ޗައިނާ-މޯލްޑިވްސް ފްރެންޑްޝިޕް ބުރިޖުގެ އެއް ލޭނު މަދުވެގެން ރައީސް އަބްދުﷲ ޔާމީން، އޭރުގެ ހައުސިން މިނިސްޓަރު މުއިއްޒަށް ރޮވެންދެން ބަވައިލި ކަމަށް، ރައްޔިތުންގެ މަޖިލީހުގެ މިހާރުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

ސަންގު ޓީވީން ރޭ ގެނެސްދިން އިންޓަވިއުގައި އަބްދުއްރަހީމު ވިދާޅުވީ ފެށުނީއްސުރެވެސް ޔާމީންގެ ހިތުގައި މުއިއްޒަށް ހިތްހަމަ ނުޖެހުން އޮތް ކަމަށާއި ތިން ފަހަރެއްގެ މަތިން ހައުސިން މިނިސްޓަރުގެ މަގާމުން ވަކިކުރަން އުޅުއްވި ކަމަށެވެ. ނަމަވެސް އެކަން ނުވީ އެކިއެކި ސަބަބުތައް މެދުވެރިވެގެން ކަމަށް އެމަނިކުފާނު ވިދާޅުވި އެވެ. ނަމަވެސް އެ ސަބަބުތަކެއް ވިދާޅެއްނުވެ އެވެ.

ޗައިން- މޯލްޑިވްސް ފްރެންޑްޝިޕް ބްރިޖު

"އެންމެ ފަހުން ރިޔާސީ އިންތިހާބުގެ އެންމެ ފަހު ދުވަސްކޮޅު ބުރިޖު ހުޅުވަން މަސައްކަތް ކުރަމުން ދިޔަ އިރު، އޭރު ސަކީނާ މަންޒިލްގައި ޕާޓީ އޮފިސް ހިނގަމުން ދާނީ. އެ ތަނުގައި ކެބިނެޓުގެ ވަޒީރުންނާއި އަދި ޕާޓީގެ އިސް މީހުންނާއެކު ބޭއްވި ބައްދަލުވުމެއްގައި ވެސް ޔާމީން، އޭރުގެ ހައުސިން މިނިސްޓަރު މުއިއްޒަށް ބަވާލި މަންޒަރާއި އެ އަޑު އަހާނެ އޭރު ކެބިނެޓުގައި ތިއްބެވި ވަޒީރުން ވެސް އަދި އަޅުގަނޑުމެންވެސް. ރައީސް މުއިއްޒު ކީރިތި ކުރައްވަންދެން ބަވާލި،" އަބްދުއްރަހީމް ވިދާޅުވި އެވެ.

"އެ ދުވަހު ޔާމީން ވިދާޅުވީ އެއް ލޭން މަދުކަން ތިމަންނަ އަށް މިއަދުއޭ މި އެނގުނީ ކިޔާފައި މުއިއްޒަށް ހެސްކިޔާފައި ބަވާލީ."

އޭރު އަބްދުއްރަހީމް ހުންނެވީ ފޮނަދޫ ދާއިރާގެ މެންބަރުކަމާއި ޕީޕީއެމްގެ ޑެޕިއުޓީ ލީޑަރުގެ ގޮތުގަ އެވެ.

"ހައުސިން މިނިސްޓަރު އެބަ ވިދާޅުވޭ ވަރަށް ސައިޑެއްގައި ޖޮގިން ލޭނެއް ވެސް އިންނާނެ. ހަމަ ޔަގީނުން ވެސް އެބައިން, ވެހިކަލް ދުއްވާނެ ދެ ލޭނު އެބައިން, ސައިކަލު ދުއްވާނެ ލޭނެއް އެބައިން, ހަމަ އެހެންމެ ބައިސްކަލާއި ޖޮގިން ވެސް ކުރެވޭނެ. މިއީކީ އާދައިގެ ބްރިޖެއް ނޫން," ސިނަމާލެ ބްރިޖުގެ ޑިޒައިން ދައްކާލުމަށް ސެޕްޓެމްބަރު 8, 2015 ގައި ބޭއްވި ޖަލްސާގައި އޭރުގެ ނައިބު ރައިސް އަހްމަދު އަދީބު ވިދާޅުވި އެވެ.

