ރާއްޖޭގެ އިގުތިސާދު އޮތް ނާޒުކު ހާލަތު ބަދަލު ކުރަން ސަރުކާރުގެ ބޮޑާކަން ދޫކޮށް، އެންމެން އެކުގައި މަސައްކަތް ކުރަން ޖެހޭ ކަމަށް އައްޑޫ މޭޔަރު އަލީ ނިޒާރު ވިދާޅުވެއްޖެ އެވެ.

ކުރިން ރައްޔިތުންގެ މަޖިލީހުގެ މެންބަރުކަން ވެސް ކުރެއްވި ނިޒާރު ރޭ އެކްސްގައި ކުރެއްވި ޕޯސްޓެއްގައި ވިދާޅުވީ ގައުމުގެ އިގްތިސާދީ ހާލަތަކީ ރައްޔިތުންނަށް ސިއްރުވާން ޖެހޭނެ މައުލޫމާތެއް ނޫން ކަމަށެވެ.

"އިވޭ އަޑާއި ވަމުންދާ ގޮތަށް ބަލާއިރު ގައުމު މި އޮތީ އިގްތިސާދީ ގޮތުން ނާޒުކު ހިސާބެއްގައި ކަމަށް ގަބޫލު ކުރެވޭ،" އޭނާ ވިދާޅުވި އެވެ.

މިދަޑިވަޅުގައި ސަރުކާރުގެ އާރާއި ބާރުގެ ބޮޑާކަން ދޫކޮށް ހަމަ ބިމަށް ތިރިވެ، އިތުރަށް ނިކަމެތިވެ ނުދާނެ ގޮތެއް އެންމެން ގުޅިގެން ހޯދަން މަސައްކަތް ފަށަން ޖެހޭ ކަމަށް ނިޒާރު ވިދާޅުވި އެވެ.

"އަވައްޓެރި ސިލޯނަށް ކަންތައް ދިމާވި ގޮތަކީ ވެރިންގެ ކިބުރުވެރި ކަމާއި ބޮޑާކަން އިސްކުރުމާއި ބަސްނޭހުމުގެ ނަތީޖާ،" ނިޒާރު ވިދާޅުވި އެވެ.

ސަރުކާރުގެ މާލީ ހާލަތު ގޯހުން ގޯހަށް ދާ މިދަނޑިވަޅުގައި ހަރަދު ކުޑަކުރުމަށް ގިނަ ފިޔަވަޅުތަކެއް އެޅުމަށް ސަރުކާރުން ދަނީ މަސައްކަތް ކުރަމުންނެވެ. ބައެއް މުދަލުންނާއި ހިދުމަތްތަކުން ޓެކްސް ބޮޑުކުރަން ވެސް ވަނީ ރާވައިފަ އެވެ. ނަމަވެސް އެ ބަދަލުތަކުގެ މައުލޫމާތު އާންމެއް ނުކުރެ އެވެ.

މާލީ ހާލަތު ދަށްވެ، ބީއެމްއެލްގެ ރުފިޔާ ކާޑުތަކުން ޑޮލަރު މުއާމަލާތް ވެސް ނުކުރެވޭ ގޮތް ހެދުމަށް އެ ބޭންކުގެ ބޯޑުން ވަނީ ނިންމައިފަ އެވެ. އެ ނިންމުން ތަންފީޒުކޮށްފި ނަމަ ޑޮލަރު އެކައުންޓެއް ނެތި އާންމު އެތައް ހިދުމަތްތަކެއް ނުލިބޭނެ އެވެ.