިހަމަ ތާއީދު އޮތްއިރު، ސަރުކާރުން ހުށަހަޅާ ކަންކަން އިސްލާހެއް ނެތި ފާސްކުރާތީ އިދިކޮޅުން މަޖިލީހަށް ފާޑުކިޔަ އެވެ. ނަމަވެސް މަޖިލީހުގެ ޕީއެންސީ މެންބަރުން ތަކުރާރުކޮށް ވިދާޅުވަނީ މިއީ ނަމޫނާ މަޖިލީހެއް ކަމަށެވެ.