ތައިލެންޑްގައި ކުރިއަށްދާ އޭއޯއެސްއައި ޝޯޓް ކޯސް/ އޭޖް ގްރޫޕް ސްވިމިން ޗެމްޕިއަންޝިޕް، ބެންކޮކް އެޑިޝަންގައި ވާދަކޮށް، ރާއްޖޭގެ ނިއު ލެގޫން ސްވިމިން ކްލަބުން ވެސް ވަނީ މެޑަލްތަކެއް ހޯދައިފި އެވެ.

އެ ގޮތުން، ތައިލެންޑްގެ މި މުބާރާތުން ނިއު ލެގޫންގެ ފެތުންތެރިން ވަނީ، ޖުމްލަ 12 މެޑަލް ހޯދައިފަ އެވެ. އެއީ، އިންޑިވިޖުއަލް ފެތުންތެރިން ހޯދި 11 މެޑަލް އާއި ހަތަރެއް ގުނަ 50 މީޓަރު ފްރީ ސްޓައިލް ރިލޭ ޓީމުން ހޯދި ރިހި މެޑަލް އެވެ.

ހަތަރެއް ގުނަ 50 މީޓަރު، ފްރީ ސްޓައިލް ރިލޭ އިން ރިހި މެޑަލް ހޯދި ޓީމުގައި ހިމެނެނީ، އިބްރާހިމް މާދު ސާޖިދު، ލޫތު މުހައްމަދު ހުސެއިން، އިޒްޔާން ނާޒިމް އަދި ހަމީމް އެވެ.

ރިލޭ އިން މެޑަލް ހޯދި ނިއު ލެގޫން ސްވިމިން ކްލަބްގެ އެތުލީޓުން: އެ ކްލަބްގެ ދިދަ ހިފައިގެން.---- ފޮޓޯ: ނިއު ލެގޫން ސްވިމިން ކްލަބް/ ފޭސްބުކް

އިންޑިވިޖުއަލް މެޑަލްތަކަށް ބަލާއިރު، އެންމެ ރެކޯޑް ރަނގަޅީ، ފަސް މެޑަލް ހޯދި އަމްނާ ތަޒްކިޔާ މިރުސާދު އެވެ. އޭނާ ވަނީ 100 މީޓަރު ފްރީ ސްޓައިލް އިވެންޓުން ރަން މެޑަލް، 50 މީޓަރާއި 200 މީޓަރު ފްރީ ސްޓައިލް އިވެންޓުން ރިހި މެޑަލް ހޯދުމުގެ އިތުރުން، 50 މީޓަރު ބަޓަފްލައި އަދި 200 މީޓަރު އިންޑިވިޖުއަލް މެޑްލީން ލޯ މެޑަލް ހޯދައިފަ އެވެ.

އައިޝަތު ޝައިހާ ޝާފިއު ވަނީ، 100 މީޓަރު ބްރެސްސްޓްރޯކުން ރިހި މެޑަލް އަދި 100 މީޓަރު ބެކްސްޓްރޯކް އިން ލޯ މެޑަލް ހޯދައިފަ އެވެ.

މާދު ވަނީ، 100 މީޓަރު ބެކްސްޓްރޯކް އާއި 200 މީޓަރު ބެކްސްްޓްރޯކުން ލޯ މެޑަލް ހޯދައިފަ އެެވެ. އަދި ލޫތު ވަނީ 200 މީޓަރު ބްރެސްސްޓްރޯކް އާއި 50 މީޓަރު ބްރެސްޓްރޯކުން ލޯ މެޑަލް ހޯދައިފަ އެވެ.

ތައިލެންޑް މުބާރާތުގައި ވާދަކުރި ރާއްޖޭގެ ޓީމުތަކުގެ ތެެރެއިން އެންމެ ރެކޯޑް ރަނގަޅީ، ނިއު ލެގޫން ސްވިމިން ކްލަބްގެ އެވެ.