އަދީބު މިގޮތަށް ވިދާޅުވި ނަމަވެސް, ބްރިޖު ނިމުނުއިރު އޮތީ ވެހިކަލް ދުއްވާ ދެ ލޭނެވެ. ސައިކަލު ލޭނާއި ބައިސްކަލު ދުއްވަން ވަކި ލޭނެއް ނެތެވެ. އެހެންވެ، ބްރިޖުގެ ލޭނު މަދުވެގެން، އޭރު އިދިކޮޅުގައި އޮތް ސިޔާސީ ޕާޓީތަކުން ޔާމީންގެ ސަރުކާރަށް ވަރަށް ބޮޑަށް ފާޑުކިޔާފައިވެ އެވެ.

ބްރިޖުގެ އެއް ލޭން މަދުވީ މުއިއްޒުގެ ސަބަބުން ކަމަށް ގަބޫލު ނުކުރެއްވޭކަން ފާހަގަ ކުރެއްވުމުގެ ގޮތުން އަބްދުއްރަހީމް ވިދާޅުވީ އިކޮނޮމިކް ޔޫތު ކައުންސިލް ބެލެހެއްޓެވީ ޔާމީން ކަމަށާއި، ބްރިޖުގެ މަސައްކަތް ކުރަމުން ދިޔައިރު ލޭނެެއް މަދުކަން ފާހަގަ ވާންޖެހޭނެ ކަމަށެވެ.

ބްރިޖުގެ މަސައްކަތް ކުރިއަށް ގެންދަން ޔާމީން ހަވާލުކޮށްފައި އޮތީ އޭރުގެ ހައުސިން މިނިސްޓްރީއާ އެވެ.

ޔާމީނަކީ ބޮޑާ ކިބުރުވެރި ބޭފުޅެއް ކަމަށް ވިދާޅުވެ ހޫނު ރައްދެއް ވެސް އަބްދުއްރަހީމް ދެއްވި އެވެ. އަދި ހިޔާނާތުގެ ތުހުމަތު ވެސް ކުރެއްވި އެވެ.

"ތިމާ ކިބުރުވެރިވެ ބޮޑާވެ ހައްދުފަހަނަ އަޅައި ނުދާންވީ. ތިމާކޮށްފައި ހުރި ކަންތައްތައް ކޮށްފައި ހުރި ގޮތާއި އުޅެފައި ހުރި ގޮތާ ދަންނަ ބަޔަކު މި ގައުމުގައި ތިބެދާނެ ކަމަށް ގަބޫލުކުރަންވީ. އާ ވާހަކަތަކެއް އަދިވެސް ނުކުމެދާނެ ކަމަށް ވިސްނާ ވަޑައިގަންނަވަންވީ،" އަބްދުއްރަހީމް އިންޒާރެއް ދެއްވި އެވެ.

ޔާމީނަކީ ރައްޔިތުންގެ ތާއީދު އޮތް ބޭފުޅެއް ނޫން ކަމަށާއި ޔާމީނަށް ވެރިކަން ލިބިވަޑައިގެންނެވި ގޮތް ރަނގަޅަށް އެނގިވަށައިގަންނަވާ ކަމަށް އަބްދުއްރަހީމް ވިދާޅުވި އެވެ.

"މިކަހަލަ އެއް ޕްރޮގްރާމެއްގައެއް މިކަހަލަ ވާހަކަ ނުދެއްކޭނެ،" އަބްދުއްރަހީމް ވިދާޅުވި އެވެ.