ކޮލަމްބޯ، ސްރީ ލަންކާ (އޮގަސްޓް 20) - ސްރީ ލަންކާ ފުޓްބޯޅަ ޓީމުގެ އިންޓަރިމް ކޯޗަކަށް ކުރިން ނޭޕާލަށް އިރުޝާދުދިން ކުވެއިތުގެ އަބްދުﷲ އަލް މުތައިރީ ހަމަޖައްސައިފި އެވެ.

ރާއްޖޭގައި 2021 ވަނަ އަހަރު ބޭއްވި ސާފް ޗެމްޕިއަންޝިޕްގެ ފައިނަލަށް ނޭޕާލް ގެންގޮސްދީ، އެ ގައުމުގެ ތާރީހުގައި ފުރަތަމަ ފަހަރަށް އެ މުބާރާތުގެ ފައިނަލުގައި ކުޅުމުގެ ފުރުސަތު ހޯދައިދިން މުތައިރީ ލަންކާއާ ހަވާލުވީ، އަންނަ މަހު ކެމްބޯޑިއާއާ ދެކޮޅަށް ލަންކާ އިން ކުޅޭ އޭޝިއަން ކަޕް ކޮލިފައިން ޕްލޭއޮފް ބުރުގެ މެޗުތަކަށެވެ.

އެ ގޮތުން، ސެޕްޓެމްބަރު މަހު، ފަސް ވަނަ ދުވަހު ކޮލަމްބޯގައި ލަންކާ އިން ކެމްބޯޑިއާއާ ދެކޮޅަށް ކުޅޭނެ އެވެ. އަދި އޭގެ ފަސް ދުވަސް ފަހުން ކެމްބޯޑިއާގެ ހޯމް މެޗު އޮންނާނެ އެވެ.

މުތައިރީ އަށް ކޯޗުކަން ދިނީ، ސްރީ ލަންކާ ފުޓްބޯލް އެސޯސިއޭޝަނާއި އޮސްޓްރޭލިއާގެ ކުރީގެ ފޯވާޑް ޓިމް ކޭހިލް އަދި ގަތަރުގެ އެސްޕަޔާ ނެޓްވޯކާ ގުޅިގެންނެވެ.

ލަންކާއާ ހަވާލުވެހުރި، އިނގިރޭސި ކޯޗު އެންޑީ މޮރިސަން އަށް ދިމާވި އަނިޔާގެ މައްސަލައަކާ ހުރެ، އޭނާ ސާޖަރީއެއް ހަދަން ޖެހުމުން އޭނާ ވަނީ ބްރޭކެއް ނަގައިފަ އެވެ. އެ މުއްދަތާ ދިމާވީ، އޭޝިއަން ކަޕް ކޮލިފައިން ޕްލޭއޮފްގައި ލަންކާ އާއި ކެމްބޯޑިއާ މެޗު ތާވަލުކުރި ދުވަސްވަރަށެވެ. މުތައިރީ ގެނައީ، މި ވަގުތަށެވެ. މުތައިރީ، ލަންކާގެ ކޯޗަކަށް ހަމަޖެއްސިއިރު، ކެމްބޯޑިއާ މެޗުގެ ނަތީޖާތައް ބަލާފައި، މުތައިރީ އަށް ދާއިމީ އެއްބަސްވުމެއް ދިނުމުގެ ފުރުސަތު އެބައޮތެވެ.

އޯލް ނޭޕާލް ފުޓްބޯލް އެސޯސިއޭޝަން (އަންފާ)އާ ގިނަ މައްސަލަތަކެއް ޖެހުނު، މުތައިރީ ވަނީ، ނޭޕާލް ކޯޗަކަށް ހުރިއިރު، އެ ގައުމާ އެކު، ދިގު ކޮންޓްރެކްޓެއްގައި ވެސް ސޮއިކޮށްފަ އެވެ. އެކަމަކު، އަހަރަކަށް ވުރެ ގިނަ ދުވަހު އޭނާ އަށް އެ ޓީމުގެ ކޯޗުކަން ނުކުރެވުނެވެ.

އޭއެފްސީ ޕްރޯ ލައިންސަންސް ކޯޗު، މުތައިރީ ވަނީ، ނޭޕާލްގެ ކޯޗަކަށް ހުރެ، ސައުތު އޭޝިއަން ފުޓްބޯލް ފެޑެރޭޝަން (ސާފް)ގެ ކަންކަމަށް ވެސް ފާޑުކިޔައިފަ އެވެ.

ކިރްގިސްތާންގެ 17 އަހަރުން ދަށުގެ ޓީމަށް ވެސް ކޯޗުކޮށްދިން މުތައިރީ، ނޭޕާލް ކޯޗުކަން ދޫކޮށްލުމަށް ފަހު، ދެން، މުތައިރީ ފެނުނީ އަފްގާނިސްތާންގެ ކޯޗުގެ މަގާމުންނެވެ. މިދިޔަ އަހަރު، އެކުވެރިކަމުގެ މެޗެއްގައި އަފްގާނިސްތާނުން ބަންގްލަދޭޝާ ކުޅެމުން، މުތައިރީ އާއި ބަންގްލަދޭޝްގެ ކޯޗިން ސްޓާފުންނާ ދެމެދު މައްސަލަތަކެއް ޖެހުނެވެ. އޭގެ ސަބަބުން، ފަހުން އަފްގާނިސްތާނުން ވަނީ މުތައިރީގެ އެއްބަސްވުން ނިމުމަކަށް ގެނެސްފަ އެވެ.

ލަންކާ އަށް ދާދި ފަހުން، ކޯޗުކޮށްދިން ބޮސްނިއާގެ އާމިރު އަލަގިޗް އަކީ، ކުރިން ރާއްޖޭގެ ނިއު ރޭޑިއަންޓް ސްޕޯޓްސް ކްލަބްގައި ކުރު މުއްދަތަކަށް މަސައްކަތްކުރި ކޯޗެކެވެ.