ސިޔާސީ މުވައްޒަފުންގެ އަދަދު 700 އަށް ވުރެ މަތި ނުކުރަން، ވެރިކަމަށް އައުމުގެ ކުރިން ޕީއެންސީން ވައުދުވެފައި ވާއިރު މުވައްޒަފުން މަދު ނުކުރަނީ ކީއްވެތޯ އެ ޕާޓީގެ ވެރިންނާ ނޫސްވެރިއަކު މިއަދު ސުވާލުކުރުމުން، އެ ސުވާލަށް ޖަވާބު ނުދެއްވައި އެހެން ވާހަކަތަކެއް ދައްކަވައިފި އެވެ.

ޕީއެންސީން އެ ޕާޓީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ސުވާލު ކުރީ ޕީއެންސީގެ ވައުދަކީ ސިޔާސީ މުވައްޒަފުންގެ އަދަދު 700 ގައި ހިފެހެއްޓުން ކަމަށް ވިޔަސް، އެއަށް ވުރެ އަދަދު އިތުރުވެފައި ވާއިރު މުވައްޒަފުންގެ އަދަދު މަދުނުކުރަނީ ކީއްވެތޯ އެވެ.

ޕީއެންސީގެ ޕެނަލްގައި ތިއްބެވި ބޭފުޅުންގެ ތެރެއިން އެ ޕާޓީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އެ ސުވާލަށް ޖަވާބެއް ނުދެއްވައި އިކޮޮނޮމިކް މިނިސްޓަރު މުހައްމަދު ސައީދާ ހަވާލުކުރެއްވުމުން އޭނާ ފުރަތަމަ ވިދާޅުވީ ރައީސް ޑރ. މުހައްމަދު މުއިއްޒު އެންމެ އިސްކަންދެއްވާ އެއް ކަމަކީ ދައުލަތުގެ އާމްދަނީ އިތުރުކުރުން ކަމަށެވެ.

އެއާ އެކު ބޭރު ފައިސާ އިތުރުކުރަން އަޅާނެ ކަމަށް ސަރުކާރުން ކުރިން އިއުލާނުކޮށްފައިވާ ފިޔަވަޅުތަކުގެ ވާހަކައަށް ވަޑައިގެން ވަރަށް ދިގުކޮށް ވާހަކަ ދެއްކެވި ނަަމަވެސް ސިޔާސީ މުވައްޒަފުން މަދުކުރުމާ ގުޅޭ ގޮތުން އެއްވެސް ޖަވާބެއް ނުދެއްވަ އެވެ.

މުވައްޒަފުން މަދުކުރުމާ ގުޅޭ ސުވާލަށް ފަހުން އެނބުރި ވަޑައިގެން އަބްދުއްރަހީމް ވިދާޅުވީ އެމަނިކުފާނަކީ މިހާރު ރައްޔިތުންގެ މަޖިލީހުގެ ރައީސްކަމަށް ވާތީ ސަރުކާރުގެ ސިޔާސީ މުވައްޒަފުން މަދުކުރުމަކީ އެމަނިކުފާނުގެ ދައުރެއް އޮންނަ ކަމެއް ނޫން ކަމަށެވެ.

އެެހެން ނަމަވެސް މިހާރު ވެރިކަމުގައި އޮތީ ޕީއެންސީ ކަމަށް ވާތީ، ޕީއެންސީގެ ޗެއާޕާސަންގެ ހައިސިއްޔަތުން ރައީސް އެދިވަޑައިގަންނަވާ ލަފައެއް ވިއްޔާ ދެއްވަމުން ގެންދަވާ ކަމަށް ވެސް އެމަނިކުފާނު ވިދާޅުވި އެވެ.

"އެހެންވީމާ ރައީސުލް ޖުމްހޫރިއްޔާއަށާއި ރައީސުލް ޖުމްހޫރިއްޔާގެ އޮފީހުގެ އެކަމާ ގުޅުން ހުރި ބޭފުޅުންނަށް މިހާރު އެކަމުގެ ތަފްސީލު ދެއްވޭނީ. އެއީކީ މި ޕްރެސްގައި، މިތާނގައި އަޅުގަނޑަށް ދެވޭނެ ތަފްސީލެއް ނޫން،" އަބްދުއް ރަހީމް ވިދާޅުވި އެވެ.

އަބްދުއްރަހީމް ދެއްކެވި ވާހަކައަށް ބައެއް އިތުރުކޮށްލައްވަން ކަމަށް ވިދާޅުވެ، ދެވަނަ ފަހަރަށް ވާހަކަ ދައްކަވަމުން ސައީދު ދެއްވީ އެމްޑީޕީގެ ވެރިކަމުގައި އިގުތިސާދަށް ގެއްލުންވާ ގޮތަށް ކުރި ކަަމަށް އޭނާ ތުހުމަތުކުރައްވާ ކަންތައްތަކާ ދެކޮޅަށް ރައްޔިތުންގެ މަޖިލީހުގައި ކުރެއްވި މަސައްކަތުގެ ތަފްސީލެވެ. އޭރު ފޮނުއްވި ބައެއް ސިޓީތައް ވެސް ނޫސްވެރިންނަށް ދެއްކެވި އެވެ.

އެހެން ނަމަވެސް ސިޔާސީ މުވައްޒަފުން މަދުކުރުމާ ބެހޭ ގޮތުން ވާހަކައެއް ނުދައްކަވަ އެވެ.

ވެރިކަމަށް ވަޑައިގަތުމުގެ ކުރިން ރައީސް މުއިއްޒުގެ ވައުދަކީ 700 އަށްވުރެ ސިޔާސީ މުވައްޒަފުން ގިނަ ނުކުރުމެވެ. ނަމަވެސް, މިވަގުތު ވެސް ސަރުކާރުގައި އޭގެ ދެ ގުނައަށްވުރެ އިތުރަށް ސިޔާސީ މުވައްޒަފުން އެބަތިއްބެވެ.