ޓިއުރިން (އޮގަސްޓް 28) - ޔުވެންޓަސް އަށް ކުޅޭ އިޓަލީ ގައުމީ ޓީމުގެ ފޯވާޑް، ފެޑެރީކޯ ކިއޭސާ، 13 މިލިއަން ޑޮލަރަށް އިނގިރޭސި ގަދަބާރު ލިވަޕޫލަށް ވިއްކާލުމަށް ދެ ކްލަބުން އެއްބަސްވުމަކަށް އަތުވެއްޖެ އެވެ.

ޔުވެންޓަސްގެ ކޯޗުކަމާ ތިއާގޯ މޮޓާ ހަވާލުވުމަށް ފަހު އެ ކްލަބުން ވިއްކާލާ ކުޅުންތެރިންގެ ލިސްޓުގައި ކިއޭސާ ހިމެނި އެވެ. ކިއޭސާ ހޯދަން ބާސެލޯނާ އިން ޝައުގުވެރިކަން ފާޅުކުރި ނަމަވެސް ބިޑެއް ނުކުރެ އެވެ. އެ ކްލަބުން ބިޑެއް ނުކުރީ މާލީ ހާލަތު ތަންނުދޭތީ އެވެ.

ލިވަޕޫލުން ކިއޭސާ ހޯދުމުގެ ރޭހަށް ވަނުމަށް ފަހު، ދެ ދުވަސް ތެރޭ ޑީލް ނިންމަން އެއްބަސްވުމަކަށް މި ވަނީ އަތުވެފަ އެވެ. އެ ގޮތުން، ފުރަތަމަ ފީގެ ގޮތުގައި، ލިވަޕޫލުން ކިއޭސާ ހޯދަން ދައްކާނީ، 13 މިލިއަން ޑޮލަރެވެ. އިތުރު، 2.5 މިިލިއަން ޑޮލަރު ދައްކާނީ ލިވަޕޫލްގައި ހާސިލްކުރާ ކަންތައްތަކަށް ބަލައިފަ އެވެ. މިއީ، އަނިޔާގެ މައްސަލަތަކާ ހެދި ފޯމު ގެއްލިފައިވީ ނަމަވެސް، ކިއޭސާ ލެވަލްގެ ކުޅުންތެރިއަކާ ބަަލައި، މިހާރުގެ ޓްރާންސްފާ މާކެޓްގައި ކުޑަ ފީ އެކެވެ.

ކިއޭސާ، ލިވަޕޫލްގެ މެޑިކަލް ޓެސްޓްތައް ފުރިހަަމަ ކުރުމަށް ފަހު، އެ ޓީމާ އެކު، ހަތަރު އަހަރުގެ ކޮންޓްރެކްޓެއްގައި ސޮއިކުރާ ގޮތަށް ވަނީ ހަމަޖެހިފަ އެވެ.

މި ފަހަރުގެ ސީޒަން ފެށިއިރު، ލިވަޕޫލުން އެއްވެސް ކުޅުންތެރިއަކު ސޮއިނުކުރެ އެވެ. އެކަމަކު، ޓްރާންސްފާގެ ފަހު ދުވަސްތަކުގައި ލިވަޕޫލްގެ ހަރަކާތްތައް އެކްޓިވްކޮށް ފެންނައިރު، އެ ކްލަބުން ވަނީ ވެލެންސިއާ އަށް ކުޅޭ ޖޯޖިއާގެ ކީޕަރު، ޖިއޯޖީ މަމަޑާޝްވިލީގެ ސޮއި ހޯދަން އެއްބަސްވުމަކަށް އަތުވެފަ އެވެ. މަމަޑާޝްވިލީ، ލިވަޕޫލަށް ސޮއިކުރާނީ އަންނަ ސީޒަނުގައި ގުޅޭ ގޮތަށެވެ.

ކިއޭސާ ވަނީ ޔުވެންޓަސް އަށް ކުޅެދިން 131 މެޗުން 32 ލަނޑު ޖަހައިފަ އެވެ. އޭގެ ތެރެއިން 10 ގޯލު ޖެހީ މިދިޔަ ސީޒަނުގަ އެވެ. މިދިޔަ އަހަރުގެ ޖެނުއަރީ މަހު ކަކުލަށް ލިބުނު ސީރިއަސް އަނިޔާއެއްގެ ސަބަބުން ކުޅުމާ ދުރުުގައި ހުރުމަށް ފަހު އެނބުރި އައީ، މިދިޔަ އަހަރު ނޮވެމްބަރު މަހުގަ އެވެ.