ޓިއުރިން، އިޓަލީ (ސެޕްޓެމްބަރު 4) - ދާދި ފަހުން ޔުވެންޓަސް ދޫކޮށް ލިވަޕޫލަށް ބަދަލުވި، ފެޑެރީކޯ ކިއޭސާ އެދިގެން އޭނާ އަށް އިޓަލީގެ ގައުމީ ފުޓްބޯޅަ ޓީމުން ބްރޭކެއް ދީފި އެވެ.

ކިއޭސާ ޖުމްލަ އެކު، 13 މިލިއަން ޑޮލަރަށް ލިވަޕޫލަށް ސޮއިކުރިއިރު، ލިވަޕޫލްގެ ކޯޗު، އާނާ ސްލޮޓް ވަނީ ކިއޭސާ އަށް ފިޓްނަސް ޕްރޮގްރާމެއް ރޭވިފައިވާ ކަމަށް ބުނެފަ އެވެ.

އެއީ، ކިއޭސާ، ޔުވެންޓަސްގެ ޓީމު ޓްރެއިނިންތަކުގައި ބައިވެރިވެފައިނުވާތީވެ، ފިޓްނަސް އަށް އަސަރުކޮށްފައިވާތީ ކަމަށް ސްލޮޓް ވަނީ ފާހަގަކޮށްފަ އެވެ.

އަންނަ މަހު ކުޅޭ ޔުއެފާ ނޭޝަންސް ލީގުގެ މެޗުތަކަށް އިޓަލީގެ ކޯޗު ލޫޝިއާނޯ ސްޕަލެއްޓީ ނެގި ސްކޮޑުގައި ކިއޭސާ ނުހިމެނެ އެވެ.

ފުޓްބޯލް އިޓާލިއާ އަށް ދިން އިންޓަވިއުއެއްގައި ސްޕަލެއްޓީ ބުނީ، ކިއޭސާ އަށް އިޓަލީ ސްކޮޑުން ފުރުސަތު ދޭން އަބަދުވެސް ތައްޔާރު ކަމަށެވެ. އެ ގޮތުން، މެޗުތަކުގައި ބޭނުންނުކޮށް، ޓީމުގައި އިތުރު ކުޅުންތެރިއެއްގެ ގޮތުގައި ވެސް ޓްރެއިނިން އަށް ގެންނަން ބޭނުންވާ ކަމަށް ވެސް ސްޕަލެއްޓީ ވަނީ ބުނެފަ އެވެ.

"އެކަމަކު، އަހަރެން ކިއޭސާއާ އެކު ދެއްކި ވާހަކަތަކުން، އޭނާ ކިޔައިދިން އާ ކްލަބް (ލިވަޕޫލް)ގެ ކަންކަން މި ވަގުތު ހަމަޖައްސައި ޓްރެއިިނިން ޕްރޮގްރާމެއް އޮތުމުން، އެ އަށް ފޯކަސް ކުރަން ބޭނުންވާ ކަމަށް،" ސްޕަލެއްޓީ ބުންޏެވެ.

ސްޕަލެއްޓީ ވަނީ ދާދި ފަހުން، 10 މަސް ދުވަހަށް ފަހު ކުޅުމަށް އެނބުރި އައި ނިއުކާސަލް ޔުނައިޓެޑްގެ މިޑްފީލްޑަރު، ސަންޑްރޯ ޓޮނާލީ އަށް ފުރުސަތު ދީފަ އެވެ. ސްޕަލެއްޓީ ބުނީ، ބެޓިންގައި ބައިވެރިވެފައިވާތީ ޓޮނާލީ އަށް އައި ސަސްޕެންޝަން މުއްދަތުގައި ވެސް އޭނާ އައީ ޓްރެއިނިން ކުރިއަށް ގެންދަމުން ކަމަށެވެ.